އިންޑިއާގައި ކޮވިޑް ޖެހުނު މީހުންގެ ޖުމްލަ އަދަދު 20 މިލިއަނަށް ވުރެ މަތިވި ކަމަށް ތަފާސްހިސާބުން ދެއްކި ނަމަވެސް، ބަލި ފެތުރުން ކުޑަވެއްޖެ ކަމަށް އެ ގައުމުގެ ސަރުކާރުން ބުނެފި އެވެ.
ބޮޑު ވަޒީރު ނަރެންދްރަ މޯދީގެ ސަރުކާރުން ބުނީ އޭޕްރިލް 30 ވަނަ ދުވަހުން ފެށިގެން ކޭސްތައް މަދުވެއްޖެ ކަމަށެވެ. އެ ދުވަހު ހަތަރު ލައްކައަށް ވުރެ ގިނަ ކޭސް ފެނުނެވެ. މިއަދު ފެނިފައިވަނީ 355،832 ކޭސް އެވެ.
ނަމަވެސް ތަޖުރިބާކާރުން ބުނީ ކޭސްތަކުގެ އަދަދާއި މަރުވާ މީހުންގެ އަދަދުތައް ރަސްމީކޮށް ރަނގަޅަށް ނުބެލެހެއްޓޭ ކަމަށެވެ. އެހެންކަމުން އަސްލު އަދަދުތައް އެއަށް ވުރެ މާ މަތިވާނެ ކަމަށް ބެލެވެ އެވެ.
ވެރިރަށް ނިއު ދިއްލީއަށް ދިމާވެފައިވާ އޮކްސިޖަނުގެ ދަތިކަން ހައްލުވުމުގެ ނިޝާނެއް އަދިވެސް ނުފެނެ އެވެ. މީހުންތައް އުޅެނީ ފަރުވާ ދެވޭނެ ގޮތެއް ނެތިގެންނެވެ.
އެ ސިޓީގައި އިއްޔެ 448 މީހުން މަރުވި އެވެ. އެއީ އަނެއްކާވެސް ދިއްލީއަށް ރިކޯޑް އަދަދެކެވެ.
ދިއްލީގެ ސަރުކާރުން ބުނީ ކޮވިޑަށް ފަރުވާ ދޭ ފެސިލިޓީތަކާއި އައިސީޔޫ ފަރުވާ ދޭން ތަންތަން ސިފައިންގެ ބެލުމުގެ ދަށުން ހިންގަން ބޭނުންވާ ކަމަށެވެ.
ދިއްލީގެ ޗީފް މިނިސްޓަރު އަރްވިންދް ކެޖްރިވާލް ވިދާޅުވީ ސްޓޭޓުތަކަށް އޮކްސިޖަން ފޮނުވާނެ މިންވަރު ކަނޑައަޅަނީ މައި ސަރުކާރުން ކަމަށެވެ. އަދި ދިއްލީއަށް ފޯރުކޮށްދެނީ ބޭނުންވާ މިންވަރަށް ވުރެ މާ މަދުން ކަމަށް އޭނާ ވިދާޅުވި އެވެ.
ނަމަވެސް މައި ސަރުކާރުގެ އޮފިޝަލުން ވަނީ އޮކްސިޖަނުގެ ދަތިކަން އޮތް ކަމަށް ބުނާ ވާހަކަ ދޮގުކޮށްފަ އެވެ. އެ މީހުން ބުނަނީ އޮކްސިޖަން އެބަ ހުރި ކަމަށާއި ނަމަވެސް ސްޓޭޓްތަކަށް އެ ސަޕްލައި ކުރަން ދަތި ކަމަށެވެ.
އިންޑިއާގައި ކޮންމެ ދުވަހަކު ވެސް އެތައް ހާސް ޓަނުގެ އޮކްސިޖަން އުފައްދަ އެވެ. އެކަމަކު އެ ސަޕްލައި ކުރާނެ ޑިސްޓްރިބިއުޝަން ނެޓްވޯކުތަކަށް އެކަށީގެންވާ ވަރަށް އިންވެސްޓުކޮށްފައެއް ނުވެ އެވެ.
