ކޮވިޑުގެ ދެ ވަނަ ރާޅެއްގައި އިންތިހާއަށް ހާލަތު ގޯސްވެފައިވާ އިންޑިއާގެ ސްޓޭޓް އިންތިހާބުގެ ވޯޓުލުން ފަށައިފި އެވެ.
ވެސްޓް ބެންގޯލް ސްޓޭޓުގެ ވޯޓުލާ މަރުކަޒުތަކުގެ ބޭރުގައި ބޮޑެތި ކިޔު ދަމާލާފައި ވާއިރު، މި ބަލި އިތުރަށް ފެތުރިދާނެ ކަމުގެ ބިރު ވަރަށް ބޮޑެވެ.
ތަޖުރިބާކާރުން އިންޒާރު ދީފައިވާ ގޮތުގައި ބަލީގެ "އެޕިސެންޓަރަކީ" ވެސްޓް ބެންގޯލްއަށް ވުމުގެ ފުރުސަތު އެބަ އޮތެވެ. އެއީ ވޯޓުލުމުގެ ކުރިން ބޮޑެތި ކެމްޕެއިން އެއްވުންތައް ވެސް ބާއްވާފައި ވާތީ އެވެ.
ފާއިތުވި 24 ގަޑިއިރުގެ ތެރޭގައި އެ ސްޓޭޓުން 17،000 މީހުން ޕޮޒިޓިވްވި އެވެ. މިއީ އެ ސްޓޭޓުގެ ރިކޯޑު އަދަދެކެވެ.
ވެސްޓް ބެންގޯލްގެ ސްޓޭޓް ސަރުކާރު އިންތިހާބު ކުރަން މީގެ ކުރިން ވެސް ވޯޓުލުގެ ހަތް މަރުހަލާ ބާއްވާފައި ވެއެވެ. އިންޑިއާގެ އިރުމަތީގައިވާ މި ސްޓޭޓަކީ ބޮޑު ވަޒީރު ނަރެންދްރަ މޯދީއަށް މެޖޯރިޓީ ލިބިފައި ނުވާ މަދު ސްޓޭޓުތަކުގެ ތެރެއިން ތަނެކެވެ.
މޯދީއަކީ ކޮވިޑުގެ "ސުޕަ ސްޕްރެޑާ" އެއް
ބަލިމަޑުކަމުގައި މީހުންގެ ފުރާނަ ހިފެހެއްޓުމެއް ނެތި ގެއްލެމުން ދާއިރު، ކެމްޕެއިން އެއްވުންތައް ބާއްވަމުން ދިޔުމާ ގުޅިގެން މޯދީއަށް ފާޑުކިޔުން އަމާޒުވެފައި ވެއެވެ.
ބީބީސީން ރިޕޯޓުކޮށްފައިވާ ގޮތުގައި މޯދީ ބައިވެރިވެ ވަޑައިގެންނެވި ބައެއް އެއްވުންތަކުގައި މިލިއަނުން މީހުން ބައިވެރިވިއިރު، ގައިދުރުކަމެއް އަދި މާސްކު އެޅުމެއް ވެސް ނެތެވެ.
މޯދީއަކީ ކޮވިޑު ބަލީގެ "ސުޕަ ސްޕްރެޑާ" އެއް ގޮތުގައި އިންޑިއަން މެޑިކަލް އެސޯސިއޭޝަނުގެ ނައިބު ރައީސް ވެސް ވަނީ ސިފަކުރައްވާފަ އެވެ.
ކެމްޕެއިން އެއްވުމެއްގައި މޯދީ ވާހަކަފުޅު ދައްކަވަނީ.--
ޑރ. ނަވްޖޯތު ދަހިޔާ ވިދާޅުވީ މޯދީއަކީ "ސުޕަ ސްޕްރެޑާ" އެއް ނުވަތަ ހަލުވިކަމާ އެކު މި ބަލި ފެތުރުމަށް މެދުވެރިވި ސަބަބެއް ކަމަށެވެ.
ގިނަ ބަޔަކު ތުހުމަތު ކުރާ ގޮތުގައި މޯދީ ވަނީ ސައިންޓިފިކް އިންޒާރުތަކަށް ބީރު ކަންފަތެއް ދެއްވައި، ކެމްޕޭން އެއްވުންތައް ކުރިއަށް ގެންދިޔުމަށާއި، ހިންދޫ ދީނުގެ އެންމެ ބޮޑު ފެސްޓިވަލް ބޭއްވުމަށް ހުއްދަ ދެއްވާފަ އެވެ.
އޭގެ އިތުރުން ހާލަތު ގޯސްވެ، އޮކްސިޖަނާއި ބޭސް އަދި ވެކްސިން ހުސްވާ ކަމަށް ހޮސްޕިޓަލްތަކުން ބުނުމުން ހަގީގަތް އޮޅުވާލަން މަސައްކަތް ކުރެއްވި ކަމަށް ބުނެ ވެސް މޯދީއަށް ފާޑުކިޔުން އަމާޒުވެ އެވެ.
އިންޑިއާއަކީ "ފުރިހަމަ ތޫފާނެއްގެ" ނަތީޖާ
އިންޑިއާއަށް މިހާރު ކުރިމަތިވެފައިވާ ކޮވިޑުގެ ދެ ވަނަ ރާޅަކީ ބޮޑެތި އެއްވުންތައް ބޭއްވުމާއި، ނުރައްކާތެރި ވޭރިއެންޓުތައް އެކުވުމާއި، ވެކްސިން ޖެހުން ލަސްވުމުގެ "ފުރިހަމަ ތޫފާނެއްގެ" ނަތީޖާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އިއްޔެ ބުންޏެވެ.
އިއްޔެ އިންޑިއާގައި ޕޮޒިޓިވް ކޭސްތަކުގެ އަދަދު ހުރީ ޖެހިޖެހިގެން ހަ ވަނަ ދުވަހަކަށް ތިން ލައްކައިން މަތީގަ އެވެ. ހޮސްޕިޓަލްތަކާއި ސިއްހީ މަސައްކަތްތެރިން ވަރުބަލިވެ، ހަށިތައް އަންދާނެ ޖާގަ ނެތުން ފަދަ މައްސަލަތައް ދިމާވުމާއެކު ސިފައިން އިއްޔެ ވަނީ އެހީވާން ނުކުމެފަ އެވެ.
ކޮވިޑުގައި މަރުވި މީހުންގެ ހަށިތައް އަންދަނީ.--
މި ބަލީގައި އިންޑިއާއިން ދެ ލައްކަ މީހުން މަރުވެފައި ވާއިރު، ހާލު ބޮޑުވާ މީހުންނަށް ފަރުވާ ދޭނެ އޮކްސިޖަނާއި އިތުރު ސާމާނު ނެތުމުން ގިނަ ހޮސްޕިޓަލްތަކުން ވަނީ މީހުން އެޑްމިޓު ކުރުން ހުއްޓާލާފަ އެވެ.
އިންޑިއާގެ ހާލަތު އޮތް ގޮތުގެ ސަބަބުން ގިނަ ގައުމުތަކަކުން ވަނީ އެ ގައުމަށް ކުރާ ދަތުރުތައް ހުއްޓާލާފަ އެވެ. ގިނަ ގައުމުތަކުން އެހީ ފޮނުވަން ފަށާފައިވީ ނަމަވެސް، ހާލަތު ރަނގަޅުވުމުގެ ނިޝާނެއް އަދި ނުފެނެ އެވެ.
