ގާނޫނޫއަސާސީން ކަށަވަރުކޮށްދީފައިވާ ނޫސްވެރިކަމުގެ މިނިވަންކަމުގެ ހައްގާއި މައުލޫމާތު ހޯދައި ލިބިގަތުމުގެ ހައްގަކީ ވަކިނުކުރެވޭ ވަރަށް ގުޅި ލާމެހިފައިވާ ދެ ހައްގު ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިއަދު ފާހަގަކުރާ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ރައީސް ފޮނުއްވި ހިތާބުގައި ވިދާޅުވީ މި ސަރުކާރު ހަވާލުވިފަހުން ނޫސްވެރިންނަށް މިނިވަން މާހައުލެއް ގާއިމުކޮށްދެވިފައިވާ ކަމަށެވެ.
މިގޮތުން، ބައިނަލްއަގުވާމީ ނޫސްވެރިކަމުގެ މިނިވަންކަމުގެ މިންގަނޑުން މި ސަރުކާރު އައިރު ރާއްޖެ އޮތީ 120 ވަނައިގައި ކަމަށާއި، ނަމަވެސް، މިހާރު 72 ވަނައަށް ކުރިއަރައިފައިވާކަން އެ ހިތާބުގައި ރައީސް ފާހަގަކުރެއްވި އެވެ.
ރައީސް އިތުރަށް ވިދާޅުވީ ދައުލަތުގެ އެއްވެސް މުއައްސަސާއަކުން، ނޫސްވެރިކަމުގެ މިނިވަންކަމަށް އެއްވެސް މިންވަރަކަށް ހުރަސް އެޅުމަކީ، ސަރުކާރުގެ ސިޔާސަތެއް ނޫން ކަމަށެވެ.
ނަމަވެސް، ނޫސްވެރިކަމުގެ މިނިވަންކަމުގެ ހައްގުގެ ބޭނުން ފުރިހަމަ ގޮތުގައި ހިފޭނީ، ގާނޫނުގައިވާ ގޮތުގެ މަތިން މައުލޫމާތު ހާމަކުރުމަށް، ދައުލަތުގެ މުއައްސަސާތަކުން މިހާރަށްވުރެ ބޮޑަށް އިސްކަން ދީގެންކަން އެމަނިކުފާނު ފާހަގަކުރެއްވި އެވެ.
މިދިޔަ މަހު ރައީސް ސޯލިހު ނޫސްވެރިންނަށް މައުލޫމާތު ދެއްވަނީ. -ފޮޓޯ: ރައީސް އޮފީސް
ނޫސްވެރިން އަދާކުރި ދައުރުން މި ތިން އަހަރުގެ ތެރޭގައި ސަރުކާރަށް ލިބުނު ފައިދާ ބޮޑުކަމަށް ރައީސް ވިދާޅުވި އެވެ.
މިގޮތުން، ދައުލަތް ހިންގުމުގެ ތެރޭގައި ހުރި ނުރަނގަޅު އެތައް ކަމެއް އާއްމު ރައްޔިތުންނާ ހަމައަށް ތިލަކުރުމުގެ ސަބަބުން، އެކަންކަން އިސްލާހު ކުރުމުގެ ފުރުސަތު ތަނަވަސްވެ، ދައުލަތުގެ މުވައްޒަފުން އަމިއްލައަށް ޒިންމާދާރުވުމަށް ލިބުނު ވަރަށް ބޮޑު ބާރަކަށްވިކަމަށް އެމަނިކުފާނު ވިދާޅުވި އެވެ.
ނަމަވެސް، ނޫސްވެރިކަމުގެ މިނިވަންކަމަކާ ގުޅިފައިވާ ޒިންމާތަކަކާއި މަސްއޫލިއްޔަތުތަކެއް ވާކަން ރައީސް ވަނީ ނޫސްވެރިން އަބަދުވެސް ހަނދާނުގައި ބަހައްޓަން އިލްތިމާސްކުރައްވައިފަ އެވެ.
މިގޮތުން، ނޫސްވެރިއެއްގެ ހައިސިއްޔަތުން ލިބިފައިވާ މިނިވަންކަމުގެ ބޭނުން ހިފާއިރު، އަނެކުންނަށް ލިބިގެންވާ އަބުރު ރައްކާތެރިކުރުމުގެ ހައްގަށް ހުރުމަތްތެރިވާންޖެހޭކަމަށް އެމަނިކުފާނު ފާހަގަކުރެއްވި އެވެ.
"އެ ޒިންމާ އަދާކުރުމަކީ، މީސްމީހުންނާ ބެހޭގޮތުން، ހަގީގަތެއް ނެތް ވާހަކަތައް ނުފެތުރުމާއި، ޔޯލަ ވާހަކަ ފެތުރުން ހުއްޓައިލުމެވެ،" އެ ހިތާބުގައިވެ އެވެ.
އޭގެ ބަދަލުގައި ތަހުލީލީ ނޫސްވެރިކަމުގެ ޒަރީއާއިން، ކޮންމެ ކަމެއްގެވެސް ހަގީގަތާ ހަމައަށް ފީނައި، ކަން އޮތް ގޮތް ރައްޔިތުންނަށް ހާމަކޮށްދިނުމަށް ރައީސް ނޫސްވެރިންގެ ކިބައިން އެދިވަޑައިގެންނެވި އެވެ.
އަދި ނޫސްވެރިކަމަކީވެސް ގައުމީ ހިދުމަތެއް ކަމުގައި ދެކިގެން، ގައުމު ބިނާކުރުމުގެ ރޫހުގައި ހުރިހާ ނޫސްވެރިންވެސް މަސައްކަތް ކުރާނެކަމަށް އުއްމީދުކުރައްވާ ކަމަށް ރައީސް ވިދާޅުވި އެވެ.
