މަރުގެ ތުންފަން މަތީގައި އޮތް ކާފައަށް އޮކްސިޖަން ހޯދަން ޓްވީޓު ކުރި މީހަކާ ދެކޮޅަށް ދައުވާ ކުރަން އެދުމަށް އިންޑިއާ ފުލުހުން ނިންމައިފި އެވެ.
އުއްތަރް ޕްރަދޭޝް ސްޓޭޓަށް ނިސްބަތްވާ ޝަޝާންކް ޔާދަވްއަށް ދައުވާ ކުރަނީ އޮކްސިޖަންގެ ދަތިކަމާ ގުޅޭ ވާހަކަތަކެއް ފަތުރައިގެން ބިރުވެރިކަމާއި ކަންބޮޑުވުން އުފައްދަން އުޅުނު ކަމުގެ ތުހުމަތުގަ އެވެ.
ޔާދަވް ކުރި ޓްވީޓުގެ ސަބަބުން އޭނާއަށް ޖަލު ހުކުމެއް އައުން އެކަށީގެންވެ އެވެ.
މިދިޔަ ހޯމަ ދުވަހު އުމުރުން 26 އަހަރުގެ ޔާދަވް ކުރި ޓްވީޓުގައި އެދިފައި ވަނީ އޭނާގެ ކާފައަށް އޮކްސިޖަން ސިލިންޑަރެއް ހޯދަން އެހީވުމަށެވެ. އެކްޓަރު ސޯނޫ ސޫދު ޓެގް ކުރި އެ ޓްވީޓުގައި ކޮވިޑާ ގުޅޭ ވާހަކައެއް ނުވަތަ ކާފައެއް ދިމާވެފައިވާ ސިއްހީ މައްސަލައެއް ހިއްސާކޮށްފައެއް ނުވެ އެވެ.
ފުލުހުން ބުނީ އެ "ދޮގު ޓްވީޓު" ގެ ސަބަބުން ގިނަ ބަޔަކު ސަރުކާރާ ދެކޮޅަށް ސާބިތު ނުހިފޭ ތުހުމަތު ކުރަމުންދާ ކަމަށެވެ. އަދި ޔާދަވްއަށް ދައުވާ ކުރަން ފޮނުވަން ނިންމީ "އާއްމުންނަށް އޮޅޭ ގޮތަށް" މައުލޫމާތު ފެތުރުމުން ކަމަށް ބުންޏެވެ.
މިއީ އިންޑިއާގައި މަދަނީ މިނިވަންކަމާއި ހިޔާލު ފާޅުކުރުމުގެ މިނިވަންކަން ކުޑަވަމުންދާކަން ހާމަވާ ކަމުގެ ހެއްކެއް ކަމަށް ބައެއް ފަރާތްތަކުން ބުނެ އެވެ.
ހޯމަ ދުވަހުގެ ރޭ ޔާދަވްގެ ކާފަ މަރުވެފައި ވާއިރު، އެއީ ކޮވިޑާ ގުޅުން ހުރި މަރެއް ނޫން ކަމަށް އޮފިޝަލުން ބުނެފައި ވެއެވެ. ނަމަވެސް މަރުވި ސީދާ ސަބަބެއް ސާފެއް ނުވެ އެވެ.
އުއްތަރު ޕްރަދޭޝްގެ ޗީފް މިނިސްޓަރު ޔޯގީ އަދިތްޔަނަތް.-- ފޮޓޯ: ގެޓީ އިމޭޖަޒް
ކޮވިޑުގެ ދެ ވަނަ ރާޅުގައި އެންމެ ބޮޑަށް އަސަރުކޮށްފައިވާ އެއް ސްޓޭޓަކީ އުއްތަރު ޕްރަދޭޝެވެ. އެ ތަނުގެ ހާލަތާ މެދު ދޮގު މައުލޫމާތު ދޭ ކަމަށް ޗީފް މިނިސްޓަރު ޔޯގީ އަދިތްޔަނަތްއަށް ތުހުމަތު ކުރެވެ އެވެ.
ބޮޑު ވަޒީރު ނަރެންދްރަ މޯދީއަށް ވަފާތެރި އަދިތްޔަނަތް މި ހަފްތާގައި ވަނީ ކޮވިޑާ ގުޅޭ ދޮގު ހަބަރު ފަތުރާ މީހުންގެ މުދާ ހިފެހެއްޓުމަށް ގޮވާލައްވާފަ އެވެ.
އެ ސްޓޭޓުގެ އެއްވެސް ހޮސްޕިޓަލަކަށް އޮކްސިޖަންގެ ދަތިކަން ދިމާ ނުވާ ކަމަށް އޭނާ ވިދާޅުވި ނަމަވެސް އެހީއަށް އެދި އާދޭސް ކުރާ މީހުން ހޮސްޕިޓަލްތައް ކައިރިއަށް ޖަމާވެފައި ވެ އެވެ.
މި ކާރިސާގެ ސަބަބުން މޯދީއަށް ޕްރެޝަރު ބޮޑުވެ ފާޑުކިޔުން އަމާޒުވެފައި ވާއިރު، އޭނާގެ ސަރުކާރުން ވަނީ ފާޑުކިޔާ ޓްވީޓައް ޓްވިޓާއިން ނެގުމަށް އެދިފަ އެވެ. އިންޑިއާގެ ގާނޫނާ ހަވާލަދީ އެ ގޮތަށް އެދިފައިވުމުން ޓްވިޓާއިން ވެސް އެ އެދުން ތަންފީޒުކޮށްދެމުންނެވެ.
