ވެރިރަށް މާލޭގައި ކޮވިޑް-19 ފެތުރޭ މިންވަރު ގިނަ ކަމަށާއި ނަމަވެސް ވެކްސިންގެ ސަބަބުން ބަލިން ބޮޑުވަރުވާ މީހުން ނިސްބަތުން މަދު ކަމަށް ހެލްތު ޕްރޮޓެކްޝަން އޮތޯރިޓީން މިއަދު ބުނެފި އެވެ.
އެޗްޕީއޭއިން މިއަދު ބޭއްވި ނޫސްވެރިންގެ ބައްދަލުވުމެއްގައި ޑރ. ނަޒްލާ މުސްތަފާ ވިދާޅުވީ "މާލޭގައި ފުދޭވަރެއްގެ ބޮޑު އައުޓްބްރޭކެއް އުޅޭ" ކަމަށެވެ.
"އެހެންވީމަ އަޅުގަނޑުމެންގެ މާލޭގައި މީގެ ކުރީ ދެ ހަފްތާއަށް ބަލާއިރުގައި ވެސް އެންމެ ފަހު ހަފްތާގައި ފްލޫ ޕޮޒިޓިވިޓީ ވަނީ ވަރަށް މަތިވެފައި. އޭގެ މާނައަކީ މާލޭގައި ފުދޭވަރަކަށް ބޮޑު އައުޓްބްރޭކެއް އެބަ އުޅެޔޭ،" ޓެކްނިކަލް އެޑްވައިޒަރީ ޓީމުގެ ހިމެނޭ ޑރ. ނަޒްލާ ވިދާޅުވި އެވެ.
ބަލިޖެހޭ މީހުންގެ އަދަދު އިތުރުވާތީވެ ހޮސްޕިޓަލުގައި ބާއްވާންޖެހޭ މީހުންގެ އަދަދު ވެސް އިތުރުވަމުންދާ ކަމަށް ޑރ. ނަޒްލާ ވިދާޅުވި އެވެ.
"ދެން އަޅުގަނޑުމެން ހޮސްޕިޓަލައިޒޭޝަން ރޭޓް ބަލާއިރު ވެސް ނަންބާސް މަތިވާ ވަރަކަށް އެޑްމިޓްވާ މީހުން އެބަ އިތުރުވޭ،" އޭނާ ވިދާޅުވި އެވެ.
ޑރ. ނަޒްލާ ވިދާޅުވީ ރާއްޖޭގައި ވެކްސިން ޖަހަން ފެށުމުގެ ކުރިން، ބާރު މިނެއްގައި ބަލި ފެތުރެން ފެށުމުން ހިދުމަތް ދިނުމަށް ވަރަށް ބޮޑަށް ދަތިވި ކަމަށެވެ. ނަމަވެސް މިހާރު ވެކްސިނާއެކު ބަލިން ބޮޑުވަރުވާ މީހުން މަދުވާ ކަމަށް އޭނާ ވިދާޅުވި އެވެ.
"އެނގިވަޑައިގަންނަވާނެ ތަންކޮޅެއް ކުރިން ކްރިޓިކަލްވިއިރު އަޅުގަނޑުމެންގެ ބެޑް ކެޕޭސިޓީ 80 ޕަސެންޓަށް އެރި. އެކަމަކު މިހާރު ވެކްސިންޖަހަން ފެށިފަހުން ކޮންމެވެސް ވަރަކަށް ސިވިއަރިޓީ މަދުވެއްޖެ،" ޑރ. ނަޒްލާ ވިދާޅުވި އެވެ.
ވެކްސިންޖެހޭނެ އާބާދީގެ 67 ޕަސެންޓު މީހުންނަށް ވެކްސިންގެ ކޮންމެވެސް އެއް ޑޯޒު ލިބިފައިވާ ކަމަށް މިއަދު އެޗްޕީއޭއިން ވަނީ ބުނެފަ އެވެ.
އިއްޔެ ރާއްޖޭގައި 464 މީހަކު ވަނީ ކޮވިޑަށް ޕޮޒިޓިވްވެފަ އެވެ. އެ އަދަދު އައީ ދުވަހަކަށްވުރެ ދުވަހެއް އިތުރުވަމުންނެވެ.
