މެންޗެސްޓާ (މެއި 5) - ދެ ވަނަ ލެގުގައި ފްރާންސްގެ ޗެމްޕިއަން ޕީއެސްޖީ 2-0 އިން ބަލިކޮށް މެންޗެސްޓާ ސިޓީން އެ ކްލަބްގެ ތާރީހުގައި ޔުއެފާ ޗެމްޕިއަންސް ލީގުގެ ފައިނަލުން ފުރަތަމަ ފަހަރަށް ފުރުސަތު ހޯދައިފި އެވެ.
އެގްރިގޭޓަށް ބަލާއިރު ސިޓީ އަށް މިދިޔަ އަހަރުގެ ރަނަރަޕް ޕީއެސްޖީގެ މައްޗަށް ކުރި ލިބުނީ 4-1 އިންނެވެ. ފައިނަލުގައި ސިޓީ ކުޅޭނީ މާދަމާރޭ ޗެލްސީ އާއި ރެއާލް މެޑްރިޑް ކުޅެގެން ކުރިހޯދާ ޓީމަކާ ދެކޮޅަށެވެ. ރެއާލް ދަނޑުގައި ފުރަތަމަ ލެގު ނިމުނީ 1-1 އިން އެއްވަރުވެގެންނެވެ.
ސިޓީން މީގެ ކުރިން ޔޫރަޕްގައި ކުޅުނު ހަަމައެކަނި ފައިނަލަކީ 1970 ވަނަ އަހަރުގެ ޔޫރަޕިއަން ކަޕް ވިނާސް ކަޕް ފައިނަލުގަ އެވެ. ޗެމްޕިއަންސް ލީގުގައި މީގެ ކުރިން 2016 ވަނަ އަހަރު މެނުއަލް ޕެލެގްރީނީގެ ކޯޗުކަމުގައި ސިޓީން އަލަށް ސެމީ ފައިނަލުގައި ވާދަކޮށްވީ ބައްޔެވެ.
ޕެޕް ގާޑިއޯލާގެ ކޯޗުކަމުގައި މި ފަހަރުގެ މުބާރާތުގައި ސިޓީން މެޗަކުން ބަލިނުވެ، ފައިނަލުން ފުރުސަތު ހޯދީ އެވެ. މިއީ 2011 ވަނަ އަހަރަށް ފަހު ގާޑިއޯލާ ޗެމްޕިއަންސް ލީގުގެ ފައިނަލުން ފެންނާނެ ފުރަތަމަ ފަހަރެވެ. ގާޑިއޯލާ ވަނީ 2009 އާއި 2011 ވަނަ އަހަރު ބާސެލޯނާއާ އެކު ޗެމްޕިއަންސް ލީގު ކާމިޔާބުކޮށްފަ އެވެ.
މިދިޔަ ހަފްތާގައި ސިޓީން ޕީއެސްޖީ ދަނޑުގައި ނަތީޖާ އަނބުރާލީ ދެ ވަނަ ހާފުގަ އެވެ. ޕީއެސްޖީ މިރޭގެ މެޗަށް ނުކުތްއިރު، އެ ޓީމަށް އޮތް އެންމެ ބޮޑު ގޮންޖެހުމަކީ އަނިޔާގެ ސަބަބުން އެ ޓީމުގެ ތަރި ކީލިއަން އެމްބާޕޭ އަށް ނުކުޅެވުމެވެ.
މިރޭގެ މެޗު ފަށައިގެން ޕީއެސްޖީން ސިޓީ ހާފް ތެރޭގައި ބޯޅަ ހިފަހައްޓައިގެން ކުޅުނެވެ. އެ ވަގުތު ސިޓީގެ ވާތު ބެކް ޔޫކްރޭނުގެ އޮލެކްސަންޑަ ޒިންޗެންކޯ އަތުގައި ބޯޅަ ޖެހުނު ކަމަށް ބަލައި ރެފްރީ ފުރަތަމަ ޕީއެސްޖީ އަށް ޕެނަލްޓީ އެއް ދޭން ނިންމި އެވެ. އެކަމަކު ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެ ނިންމުން ބަދަލުކުރީ ބޯޅަ ޖެހުނީ ޒިންޗެންކޯ ކޮނޑުގައި ކަމަށްވާތީ އެވެ.
ސިޓީން މެޗުގައި ފުރަތަމަ ގޯލު ޖެހީ މެޗުގެ 11 ވަނަ މިނިޓްގަ އެވެ. މި ގޯލު ޖެހީ ފުރަތަމަ ލެގުގައި ވެސް ސިޓީ މޮޅުކޮށްދިން ހިލޭ ޖެހުން ކާމިޔާބުކުރި އަލްޖީރިއާގެ ވިންގް ރިޔާދު މާރޭޒް އެވެ. ސިޓީގެ ކީޕަރު އެޑަސަން މޮރާއެސް ޖެހި ބޯޅައެއް ހޯދައި ޒިންޗެންކޯ ނެގި ހުރަހަކުން ކެވިން ޑިބްރޭނާ ޖެހި ޝޮޓް ޕީއެސްޖީ ކުޅުންތެރިއަކު ގައިގައި ޖެހިފައި ލިބުނީ މާރޭޒް އަށެވެ. އޭނާ ވަނީ ހަމަޖެހިލާފައި ތިރިތިރިން ގޯލުގެ ތެރެއަށް ބޯޅަ ފޮނުވާލައިފަ އެވެ.
ޕީއެސްޖީގެ ޑި މާރިއާ އަށް ރެފްރީ ރަތް ކާޑެއް ދައްކަނީ.-- ފޮޓޯ: ގެޓީ އިމޭޖަސް.
ޕީއެސްޖީން އެއްވަރުކުރަން ކުރި މަސައްކަތުގައި އެ ޓީމުގެ ކެޕްޓަން މާކުއީނިއޯސް ބޮލުން ޖެހި ބޯޅަ ބޭރުވީ ހުރަސްދަނޑީގައި ޖެހިފަ އެވެ. ޕީއެސްޖީގެ ތަރި ނޭމާ ސިޓީ ހާފު ތެރޭގައި ބޯޅަ ހިފަހައްޓައިގެން އެޓޭކް ކުރެވޭތޯ ކުރި މަަސައްކަތްތައް ހުއްޓުވުމުގައި ސިޓީގެ ރުބެން ޑިއާސް އާއި ޖޯން ސްޓޯންސް ވަނީ ކުރި ހޯދައިފަ އެވެ.
ދެ ވަނަ ހާފްގައި ޕީއެސްޖީން ދެ ބަދަލެއް ގެނައި ވަގުތު ޓީމު ރަނގަޅަށް ހަމަނުޖެހެނިސް ސިޓީން ވަނީ ދެ ވަނަ ގޯލެއް ޖަހައިފަ އެވެ. މި ގޯލު ވެސް ކާމިޔާބުކުރީ ނޮކައުޓް ރައުންޑުގައި ތަފާތު ކުޅުމެއް ދައްކަމުން އަންނަ މާރޭޒް އެވެ. މެޗުގެ 63 ވަނަ މިނިޓްގައި ޒުވާން ތަރި ފިލް ފޯޑެން ހުރަސްކޮށްލި ބޯޅަ މާރޭޒް ވަނީ ގޯލުގެ ތެރެއަށް ފޮނުވާލައިފަ އެވެ.
ސިޓީން ދެ ގޯލުގެ ލީޑެއްނެގި ފަހުން ޕީއެސްޖީގެ ކުޅުންތެރިންގެ ފަރާތުން ގިނަ ފައުލުތަކެއް ފެނިގެންދިޔަ އެވެ. އޭގެ ތެރެއިން ވަގުތެއްގައި ޕީއެސްޖީގެ އެންހެލް ޑި މާރިއާ ސިޓީގެ ކެޕްޓަން ފެނާންޑީނިއޯ އަށް ބޯޅަ ނެތިސް ހަމަލާ ދިނުމުން އޭނާ އަށް ވަނީ ސީދާ ރަތް ކާޑެއް ދައްކައިފަ އެވެ. ޑިމާރިއާ ވަނީ އެއްލުމަކަށް ބޯޅަ ބޭރުވި ވަގުތުގައި ފެނާންޑީނިއޯއާ ދެމެދު ހިނގި ދެބަސްވުމެއްގެ ތެރެއިން އޭނާގެ ފައި މައްޗަށް ފައިން އަރައިފަ އެވެ.
ޕީއެސްޖީން ފުރަތަމަ ލެގު ނިންމާލީ ވެސް އެއް ކުޅުންތެރިއަކު މަދުކޮށެވެ. އެއީ އިދްރީސާ ގޭ އަށް ރަތް ކާޑެއް ދެއްކުމުންނެވެ. މިރޭގެ މެޗުގައި ޑި މާރިއާ އަށް ރަތް ކާޑެއް ދެއްކިއިރު، ޕީއެސްޖީގެ އެއް ކުޅުންތެރިއަކު މަދުވުމުގެ ފައިދާނަގައި ފަހު 20 މިނިޓް ތެރޭގައި ސިޓީން ވަނީ އިތުރު އެޓޭކްތަކެއް ކޮށްފަ އެވެ. އެ ވަގުތު އިތުރު ގޯލެއް ޖަހަން ސިޓީގެ ފޯޑެން ފޮނުވާލި ބޯޅަތައް ޕީއެސްޖީގެ ކީޕަރު ކޭލޯ ނަވާސް ވަނީ ހުއްޓުވައިފަ އެވެ.
މެޗަށް ފަހު ސިޓީގެ ކުޅުންތެރިން ވަރަށް ބޮޑަށް އުފާފާޅުކުރި އެވެ. ސިޓީން މި ސީޒަނުގެ ހަތަރު ތަށި ހޯދަން ކުރި މަސައްކަތް ނާކާމިޔާބުވީ އެފްއޭ ކަޕްގެ ސެމީގައި ޗެލްސީ އަތުން ކެޓުމުންނެވެ. އެކަމަކު އެ ޓީމުން ވަނީ ޓޮޓެންހަމް ބަލިކޮށް ލީގު ކަޕް ކާމިޔާބުކޮށްފަ އެވެ. އަދި މި ހަފްތާގައި ޗެލްސީ ބަލިކޮށްގެން ހަތަރު އަހަރު ތެރޭ ތިން ވަނަ ފަހަރަށް އިނގިރޭސި ޕްރިމިއާ ލީގު ކާމިޔާބު ކުރެވޭނެ އެވެ.
ސިޓީ އަކީ ޗެމްޕިއަންސް ލީގުގެ ތާރީހުގައި ފައިނަލުގައި ކުޅޭނެ ނުވަ ވަނަ އިނގިރޭސި ޓީމެވެ.
