ހުޅުމާލޭގެ ދެ ވަނަ ފިޔަވަހީގައި އިމާރާތްކޮށްފައިވާ ހިޔާ މަޝްރޫއުގެ ފްލެޓްތަކުގެ ގުރުއަތުލުން ވަގުތީ ގޮތުން މެދުކަނޑާލަން ނިންމާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ބުނެފި އެވެ.
އެޗްޑީސީން ބުނީ ހައުސިން މިނިސްޓްރީން މިހާތަނަށް ފޮނުވި ލިސްޓުތަކުގެ ގުރު އެޕްރީލް، 25 އިން އިއްޔެގެ ނިޔަލަށް ނިންމާފައިވާ ކަމަށެވެ. ދެން ގުރު ނަގަން ޖެހޭ ކެޓަރީތަކުގައި ވެސް ހާއްސަ އެހީއަށް ބޭނުންވާ ފަރާތްތަކެއް ތިބުމާއި އެހެން ކެޓަގަރީތަކުގައި ހިމެނޭ ފަރާތްތަކުގެ ފައިނަލް މި ކޯޕަރޭޝަނަށް ލިބުމުން އެ ފަރާތްތަކުގެ މެދުގައި ގުރު ނަގާނެ ތާރީހެއް ފަހުން އިއުލާން ކުރާނެ ކަމަށް އެޗްޑީސީން ބުންޏެވެ.
ހިޔާ މަޝްރޫއުގައި ފްލެޓް ދޫކުރަން ނިންމި ކެޓަގަރީތަކުގެ ތެރެއިން ހާއްސަ އެހީއަށް ބޭނުންވާ މީހުންގެ ކެޓަގަރީގެ ގުރުއަތު ނެގީ އޭޕްރީލް 8ގަ އެވެ. އަދި ހައުސިން މިނިސްޓްރީން ފޮނުވާފައިވާ އެހެނިހެން ކެޓަގަރީތަކުގެ ގުރުއަތު ވަނީ އޭޕްރީލް 25 އިން މެއި 4 އަށް ނާގާފައި ކަމަށް އެޗްޑީސީ އިން ބުންޏެވެ.
ޔެސް ޓީވީ މެދުވެރިކޮށް ލައިވްކޮށް ގުރުއަތު ނަގާއިރު އެ މީހަކަށް ފްލެޓް ލިބޭ ފްލޯ އާއި ޓަވަރު އެނގޭ ގޮތަށް ޓީވީ ސްކްރީނުން ދައްކަ އެވެ. އަދި އެސްއެމްއެސް މެދުވެރިކޮށް ފްލެޓްގެ ވެރި ފަރާތަށް އެ މައުލޫމާތު ދޭނެ ކަމަށް އެޗްޑީސީން ބުންޏެވެ.
މި ފްލެޓްތަކަށް ވަދެވޭނީ ފިނިޝިން ނިންމައި ގާތްގަނޑަކަށް ތިން މަސް ދުވަހުގެ ތެރޭގަ އެވެ. އެ މުއްދަތުގައި ކުލި ނުނަގާނެ ކަމަށް އެޗްޑީސީން ވަނީ ބުނެފަ އެވެ.
