އިންޑިއާ އާއި އިނގިރޭސި ވިލާތުން ޕްރައިވެޓް ސެކްޓާ އިންވެސްޓްމަންޓަށް 1.4 ބިލިއަން ޑޮލަރު ހޭދަކުރަން ނިންމާ، މިނިވަން ވިޔަފާރީގެ އެއްބަސްވުމެއް އެކުލަވާލަން ތައްޔާރުވެއްޖެ އެވެ.
މިކަން އިއުލާނު ކުރިއިރު ދެ ގައުމުގެ ބޮޑު ވަޒީރުން، ނަރެންދްރަ މޯދީ އާއި ބޮރިސް ޖޯންސަންއާ ދެމެދު މިއަދު ވާޗުއަލް ބައްދަލުވުމެއް އޮންނާނެ އެވެ.
މީގެ ކުރިން ނިންމާފައި އޮތީ ބޮރިސް ޖޯންސަން ރަސްމީ ދަތުރުފުޅެއްގައި އިންޑިއާއަށް ވަޑައިގަންނަވާ ގޮތަށެވެ. ނަމަވެސް ކޮވިޑާ ގުޅިގެން އެ ދަތުރު ވަނީ ދެ ފަހަރެއްގެ މަތިން ފަސްކޮށްފަ އެވެ.
އިނގިރޭސި ވިލާތުން ޔޫރަޕިއަން ޔޫނިއަން (އީޔޫ) އާ ވަކިވުމަށް ފަހު މިހާރު މަސައްކަތް ކުރަމުން ދަނީ ވިޔަފާރީގެ ބައިވެން ހޯދުމަށެވެ. އެގޮތުން އިންޑިއާގެ ގިނަ އަމިއްލަ ކުންފުނިތަކަށް ފުރުސަތުތައް ފަހިވާނެ ކަމަށް ބެލެވެ އެވެ.
މިއަދު އިއުލާނު ކުރީ ޖުމްލަ 739.2 މިލިއަން ޑޮލަރުގެ އިންޑިއާގެ އިންވެސްޓްމަންޓް އިނގިރޭސި ވިލާތަށް އަންނާނެ ކަމަށެވެ. އޭގެ ތެރޭގައި ދުނިޔޭގެ އެންމެ ބޮޑު ވެކްސިން އުފައްދާ ކުންފުނި، އިންޑިއާގެ ސިރަމް އިންސްޓިޓިއުޓުން އިންވެސްޓު ކުރާ 332.8 މިލިއަން ޑޮލަރު ހިމެނެ އެވެ.
އިނގިރޭސި ވިލާތުގެ އަމިއްލަ ކުންފުނިތަކަށް ވެސް 618.5 މިލިއަން ޑޮލަރުގެ އެކްސްޕޯޓް ވިޔަފާރި އިންޑިއާ އާއެކު ކުރެވޭނެ އެވެ. އިނގިރޭސި ވިލާތުން އަންދާޒާ ކުރާ ގޮތުގައި މި ނިންމުންތަކުގެ ސަބަބުން އެ ގައުމުގައި 6،500 އަށް ވުރެ ގިނަ ވަޒީފާ އުފެދޭނެ އެވެ.
