އިންޑިއާގައި 24 ގަޑިއިރު ތެރޭގައި ކޮވިޑް ޖެހުނު މީހުންގެ އަދަދު ހަތަރު ލައްކައާ ގާތްކޮށްފައި ވަނިކޮށް ގިނަ ސްޓޭޓުތަކުން ވެކްސިން ހުސްވެއްޖެ އެވެ.
ސްޓޭޓުތަކުން ވެކްސިން ހުސްވީ، ކޮވިޑާ ދެކޮޅަށް ވެކްސިން ޖެހުމުގެ ޕްރޮގްރާމް މާދަމާ ފުޅާކުރަން ރާވާފައި ވަނިކޮށެވެ. ސަރުކާރުން ބުނެފައި ވަނީ އުމުރުން 18 އަހަރުގެ އެންމެންނަށް މާދަމާއިން ފެށިގެން ވެކްސިން ދޭނެ ކަމަށެވެ.
ނަމަވެސް އެންމެ ބޮޑަށް އަސަރުކޮށްފައިވާ މަހަރާޝްތްރަ، ކަރްނާޓަކާ، މަދްޔަ ޕްރަދޭޝް އަދި ދިއްލީ އިން ވެކްސިން ހުސްވެފައި ވާއިރު، މާދަމާ އިތުރު ސަޕްލައި ލިބޭނެ ކަމުގެ އެއްވެސް ޔަގީންކަމެއް ނެތެވެ.
މުމްބާއީއިން ވެސް ނިންމީ ވެކްސިން ހުސްވުމުގެ ސަބަބުން މިއަދުން ފެށިގެން ކުރިއަށް އޮތް ތިން ދުވަހަށް ވެކްސިން ދޭ މަރުކަޒުތައް ބަންދު ކުރާށެވެ.
އެންޑީޓީވީން ރިޕޯޓުކުރި ގޮތުގައި ބުރާސްފަތި ދުވަހު މުޅި އިންޑިއާގައި ވެކްސިން ޖެހީ އެންމެ 2.2 މިލިއަން މީހުންނެވެ. އެއީ ވެކްސިން ޕްރޮގްރާމް ފެށި ފަހުން އެއް ދުވަހެއްގައި އެންމެ މަދު އަދަދެއްގެ މީހުން ވެކްސިން ޖެހި ދުވަހެވެ.
މިހާތަނަށް ވެކްސިން ޖަހާފައިވަނީ އިންޑިއާގެ އާބާދީގެ 1.35 ބިލިއަން މީހުންގެ ތެރެއިން އެންމެ 10 ޕަސެންޓު މީހުންނެވެ.
ދެކުނު ކަރްނާޓަކާ ސްޓޭޓުން ބުނީ ވެކްސިން ސަޕްލައި ލިބޭނެ ވަގުތެއްގެ މައުލޫމާތު ނޭނގޭ ކަމަށާއި އެހެންކަމުން މާދަމާ ވެކްސިން ނުދެވޭނެ ކަމަށެވެ.
އިންޑިއާއަކީ ދުނިޔޭގައި އެންމެ ގިނައިން ވެކްސިން އުފައްދާ ގައުމު ނަމަވެސް އެމެރިކާއިން ބައެއް ތަކެތި އެކްސްޕޯޓް ކުރުން މަނާ ކުރުމާއެކު މިދިޔަ ފެބްރުއަރީ މަހުން ފެށިގެން ކޮވިޑް ވެކްސިން އުފެއްދުމަށް ވަނީ އަސަރުކޮށްފަ އެވެ.
ވެކްސިން ޕްރޮގްރާމް ފުޅާކުރުމުގެ މަސައްކަތަށް ބުރޫ އަރާފައި ވާއިރު، ކޭސްތައް ދަނީ އަދިވެސް ހިފެހެއްޓުމެއް ނެތި އިތުރުވަމުންނެވެ. އެގޮތުން ފާއިތުވި 24 ގަޑިއިރު ތެރޭގައި 386،452 މީހުން ޕޮޒިޓިވްވެ، 3،498 މީހުން މަރުވި އެވެ.
