މެންޗެސްޓާ (އޭޕްރީލް 30) - ޔުއެފާ ޔޫރޮޕާ ލީގުގެ ސެމީ ފައިނަލްގެ ފުރަތަމަ ލެގުގައި މިރޭ ވިޔަރެއާލުން 2-1 އިން އާސެނަލް ބަލިކުރިއިރު، އަމިއްލަ ދަނޑުގައި 6-2 އިން ރޯމާ ބަލިކޮށް މެންޗެސްޓާ ޔުނައިޓެޑުން ފައިނަލާ ފިޔަވަޅަކާ ގާތަށް ޖެހިލައިފި އެވެ.
އަންނަ ހަފްތާގައި އާސެނަލް ދަނޑުގައި ކުޅޭ މެޗުން ވިޔަރެއާލް ބަލިކޮށްގެން އާސެނަލަށް ފައިނަލުން ފުރުސަތު ހޯދޭނެ އެވެ. މި މުބާރާތުގެ ޗެމްޕިއަންކަން 2017 ވަނަ އަހަރު ހޯދި ޔުނައިޓެޑުން ރަށުންބޭރުގައި ރޯމާ އަތުން ތަފާތު ބޮޑުކޮށް ބަލިވެގެން ނޫން ގޮތަކަށް ނުކަޓާނެ އެވެ.
އާސެނަލްގެ ކުރީގެ ކޯޗު އުނާއި އެމެރީގެ ކޯޗުކަމުގައި ކުޅުނު ވިޔަރެއާލުން ވަނީ ފުރަތަަމަ 29 މިނިޓް ތެރޭ އާސެނަލް ކޮޅަށް ދެ ގޯލުގެ ލީޑެއް ނަަގައިފަ އެވެ. ވިޔަރެއާލަށް ލީޑުނަގައިދިނީ ތިން ވަނަ މިނިޓްގައި މަނޫ ޓްރިގޭރޯސް އެވެ. މެޗުގެ 29 ވަނަ މިނިޓްގައި ޖެރާޑް މޮރޭނޯ ދިން ބޯޅައަކުން ރައުލް އަލްބިއޯލް ވަނީ ވިޔަރެއާލްގެ ދެ ވަނަ ގޯލު ޖަހައިފަ އެވެ.
މެޗުގެ 59 ވަނަ މިނިޓްގައި ދެ ވަނަ ރީނދޫ ކާޑާ އެކު އާސެނަލްގެ ޑެނީ ސެބާޔޯސް އަށް ރަތް ކާޑެއް ދެއްކި އެވެ. އާސެނަލްގެ ކުޅުންތެރިއަކު މަދުވެފައިވަނިކޮށް ވިޔަރެއާލުން ތިން ވަނަ ގޯލެއް ޖެހިޔަނުދީ ހިފެހެއްޓީ އާސެނަލްގެ ކީޕަރު ބާން ލޭނޯ އެވެ.
އާސެނަލަށް ލިބުނު ޕެނަލްޓީ އަކުން ގޯލު ޖަހައިދިނީ ނިކޮލަސް ޕެޕޭ އެވެ. އޭގެ ފަހުން ވިޔަރެއާލްގެ އެޓިއެން ކަޕޫ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކި އެވެ. ދެ ޓީމުގެ ކުޅުންތެރިން ހަމަވި ފަހުން އާސެނަލްގެ ޕިއޭ އެމެރިކް އޮބާމަޔަން އަށް މެޗުގެ ފަހު ވަގުތުގައި ލަނޑުޖަހަން ލިބުނު ފުރުސަތުގެ ބޭނުމެއް ނުހިފުނެވެ.
ރޯމާ އިން ފުރަތަމަ ހާފުގައި އަނިޔާގެ ސަބަބުން ތިން ކުޅުންތެރިން ބަދަލުކުރަން ޖެހުނު ނަމަވެސް ނިންމާލީ ލީޑުގައި އޮވެ އެވެ. ބްރޫނޯ ފެނާންޑޭސް ޔުނައިޓެޑަށް ލީޑުނަގައިދީފައިވަނިކޮށް ރޯމާ އިން އެއްވަރުކުރީ ޕައުލް ޕޮގްބާ އަތުގައި ޖެހުުމުން ދިން ޕެނަލްޓީ އަކުން ލޮރެންޒޯ ޕެލެގްރީނީ ޖެހި ގޯލުންނެވެ. ރޯމާ ލީޑުނެގީ ޕެލެގްރީނީ ދިން ބޯޅައަކުން ކުރިން މެންޗެސްޓާ ސިޓީ އަށް ކުޅުނު އެޑިން ޒެކޯ ޖެހި ގޯލުންނެވެ.
ތަފާތު ރޫހެއްގައި ނުކުމެ ޔުނައިޓެޑުން ވަނީ ދެ ވަނަ ހާފުގައި ފަސް ގޯލު ޖަހައިފަ އެވެ. ޔުނައިޓެޑަށް އެއްވަރުކޮށްދިނީ ފެނާންޑޭސް ދިން ބޯޅައަކުން ކަވާނީ އެވެ. ޔުނައިޓެޑަށް ލީޑުނަގައިދިނީ ކަވާނީ އެވެ. މިއީ އާރޮން ވަން ބިސާކާ ޖެހި ޝޮޓެއް ރޯމާގެ ކީޕަރު މިރަންޓޭ އަތުގައި ޖެހިފައި ނުކުތް ވަގުތު ކަވާނީ ޖެހި ގޯލެކެވެ. ކަވާނީ އަށް ކްރިސް ސްމޯލިން ކުރި ފައުލަކަށް ދިން ޕެނަލްޓީއެއް ކާމިޔާބުކޮށް ފެނާންޑޭސް ޔުނައިޓެޑަށް ހަތަރު ވަނަ ގޯލެއް ޖަހައިދިނެވެ. އެ ޕެނަލްޓީ ދިނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަަލައި ޔަގީންކޮށްފަ އެވެ.
އޭގެ ފަހުން ފެނާންޑޭސް ނެގި ހުރަހަކުން ޕޮގްބާ ބޮލުން ގޯލެއް ޖަހައި ޔުނައިޓެޑަށް ފަސް ވަނަ ގޯލެއް ކާމިޔާބުކޮށްދިނެވެ. ކަވާނީ ދިން ބޯޅައެއް ހިފައިގެން ވަދެ، ޔުނައިޓެޑްގެ ހަ ވަނަ ގޯލު ޖެހީ ބަދަލު ކުޅުންތެރިއެއްގެ ގޮތުގައި ކުޅެން އެރި ޒުވާން ފޯވާޑް މޭސަން ގްރީންވުޑް އެވެ.
މިދިޔަ އަހަރުގެ ޔޫރޮޕާ ލީގުގެ ސެމީން ޔުނައިޓެޑް ކެޓީ މުބާރާތުގެ ޗެމްޕިއަންކަން ހޯދި ސެވިއްޔާ އަތުންނެވެ. މި ފަހަރުގެ ފައިނަލުގެ ފުރުސަތު ޔުނައިޓެޑަށް ބޮޑުވެފައިވާއިރު، ފައިނަލަށް ގޮސްފިނަމަ އެ ވެގެންދާނީ އެ ޓީމުގެ ކޯޗުކަމާ ކުރީގެ ފޯވާޑް އޮލެ ގުނަ ސޯލްޝެއާ ހަވާލުވި ފަހުން އެ ޓީމު ކުޅޭނެ ފުރަތަމަ ފައިނަލަށެވެ.
