ހަތަރު ފުރޮޅުލީ އުޅަނދުތައް ރަޖިސްޓްރީކުރަން ގަރާޖެއް ބޭނުން ނުވާ ގޮތަށް ގާނޫނު އިސްލާހު ކުރުމާ ދެކޮޅަށް މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އާއެކު ގަލޮޅު އުތުރު ދާއިރާގެ މެމްބަރު އީވާ އަބްދުﷲގެ އިތުރުން ހެންވޭރު މެދު ދާއިރާގެ މެމްބަރު އަލީ އާޒިމް މިއަދު ތެދުވެވަޑައިގެންފި އެވެ.
ހަތަރު ފުރޮޅުލީ އުޅަނދުތައް ރަޖިސްޓްރީކުރަން ގަރާޖެއް ބޭނުން ނުވާ ގޮތަށް އެއްގަމު ދަތުރުފަތުރާ ބެހޭ ގާނޫނަށް އިސްލާހު ގެންނަން ރައްޔިތުންގެ މަޖިލީހުގެ ކަމާގުޅޭ ކޮމިޓީން ނިންމާފައިވާއިރު، އިއްޔެ ބަހުސްގެ ތެރެއިން ވެސް ބޮންޑޭގެ ނުރުހުން އެންމެ ބޮޑަށް އަމާޒުވީ އެމްޑީޕީގެ އެހެން މެމްބަރުންނަށެވެ.
އެކަމަކު މިހާރު ގެންނަން އުޅޭ ބަދަލު ބޮންޑޭ އެ ވިދާޅުވާހާ ގޯސް ކަމަަކަށް އެމްޑީޕީގެ އެހެން މެމްބަރުން ގަބޫލެއް ނުކުރައްވަ އެވެ.
ބޮންޑޭ ދެކެވަޑައިގަންނަވާ ގޮތުގައި، އިސްލާހު ހުށަހަޅާފައިވާ ގޮތަށް ފާސްވެއްޖެ ނަމަ "އެމްޑީޕީގެ މެމްބަރުން ގެއަށް ދާންވީ" އެވެ.
އުޅަނދުތައް ގަރާޖެއްގައި ރަޖިސްޓްރީ ކުރުން ލާޒިމު ނުވާ ގޮތަށް ހެދުމަށް އެއްގަމު ދަތުރުފަތުރުގެ ގާނޫނަށް އިސްލާހު ހުށަހެޅުއްވީ ނޮޅިވަރަމް ދާއިރާގެ އަމިއްލަ މެމްބަރު މުހައްމަދު ނަޝީދު އަބްދުﷲ އެވެ.
އެ އިސްލާހުގެ މަގުސަދަކީ ބައެއް ގަރާޖުތަކުގެ ވެރިފަރާތްތަކުން އެކަމުގެ ނާޖާއިޒު ފައިދާ ނަގައި ގަރާޖު ފީގެ ގޮތުގައި ބޮޑެތި އަދަދުތަކުން ފައިސާ ނަގަމުންދާ މައްސަލަ ހައްލު ކުރުން ކަމަށް ބުނެފައިވެ އެވެ.
އެ ބިލު ދިރާސާ ކުރިއިރު މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން ކަމާގުޅޭ އިދާރާތަކުގެ ލަފަޔާ އެކު ނިންމާފައި ވަނީ އިންޖީނުލީ އެއްގަމު އުޅަނދު ރަޖިސްޓަރީ ކުރަން ހުށަހަޅާއިރު ގަރާޖެއްގައި އެ އުޅަނދެއް ބާއްވާނެ ކަމުގެ ލިޔުން ހުށަހަޅަން ލާޒިމްނުވާ ގޮތަށެވެ.
މިއަދުގެ ޖަލްސާގައި ކުރިއަށްދިޔަ ބަހުސްގައި ބޮންޑޭގެ ކަންބޮޑުވުންތައް ތަކުރާރުކުރައްވަމުން އީވާ ވިދާޅުވީ ކޮރަޕްޝަން ހުއްޓުވުމަކަށް ބުނެ ގަވައިދު އުވާލައިގެން އެކަމެއްގެ އަސާސެއް ފިލައިގެންނުދާނެ ކަމަށެވެ.
އަދި އެކަމުގައި ހިނގަމުންދާ ކޮރަޕްޝަން ހުއްޓުވާނީ އެކަމަށް އޮންނަ ގަވައިދު އުވާލުމުގެ ބަދަލުގައި އެ ގާނޫނު ތަންފީޒުކޮށްގެން ކަމަށް މަޖިލީހުގެ ނައިބު ރައީސްކަން ވެސް ކުރައްވާ އީވާ ވިދާޅުވި އެވެ.
މަޖިލީހުގެ ޖަލްސާއެއްގައި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވާހަކަ ދައްކަވަނީ. -ފޮޓޯ: މަޖިލިސް
އެހެންވީމަ، އަޅުގަނޑު ހުށަހަޅަނީ މި ބިލު އަނބުރާ ކޮމިޓީއަށް ގެންގޮސް މިކަމާމެދު އިތުރަށް ވިސްނައި މަޝްވަރާކުރުން. -- އީވާ
އަދި ގަރާޖު ސިޓީ އުވާލައިގެން މާލޭގެ ޓްރެފިކް މައްސަލައަށް ވެސް އަދި ތޮއްޖެހުމަށް ވެސް ހައްލެއް ނާންނާނެކަން އޭނާ ފާހަގަކުރެއްވި އެވެ.
އީވާގެ ހުށަހެޅުއްވުމަށް ތާއީދުކުރައްވައި، އަލީ އާޒިމް ވެސް ވިދާޅުވީ ކަމެއް ގޯސްކޮށް ހިނގާކަމަށް ބުނެ އެކަން ހުއްޓުވަން އޮންނަ ގަވައިދެއް ނޫނީ ގާނޫނެއް އުވާލުމަކީ އޭގެ ހައްލެއް ނޫން ކަމަށެވެ.
"ފިހާރައަކަށް ވަދެ ކޮންމެ ދުވަހަކު ދެ މީހަކު ވައްކަން ކުރާތީ، އެ ފިހާރަ ތަޅާލުމަކީ އޭގެ ވަށައިގެން ވާ މީހުންނަށް ފައިދާއެއް ކުރާނެ ކަމެއް ކަމަށް އަޅުގަނޑަށް ގަބޫލެއް ނުކުރެވޭ،" އެމްޑީޕީގެ ޕާލިމަންޓަރީ ގުރޫޕުގެ ލީޑަރުކަން ވެސް ކުރައްވާ އާޒިމް މިސާލެއް ނަންގަވައި ވިދާޅުވި އެވެ.
އެ ބަހުސްގެ ތެރެއިން ރިޔާސަތުގައި އިންނެވި މަޖިލީހުގެ ރައީސް އަދި މައްޗަންގޮޅި މެދު ދާއިރާ ތަމްސީލު ކުރައްވާ މުހައްމަދު ނަޝީދު ވެސް ވިދާޅުވީ ގަރާޖު ސިޓީއަކީ ޕާކިންގެ މައްސަލަ އޮތް ހައްލެއް ނޫން ކަމަށެވެ.
އަދި އެހެން ގައުމުތަކުގައި ވެސް ވެހިކަލްތަކުގެ އަދަދު ކޮންޓްރޯލް ކުރަނީ ގަރާޖު ސިޓީން ނޫން ކަމަށާއި، ރަށެއްގެ މަގުތަކުގައި އެންމެ ގިނަ އަދަދެއްގެ ވެހިކަލް ދުއްވޭނެ އަދަދު ކަނޑައެޅޭނެ އިޖުއާރަތްތަކާ މެދު މަޖިލީހުން ވެސް ވިސްނަންޖެހޭކަމަށް އެމަނިކުފާނު ވިދާޅުވި އެވެ.
