ރޯމް (މެއި 4) - އަންނަ ސީޒަނުން ފެށިގެން ތިން އަހަރުގެ އެއްބަސްވުމެއްގެ ދަށުން އިޓަލީގެ އޭއެސް ރޯމާގެ ކޯޗުކަމާ ހަވާލުވާން މަޝްހޫރު ކޯޗު ހޯސޭ މޮރީނިއޯ ނިންމައިފި އެވެ.
އުމުރުން 58 އަހަރުގެ މޮރީނިއޯ އެންމެ ފަހުން ހަވާލުވެ ހުރި ޓޮޓެންހަމް ހޮޓްސްޕާސްގެ ކޯޗުކަމުން އޭނާ ވަކިކުރީ މީގެ ދެ ހަފްތާއެއްހާ ދުވަސް ކުރިން މިދިޔަ މަހުގެ 19 ވަނަ ދުވަހު އެވެ. މޮރީނިއޯ ޓޮޓެންހަަމަށް ކޯޗުކޮށްދިނީ 17 މަސް ދުވަހެވެ.
މޮރީނިއޯ މިއަދު ރޯމާއާ ހަވާލުވާން ނިންމިއިރު، މި ވަގުތު އެ ޓީމުގެ ކޯޗަކަށް ހުރި ޕައޮލޯ ފޮންސޭކާ ވަނީ ދެ އަހަރަށް ފަހު މި ސީޒަން ނިމުމުން އެ ޓީމު ދޫކޮށްލަން ނިންމައިފަ އެވެ.
"ކްލަބްގެ ވެރިންނާ މަޝްވަރާ ކުރުމަށް ފަހު އަހަަންނަށް މި ލިބުނު ހުށަހެޅުން ގަބޫލުކުރަން ނިންމި އެންމެ ބޮޑު ސަބަބަކީ ރޯމާގެ ސަޕޯޓަރުން. އަންނަ ސީޒަނުގައި މަސައްކަތްކުރަން އަހަރެން މި ހުރީ ކެތްމަދުވެފައި،" ޖުލައި 1 ދުވަހުން ފެށިގެން ރޯމާއާ ހަވާލުވާން ނިންމި މޮރީނިއޯ ބުންޏެވެ.
ރޯމާ މި ވަގުތު އޮތީ އިޓާލިއަން ލީގުގެ ހަތް ވަނައިގަ އެވެ. ޔޫރޮޕާ ލީގުގެ ސެމީ ފައިނަލް ފުރަތަމަ ލެގުން މިދިޔަ ހަފްތާގައި މެންޗެސްޓާ ޔުނައިޓެޑް އަތުން ވަނީ 6-2 އިން ބަލިވެފަ އެވެ. މި ބުރާސްފަތި ދުވަހުގެރޭ ދެ ވަނަ ލެގު ރޯމްގައި ކުޅޭނެ އެވެ.
މިއީ މޮރީނިއޯ އޭނާގެ ކޯޗިން ކެރިއަރުގައި އިޓަލީގެ ޓީމަކާ ހަވާލުވާ ދެ ވަނަ ފަހަރެވެ. މީގެ ކުރިން މޮރީނިއޯ ވަނީ 2008 އިން 2010 އަށް އިންޓަ މިލާނަށް ކޯޗުކޮށްދީފަ އެވެ. އެ ޓީމާ އެކު މޮރީނިއޯ ވަނީ އިޓާލިއަން ލީގު ދެ ފަހަރު، އިޓާލިއަން ކަޕާއި އިޓާލިއަން ސުޕަ ކަޕް އަދި ޗެމްޕިއަންސް ލީގު އެއް ފަހަރު ކާމިޔާބުކޮށްފަ އެވެ.
މޮރީނިއޯ އެންމެ ފަހުން ހަވާލުވެ ހުރި ތިން ޓީމުން ވެސް އޭނާ ވަކިކުރީ ސީޒަނެއްގެ މެދުތެރެއިންނެވެ. އެއީ ޓޮޓެންހަމްގެ އިތުރުން މެންޗެސްޓާ ޔުނައިޓެޑާއި ޗެލްސީންނެވެ.
ޖެހިލުންކުޑަ ކޯޗެއްގެ ގޮތުގައި ފާހަގަކުރެވޭ މޮރީނިއޯ ވަނީ ކޯޗިން ކެރިއަރުގައި މިހާތަނަށް 25 ތަށި އުފުލާލައިފަ އެވެ. އޭނާ އެންމެ ފުރަތަމަ ފާހަަގަކުރެވުނީ ޕޯޗުގަލްގެ ޕޯޓޯގެ ކޯޗެއްގެ ގޮތުގަ އެވެ. އެ ޓީމަށް 2004 ގެ ޗެމްޕިއަންސް ލީގު ކާމިޔާބު ކޮށްދިނެވެ. ފަހުން މޮރީނިއޯ ވަނީ ތިން ގައުމެއްގައި ލީގު ޗެމްޕިއަންކަން ހޯދި މަދު ކޯޗުންގެ ތެރޭގައި ހިމެނިފަ އެވެ. އޭނާ ސްޕެނިޝް ލީގުގެ ތަށި އުފުލާލީ ރެއާލްގައި ހުރެ އެވެ.
