މެޑްރިޑް (މެއި 4) - ސްޕެނިޝް ލީގުގައި ރޭ އެތުލެޓިކް ބިލްބާއޯ އަތުން ފަހު ވަގުތު 1-0 އިން ބަލިވެ، ލީގުގެ ރޭހުގައި ސެވިއްޔާ އަށް އުނދަގޫތަކެއް ކުރިމަތިވީ ނަމަވެސް އާދިއްތަ ދުވަހުގެރޭ އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ސެވިއްޔާ ނުކުންނާނީ އިސް އުފުލައިގެން ކަމަށް އެ ޓީމުގެ ކޯޗު ހޫލިއަން ލޮޕެޓެގީ ބުނެފި އެވެ.
ރޭގެ ނަތީޖާ އަށް ފަހު ސެވިއްޔާ ލީގުގެ ހަތަރު ވަނައިގައި އޮތީ 34 މެޗުން 70 ޕޮއިންޓާ އެކު އެވެ. އެއް ވަނައިގައި އޮތް އެތުލެޓިކޯ މެޑްރިޑަށް 34 މެޗުން 76 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލާއި ތިން ވަނައިގައި އޮތް ބާސެލޯނާ އަށް ވަނީ 34 މެޗުން 74 ޕޮއިންޓް ލިބިފަ އެވެ.
ސެވިއްޔާގެ ފަރާތުން ރަނގަޅު ކުޅުމެއް ފެނުނު ނަމަވެސް ލަނޑެއް ޖަހަން އެ ޓީމުން ކުރި އެއްވެސް މަސައްކަތެއް ކާމިޔާބެއްނުވި އެވެ. ބިލްބާއޯ މޮޅުވި ގޯލު ޖެހީ އިތުރު ވަގުތުގައި އިނާކީ ވިލިއަމްސް އެވެ.
ލޮޕެޓެގީ ބުނީ އޭނާގެ އެންމެ ބޮޑު ހިތްހަމަނުޖެހުމަކީ ދެ ވަނަ ހާފުގައި ސެވިއްޔާ އަށް ލިބެންޖެހޭ ޕެނަލްޓީ އެއް ދޭން ރެފްރީ ދެކޮޅު ހެދުމެވެ. ބިލްބާއޯގެ މިކޭލް ބަލަންޒިއޭގާ އަތުގައި އޭރިއާތެރެއިން ބޯޅަ ޖެހުމުން ރެފްރީ ނިންމީ އެއީ ހޭންޑްބޯލް އެއް ނޫން ކަމަށެވެ.
"އަހަރެމެން އެބަހުރި ވަރަށް މަދު ފުރުސަތު ތަނަވަސްކޮށްފައި ވެސް މެޗުތަކުން މޮޅުވެފައި. ވަރަށް ގިނަ ފުރުސަތު ލިބިފައި ގޯލު ނުޖެހިގެން ވެސް އެބަހުރި ނަތީޖާ އަށް އަސަރުކޮށްފައި. މި މެޗަކީ ނަސީބު ވެސް ނެތް ދުވަހެއް،" ލޮޕެޓެގީ ބުންޏެވެ.
ލީގުގައި މި ހަފްތާ ބަންދުގައި ހުރި މެޗުތަކަކީ ލީގުގެ ރޭހުގައި މުހިއްމު މެޗުތަކެކެވެ. އެއް ވަނައިގައި އޮތް އެތުލެޓިކޯ ރަށުންބޭރުގައި ކުޅޭނީ ތިން ވަނައިގައި އޮތް ބާސެލޯނާއާ އެވެ. އަދި ދެ ވަނައިގައި އޮތް ރެއާލް އަމިއްލަ ދަނޑުގައި ހަތަރެއްގައި އޮތް ސެވިއްޔާއާ ބައްދަލުކުރާނެ އެވެ.
"އަހަރެމެން ރެއާލާ ކުޅެން ޖެހޭ މެޗަށް ދާނީ އިސް އުފުލައިގެން. ޕްރެޝަރު މެޗުތަކުގައި ކުޅުމަކީ ސެވިއްޔާ އަށް އާ ކަމެއް ނޫން،" ރެއާލްގެ ކޯޗުކަމުގައި މަދު ދުވަސް ކޮޅެއް ހޭދަކުރި ލޮޕެޓެގީ ބުންޏެވެ.
ރަޝިއާގައި 2018 ވަނަ އަހަރު ބޭއްވި ފީފާ ވޯލްޑް ކަޕް ފެށެން ކުޑަ ދުވަސްކޮޅަކަށް ވެފައި ވަނިކޮށް ލޮޕެޓެގީ ސްޕެއިނުގެ ކޯޗުކަމުން ވަކިކުރީ ރެއާލާ ހަވާލުވާން އޭނާ އެއްބަސްވުމުންނެވެ. ރެއާލް ކޯޗުކަމުން ތިން މަސް ދުވަސްތެރޭ ލޮޕެޓެގީ ވަނީ ވަކިކޮށްފަ އެވެ. ރެއާލުން އަލުން އެ ޓީމުގެ ކޯޗަކަށް ޒިނެދިން ޒިދާން ހަމަޖެއްސުމުގެ ކުރިން ސަންޓިއާގޯ ސޮލާރީ ވެސް ވަނީ އެ ޓީމުގެ ކޯޗުގެ ޒިންމާ އަދާކޮށްފަ އެވެ.
