މާފުށީ ޖަލުގައި ހުކުމް ތަންފީޒުކުރަމުން އަންނަ ކުރީގެ ރައީސް އަބްދުﷲ ޔާމީން ގެއަށް ބަދަލުކޮށްދޭން ސަރުކާރުން ނިންމައިފި އެވެ.
ރޯދަ މަހަށް ރައީސް ޔާމީނަށް ލުއި ދިނުމުގެ ގޮތުން އެމަނިކުފާނު ގެކޮޅަށް ބަދަލުކޮށް ދިނުމަށް އާއިލާއިންނާއި ޕީޕީއެމްއިން ވަނީ އެދިފަ އެވެ.
މި ހިނގާ ރޯދަ މަސް ފެށުމުގެ އެއް ދުވަސް ކުރިން ރައީސް އިބްރާހިމް މުހައްމަދު ސޯލިހު ބޭއްވެވި ނޫސްވެރިންގެ ބައްދަލުވުމުގައި ވިދާޅުވި ގޮތުގައި ރައީސް ޔާމީންގެ އަނބިކަނބަލުން ފާތިމަތު އިބްރާހިމްގެ ސިޓީފުޅެއް އެމަނިކުފާނަށް ލިބިފައިވާ ކަމަށެވެ.
އެ ސިޓީފުޅުގައި ރައީސް ޔާމީން ގެކޮޅަށް ބަދަލުކޮށް ދިނުމަށް ފާތިމަތު އެދިވަޑައިގެންފައިވަނީ ރައީސް ޔާމީންގެ ސިއްހީ ހާލުކޮޅަށް ރިއާޔަތްކުރައްވާ ކަމަށެވެ.
ރައީސް ސޯލިހު އެ ދުވަހު ވިދާޅުވެފައިވަނީ، ރައީސް ޔާމީނަށް ދެރަ ގޮތެއް ނުވާނެ ކަމަށާއި، އެމަނިކުފާނު ގެކޮޅަށް ބަދަލުކުރުމަށް، މަޝްވަރާ ކުރަން ޖެހޭ ފަރާތްތަކާއެކު މަޝްވަރާ ކުރަމުންދާ ކަމަށެވެ.
ނަމަވެސް، އެ މަޝްވަރާތައް ދިގުލައި، ގޮތެއް ނުނިމި ލަސްވަމުންދާތީ އިދިކޮޅުން ވަނީ ކަންބޮޑުވުންފާޅުކޮށް، މުޒާހަރާ ވެސް ކުރަން ފަށައިފަ އެވެ.
ކަރެކްޝަނަލް ސާވިސްގެ އިސް އޮފިޝަލަކު ނަން ނުޖެހުމަށް އެދި "އަދަދު" އަށް ވިދާޅުވި ގޮތުގައި، ސަރުކާރުގެ ތެރޭގައި އެ މަޝްވަރާތައް ކުރުމަށްފަހު، ރައީސް ޔާމީން ގެއަށް ބަދަލުކޮށް ދިނުމަށް ނިންމާފައިވާ ކަމަށެވެ.
އަދި މިރޭގެ ވަގުތެއްގައި އެމަނިކުފާނު ގެއަށް ބަދަލުކުރާނެ ކަމަށް އޭނާ ވިދާޅުވި އެވެ.
ނަމަވެސް، ޔާމީން ގޭބަންދަށް ބަދަލުކުރަނީ ރޯދަ މަސް ނިމެންދެންކަމެއް އޮފިޝަލު ވިދާޅެއްނުވެ އެވެ.
ރައީސް ޔާމީންގެ މައްޗަށް މަނީ ލޯންޑްރިންގެ ކުށް ސާބިތުވެ، ޖަލުގައި ހުންނެވިއިރު އިތުރު ޝަރީއަތެއް ވެސް މިހާރު ހިންގަ އެވެ. އެ ޝަރީއަތުގެ މަޖިލީހުގައި ވެސް ރައީސް ޔާމީން ވަނީ އެމަނިކުފާނުގެ ސިއްހީ ހާލުކޮޅާ ގުޅޭ ގޮތުން ވާހަކަފުޅު ދައްކަވާފަ އެވެ.
ރައީސް ޔާމީންގެ ސަރުކާރުގައި ބައެއް ސިޔާސީ ބޭފުޅުންނަށް ރޯދަ މަހު ލުއި ދެއްވާފައިވެ އެވެ. އެގޮތުން ޓެރަރިޒަމްގެ ކުށުގައި ޖަލުގައި ހުންނެވި މިހާރުގެ ހޯމް މިނިސްޓަރު އިމްރާން އަބްދުﷲއަށް އެ ފުރުސަތު ދެއްވި އެވެ.
