ލަންޑަން (މެއި 5) - ޔުއެފާ ޗެމްޕިއަންސް ލީގުގެ އެންމެ ކާމިޔާބު ޓީމު ރެއާލް މެޑްރިޑް ކަޓުވާލުމަށް ފަހު ޗެލްސީން ޗެމްޕިއަންސް ލީގުގެ ފައިނަލުން ފުރުސަތު ހޯދައިފި އެވެ.
މިދިޔަ ހަފްތާގައި ރެއާލް ދަނޑުގައި ކުޅުނު ފުރަތަމަ ލެގުގެ މެޗު ނިމުނީ 1-1 އިން އެއްވަރުވެގެންނެވެ. މިރޭ ޗެލްސީ ދަނޑުގައި އެ ޓީމުން ވަނީ 2-0 އިން ރެއާލް މެޑްރިޑް ބަލިކޮށް އެގްރިގޭޓަށް ބަލާއިރު 3-1 އިން ކުރިހޯދައިފަ އެވެ.
މިއީ 2012 ވަނަ އަހަރަށް ފަހު ޗެލްސީން ޗެމްޕިއަންސް ލީގުގެ ފައިނަލުގައި ކުޅޭ ފުރަތަަމަ ފަހަރެވެ. ފައިނަލުގައި ޗެލްސީ ނުކުންނާނީ ރޭ ޕީއެސްޖީ ކަޓުވާލުމަށް ފަހު ފައިނަލުން ފުރުސަތު ހޯދި މެންޗެސްޓާ ސިޓީއާ ދެކޮޅަށެވެ.
މިއީ ފާއިތުވި ތިން ސީޒަންގެ ތެރޭގައި ޗެމްޕިއަންސް ލީގުގެ ފައިނަލުގައި އިނގިރޭސި ދެ ޓީމު ކުރިމަތިލާނެ ދެ ވަނަ ފަހަރެވެ. މީގެ އެއް ސީޒަން ކުރިން ފައިނަލުގައި ކުޅުނީ ލިވަޕޫލާއި ޓޮޓެންހަމް އެވެ. ތުރުކީގެ އިސްތަންބޫލުގައި ސިޓީ އާއި ޗެލްސީ ކުޅޭ މި ފަހަރުގެ ފައިނަލް އޮންނާނީ މި މަހު 29 ގަ އެވެ.
ޗެލްސީން ވަނީ މި ފަހަރުގެ އެފްއޭ ކަޕްގެ ސެމީ ފައިނަލުގައި ސިޓީ ކަޓުވާލައިފަ އެވެ. އަންނަ ހޮނިހިރު ދުވަހު އިނގިރޭސި ޕްރިމިއާ ލީގުގައި ސިޓީ އަމިއްލަ ދަނޑުގައި ޗެލްސީއާ ބައްދަލުކުރާނެ އެވެ. އެ މެޗުން މޮޅުވެގެން ސިޓީ އަށް ހަތަރު އަހަރު ތެރޭ ތިން ވަނަ ފަހަރަށް ލީގު ޗެމްޕިއަންކަން ލިބޭނެ އެވެ.
ޗެލްސީގެ ސްޓެމްފޯޑް ބްރިޖުގައި މިރޭ ކުޅުނު މެޗުގައި އެ ޓީމުން ލަނޑު ޖަހާނެ ގިނަ ފުރުސަތުތަކެއް ތަނަވަސްކުރި އެވެ. ރެއާލުން ބޯޅަ ހިފަހައްޓައިގެން ކުޅެން އުޅުނު ނަމަވެސް ގޯލާ އަމާޒުކޮށް އެ ޓީމަށް ފޮނުވާލެވުނީ މަދު ހަމަލާއެކެވެ. ފުރަތަމަ ހާފުގައި ކަރިމް ބެންޒެމާ ޖެހި ދެ ބޯޅަ ވެސް ޗެލްސީގެ ކީޕަރު އެޑޮއާޑް މެންޑީ ވަނީ މަތަކޮށްފަ އެވެ.
ފުރަތަމަ ހާފުގައި ޗެލްސީ އަށް ލީޑުނަގައިދިނީ 28 ވަނަ މިނިޓްގައި ޓިމޯ ވާނާ އެވެ. މެދުތެރެއިން އެންގޯލޯ ކާންޓޭ ހޯދި ބޯޅައެއްގައި ކައި ހަވާޓްޒް އޭރިއާތެރެއިން ފޮނުވާލި ބޯޅަ ހުރަސް ދަނޑީގައި ޖެހިފައި ވާނާ އަށް ލިބުނު ބޯޅަ އޭނާ ވަނީ ބޮލުން ހުސްކޮށް އޮތް ގޯލުގެ ތެރެއަށް ފޮނުވާލައިފަ އެވެ. އޭގެ ކުރިން ވާނާ ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ.
ހަތް ހަފްތާ ތެރޭގައި އަނިޔާއިން ރަނގަޅުވެ ރެއާލްގެ ކެޕްޓަން ސާޖިއޯ ރާމޯސް ފުރަތަމަ އެގާރައިގައި ކުޅުނު ފުރަތަމަ މެޗުގައި އެ ޓީމަށް ޗެލްސީގެ އެޓޭކްތައް ހުއްޓުވުމުގައި މާ ބޮޑު ތަފާތެއް ނުދެއްކުނެވެ. ދެ ވަނަ ހާފްގައި ފުލުފުލުގައި ޗެލްސީން ލަނޑު ޖަހާނެ ފުރުސަތުތަައް ތަނަވަސްކުރި އެވެ. ކާންޓޭ އާއި ހަވާޓްޒް މުޅިން ހުސްކޮށް ވަދެ ޖެހި ބޯޅަތައް ރެއާލްގެ ކީޕަރު ތިބައު ކޯޓުއާ އާއި ފެޑެރީކޯ ވަލްވޭޑޭ ވަނީ ހުއްޓުވައިފަ އެވެ. އަދި އޭރިއާތެރެއިން މޭސަން މައުޓް ޖެހި ބޯޅަ ދިޔައީ ހުރަސްދަނޑިމަތިންނެވެ.
ޗެލްސީ އަށް ފައިނަލުގެ ޖާގަ ކަށަވަރުކޮށްދިން ގޯލު ޖެހީ މެޗު ނިމެން ފަސް މިނިޓަށް ވެފައި ވަނިކޮށް މައުންޓް އެވެ. މި ގޯލުގައި ވެސް ކާންޓޭ މުހިއްމު ދައުރެއް އަދާކުރި އެވެ. ކާންޓޭ ދިން ބޯޅަ އޭރިއާތެރެއިން ހިފަހައްޓައި ކްރިސްޓިއަން ޕުލިސިޗް ރަނގަޅު ވަގުތުގައި މައުންޓަށް ޖައްސާލި ބޯޅަ އޭނާ ވަނީ ގޯލުގެ ތެރެއަށް ފޮނުވާލައިފަ އެވެ.
މިއީ ޗެލްސީގެ ކޯޗު ތޯމަސް ޓުޗެލް ޗެމްޕިއަންސް ލީގުގެ ފައިނަލުގައި ޖެހިޖެހިގެން ކުޅޭ ދެ ވަނަ ސީޒަނެވެ. މިދިޔަ އަހަރުގެ ފައިނަލުގައި ޓުޗެލްގެ ޕީއެސްޖީ ބަލިވީ ބަޔާން އަތުންނެވެ. ޓުޗެލް އަށް ޕީއެސްޖީގެ ވަޒީފާ ގެއްލުނީ މިދިޔަ ޑިސެމްބަރު މަހު އެވެ. އޭނާ ޗެލްސީއާ ހަވާލުވީ ޖެނުއަރީ މަހުގެ ފަހުކޮޅުގަ އެވެ. އެއީ އޭރު ޗެލްސީގެ ކޯޗަކަށް ހުރި އެ ކްލަބްގެ ލެޖެންޑް ފްރޭންކް ލަމްޕާޑް ވަކިކުރުމުންނެވެ.
ޗެލްސީން މިހާތަނަށް ޗެމްޕިއަންސް ލީގުގެ ތަށި އުފުލާލި ހަމައެކަނި ފަހަރު ކަމަށްވާ 2012 ވަނަ އަހަރު އެ ޓީމުގެ ކޯޗަކަށް ހުރީ ސީޒަންގެ މެދުތެރެއިން ހަވާލުވި ރޮބާޓޯ ޑި މަޓެއޯ އެވެ. ޑި މަޓެއޯ ޗެލްސީ ގޮވައިގެން ޗެމްޕިއަންސް ލީގު ކާމިޔާބުކުރީ ފައިނަލުގައި ބަޔާން ބަލިކޮށްފަ އެވެ.
ސީޒަނުގެ މެދުތެރެއިން ޗެލްސީއާ ހަވާލުވެ ޓުޗެލް ވަނީ މިހާތަނަށް ރަނގަޅު މަސައްކަތްތަކެއް ކޮށްފަ އެވެ. ގަދަ ހަތަރަކުން ޗެލްސީ އަށް އަލުން ފުރުސަތު ހޯދައިދީ އެ ޓީމަށް އެފްއޭ ކަޕް ފައިނަލުން ފުރުސަތު ހޯދައިދިނެވެ. ފައިނަލުގައި ޗެލްސީ ކުޅޭނީ ލެސްޓާ ސިޓީއާ ދެކޮޅަށެވެ.
ރެއާލްގެ ކޯޗު ޒިނެދިން ޒިދާން އެ ޓީމާ އެކު ޖެހިޖެހިގެން ތިން ޗެމްޕިއަންސް ލީގު ކާމިޔާބުކުރި ނަމަވެސް އެންމެ ފަހުން ދެ ފަހަރު ވެސް ކެޓީ އިނގިރޭސި ޓީމުތައް އަތުންނެވެ. މިދިޔަ ސީޒަނުގައި ސިޓީ އަތުން ބަލިވިއިރު، މި ފަހަރު ޗެލްސީ އަތުން ވެސް މި ވަނީ ނާކާމިޔާބީއާ ކުރިމަތިލާން ޖެހިފަ އެވެ.
