މެޑްރިޑް (މެއި 1) - ސްޕެނިޝް ލީގުގައި މިރޭ އެތުލެޓިކޯ މެޑްރިޑުން ރަށުންބޭރުގައި 1-0 އިން އެލްޗޭ ބަލިކޮށް އެއް ވަނައިގައި މަގާމް ދެމެހެއްޓިއިރު، ރެއާލް މެޑްރިޑުން އޮސަސޫނާގެ މައްޗަށް 2-0 އިން ކުރިހޯދައި ލީގު ޗެމްޕިއަންކަން ހޯދުމުގެ ރޭހުގައި މުހިއްމު މޮޅެއް ހޯދައިފި އެވެ.
އެތުލެޓިކޯ އެއް ވަނައިގައި ދެ ޕޮއިންޓުގެ ލީޑަކާ އެކު އޮތީ 34 މެޗުން 76 ޕޮއިންޓާ އެކު އެވެ. ރެއާލް ދެ ވަނައިގައި އޮތީ 34 މެޗުން 74 ޕޮއިންޓާ އެކު އެވެ. ތިން ވަަނައިގައި ބާސެލޯނާ އޮތީ 33 މެޗުން 71 ޕޮއިންޓް ހޯދައިގެންނެވެ. ހަތަރެއްގައި އޮތް ސެވިއްޔާ އަށް ވަނީ 33 މެޗުން 70 ޕޮއިންޓް ލިބިފަ އެވެ.
އެލްޗޭ ދަނޑުގައި ކުޅުނު މެޗުގައި އެތުލެޓިކޯގެ ލުއިސް ސުއަރޭޒް ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އެތުލެޓިކޯގެ ހަމައެކަނި ގޯލު މެޗުގެ 23 ވަނަ މިނިޓްގައި ޖެހީ ކުރިން ރެއާލަށް ކުޅުނު މާކޯސް ލޮރެންޓޭ އެވެ. އޭނާ މި ގޯލު ޖެހީ ޔަނިކް ކަރާސްކޯ ދިން ބޯޅައަކުންނެވެ. މެޗުގެ އިތުރު ވަގުތުގައި އެލްޗޭ އަށް ނަތީޖާ ހަމަހަމަކުރަން ރަނުގެ ފުރުސަތެއް ލިބުނެވެ. ލޮރެންޓޭ ދިން ޕެނަލްޓީ އަކުން އެލްޗޭގެ ފިޑެލް ޗާވޭސް ފޮނުވާލި ބޯޅަ ބޭރުވީ ގޯލުގެ ދަނޑީގައި ޖެހިފަ އެވެ.
މި މެޗާ އެކު އެތުލެޓިކޯގެ ކޯޗު ޑިއޭގޯ ސިމިއޯނީ ވަނީ ލަލީގާގައި އެންމެ ގިނަ މެޗުގައި ކޯޗުކޮށްދިން އާޖެންޓީނާގެ ކޯޗުގެ ޝަރަފް ހޯދައިފަ އެވެ. މިއީ ސިމިއޯނީ ލީގުގައި ކޯޗުކޮށްދިން 360 ވަނަ މެޗެވެ.
ޖެނުއަރީ މަހުގެ ފަހުން ރެއާލްގެ ފުރަތަމަ އެގާރައިގައި ހިމެނިގެން އެޑެން ހަޒާޑް ކުޅުނު ފުރަތަމަ މެޗުގައި އޭނާ ވަނީ ލަނޑެއް ޖެހުމާ ގާތަށް ޖެހިލައިފަ އެވެ. އޭނަ ފޮނުވާލި ބޯޅަ އޮސަސޫނާ ކީޕަރު ސާޖިއޯ ހެރޭރާ ވަނީ މަތަކޮށްފަ އެވެ.
ރެއާލުން ދެ ގޯލު ވެސް ޖެހީ ދެ ވަނަ ހާފުގަ އެވެ. މެޗުގެ 76 ވަނަ މިނިޓްގައި އިސްކޯ ނެގި ކޯނަރަކުން ރެއާލަށް ލީޑުނަގައިދިނީ ފަހަކަށް އައިސް ރެއާލް ފަހަތުގައި މޮޅު ކުޅުމެއް ދައްކަމުން އަންނަ ބްރެޒިލްގެ ޑިފެންޑަރު އެޑާ މިލިޓާއޯ އެވެ. އޭގެ ހަތަރު މިނިޓް ފަހުން ކަރިމް ބެންޒެމާ ދިން ބޯޅައަކުން ކަސެމީރޯ ވަނީ ރެއާލަށް ދެ ވަނަ ގޯލެއް ޖަހައިދީފަ އެވެ.
ލީގުގައި މާދަމާރޭ ވެލެންސިއާގެ މައްޗަށް ކުރިހޯދައިގެން ބާސެލޯނާ އަށް ރެއާލާ ޕޮއިންޓުގެ ގޮތުން އެއްވަރުކުރެވޭނެ އެވެ.
