މިހާރު ދިވެހިރާއްޖެއަށް އައިސްގެން މި އުޅެނީ ކޮވިޑް-19 ގެ ރާޅެއް ކަމަށާއި މިވަގުތު ރާއްޖޭގައި އާ ވޭރިއަންޓެއް އުޅުން ވަރަށް ގާތް ކަމަށް ހެލްތު ޕްރޮޓެކްޝަން އެޖެންސީން ބުނެފި އެވެ.
މިއަދު ރާއްޖެއިން 601 މީހަކު ވަނީ ކޮވިޑް-19 އަށް ޕޮޒިޓިވްވެފަ އެވެ. އަދި 181 މީހަކު އޮތީ ބަލިވެގެން އެނދުމަތިކޮށްފަ އެވެ. މިއީ މިހާތަނަށް އެއް ދުވަހަކު ބަލި ޖެހުނު ރިކޯޑު އަދަދެކެވެ.
އެޗްޕީއޭއިން މިރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޑރ. މުހައްމަދު އަލީ ވިދާޅުވީ ކޮވިޑް ޖެހި ބޮޑުވަރުވަމުންދާ މީހުންގެ އެކްސްރޭއަށް ބަލާއިރު ފުއްޕާ މޭގެ ދެ ފަޅިއަށް ވެސް ވަރަށް ބޮޑަށް އަސަރުކޮށްފައިވާތަން ފެންނަ ކަމަށެވެ.
ބަލިޖެހިފައި ހުރި މީހުންނަށް ބަލާއިރު އަދި ބަލި ފެތުރޭ ގޮތަށް ބަލާއިރު ރާއްޖޭގައި ކޮވިޑް-19 ގެ އާ ވޭރިއަންޓެއް އުޅުން ވަރަށް ގާތް ކަމަށް ޑރ. މުހައްމަދު އަލީ ވިދާޅުވި އެވެ.
ބަލި ޖެހިގެން މިހާރު ވެސް އައިސީޔޫގައި ނުވަ މީހަކު އެބަ އޮތް ކަމަށް ޑރ. މުހައްމަދު ވިދާޅުވި އެވެ. އޭގެ ތެރެއިން ހަ މީހަކު އޮތީ ވެންޓިލޭޓަރަށް ލާފައި ކަމަށް އޭނާ ވިދާޅުވި އެވެ. އަދި ބަލިހާލަތު ވަރަށް ގޯސް މާބަނޑު މީހަކު ވެސް އައިސީޔޫގައި މިވަގުތު އޮތް ކަމަށް ޑޮކްޓަރު ވިދާޅުވި އެވެ.
އަދަދުތަކުން ބަލާއިރު ބަލި ޖެހިގެން އެނދުމަތި ކުރާ މީހުން ބަލިވާ މީހުންނަށްވުރެ މަދު ނަމަވެސް އެއީ ހަގީގަތުގައި އަސްލު މަންޒަރު ނޫން ކަމަށް ޑރ. މުހައްމަދު ވިދާޅުވި އެވެ. އެއީ ކުރިން ބަލި ފެތުރުން ގިނަވިއިރު އެނދުމަތި ކުރާ މީހުންގެ ކްރައިޓީރިއާ އަށްވުރެ މިހާރު އެނދުމަތި ކުރާ މީހުންގެ ކްރައިޓީރިއާ ދަށްކޮށްފައި އޮތުމެވެ.
އެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ކޮވިޝީލްޑް ވެކްސިން ޖެހުން ހުއްޓާލާފައި މި ވަނީ އެ ވެކްސިނުގެ ސްޓޮކް ހުސްވެފައިވާތީ ކަމަށެވެ. މަބްރޫކް ވިދާޅުވީ މިހާރު ކޮވިޝީލްޑް ހުރީ ރާއްޖޭގައި އެންމެ 1700 ޑޯޒް ކަމަށެވެ.
އިތުރަށް ކޮވިޝީލްޑްގެ ސްޓޮކެއް ރާއްޖެ ލިބެންދެން ބާކީ ހުރި 1700 ޑޯޒު ދޭނީ އިމަޖެންސީ ހާލަތްތަކުގައި ކަމަށް އޭނާ މަބްރޫކް އެވެ. ކުރިއަށް އޮތް ދެ ހަފްތާ ތެރޭގައި ކޮވިޝީލްޑްގެ "ކޮންމެވެސް އަދަދެއް" ރާއްޖެ އަންނާނެ ކަމަށް ވެސް އޭނާ ވިދާޅުވި އެވެ. އަދި އަސްޓްރާޒެނެކާ ފަރާތުން ގަންނަ 700،000 ޑޯޒުގެ ފުރަތަމަ ޝިޕްމަންޓު އަންނަ ޖޫން މަހު ލިބޭނެ ކަމަށް ވެސް އޭނާ ވިދާޅުވި އެވެ.
