މާލެ ސަރަހައްދުގައި ކޮވިޝީލްޑް ވެކްސިން ދިނުން ހުއްޓާލާފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު ބުނެފި އެވެ.
ކޮވިޝީލްޑް ވެކްސިން ހުސްވެފައިވާކަމަށް އަޑުތައް ފެތުރިފައިވަނިކޮށް، އެޗްޕީއޭ އިން ބުނީ މާލެ ސަރަހައްދުގައި ކޮވިޝީލްޑް ވެކްސިން ދިނުން ހުއްޓާލާފައިވަނީ ވަގުތީ ގޮތުން ކަމަށެވެ.
"އަލުން ޖަހަން ފެށޭނެ ތާރީހެއް ފަހުން އިއުލާން ކުރެވޭނެ،" އެޗްޕީއޭއިން ބުންޏެވެ.
ނަމަވެސް، ރާއްޖޭގައި އެންމެ ފުރަތަމަ ދޭން ފެށި، އަދި އެންމެ ގިނަ ބަޔަކު ފުރަތަމަ ޑޯޒް ޖެހި ކޮވިޝީލްޑް ވެކްސިން ހުއްޓާލި ސީދާ ސަބަބެއް އެޗްޕީއޭ އިން އަދި ނުބުނެ އެވެ. ކޮވިޑުން އަރައިގަތުމަށް މިދިޔަ ފެބުރުއަރީ މަހު ރާއްޖޭގައި ވެކްސިނޭޝަން ޕްރޮގްރާމް ފަށައި މާލެ އާއި އަތޮޅުތަކުގައި ވެސް މިހާރު ވަނީ ދެ ވަނަ ޑޯޒު ޖަހަން ފަށައިފަ އެވެ.
އިންޑިއާ އާއި ޗައިނާ އަދި އެހެން ގައުމުތަކުން ހަދިޔާކުރި ވެކްސިން ރާއްޖޭގައި ދެމުން އަންނައިރު، ވެކްސިންގެ ދަތިކަން ކުރިމަތިވެ މެދުނުކެނޑި ވެކްސިން ޕްރޮގްރާމް ކުރިއަށް ނުގެންދެވޭނެ ކަމުގެ އަޑު ވަނީ ގަދަވެފަ އެވެ.
ނަމަވެސް، ދެ ވަނަ ޑޯޒުގައި މެދުކެނޑުމެއް ނެތި ދެވޭވަރަށް ރާއްޖޭގައި ވެކްސިން އެބަހުރި ކަމުގެ ޔަގީންކަން ހެލްތު މިނިސްޓަރު އަހުމަދު ނަސީމް ދާދި ފަހުން ވަނީ ދެއްވައިފަ އެވެ.
އަދި ސިންގަޕޫރުގެ އެސްޓްރާޒެނެކާ ކުންފުނިން ގަންނަ 700،000 ޑޯޒް ވެސް އަންނަ މަހު ލިބެން ފަށާނެ ކަމަށް ވިދާޅުވެފައިވެ އެވެ.
ރާއްޖެ އިން ވަނީ މި ފަހުން ކޮވިޝީލްޑުގެ 300،000 ޑޯޒު އިންޑިއާއިން ގަތުމަށް ފައިސާ ދައްކައިފަ އެވެ. އޭގެތެރެއިން މިހާތަނަށް ލިބުނީ 100،000 ޑޯޒެވެ. ރާއްޖެ އިން ވެކްސިން ޕްރޮގްރާމް ފެށީ އިންޑިއާ އިން ހަދިޔާކުރި ވެކްސިނުންނެވެ.
މާލޭގައި ކޮވިޝީލްޑް ވެކްސިން ޖެހުން ހުއްޓާލާފައިވާއިރު، ފަހަކަށް އައިސް އެ ވެކްސިން ދެމުން އައިސްފައިވަނީ ހަމައެކަނި މިދިޔަ ފެބްރުއަރީ މަހު ފުރަތަމަ ޑޯޒް ޖެހި މީހުންނަށެވެ.
ކޮވިޝީލްޑްގެ ފުރަތަމަ ޑޯޒް ޖެހުމަށްފަހު، އަށް ހަފްތާގެ ތެރޭގައި ދެ ވަނަ ޑޯޒް ފުރިހަމަ ކުރަންޖެހޭކަމަށް ވަނީ ބުނެފަ އެވެ. އަދި އެއަށްވުރެ ފަސްވެއްޖެނަމަ އަނެއްކާވެސް ދެ ޑޯޒް ޖަހަންޖެހޭނެ ކަމަށް ވެސް ޑޮކްޓަރުން ލަފާ ދެއްވަ އެވެ.
ނަމަވެސް، ފެބްރުއަރީ މަހު ފުރަތަމަ ޑޯޒް ޖެހި ހުރިހާ މީހުން އަދި ދެވަނަ ޑޯޒް ޖަހާފައިނުވާއިރު، ވެކްސިން ދިނުން ހުއްޓާލުމުން، ވެކްސިން ފުރިހަމަ ކުރަންޖެހޭ މުއްދަތު ފާއިތުވާ މީހުންނަށް ހަމަޖައްސާފައި އޮތް އިންތިޒާމެއް އަދި އެޗްޕީއޭއިން ސާފުކޮށްދީފައެއް ނުވެ އެވެ.
އިއްޔެއާ ހަމައަށް ރާއްޖޭގައި 297،639 މީހުން ފުރަތަމަ ޑޯޒް ޖަހާފައިވާއިރު، 108،494 މީހުން ވަނީ ވެކްސިން ފުރިހަމަކޮށްފަ އެވެ.
