ޕެރިސް (އޭޕްރީލް 29) - ޔުއެފާ ޗެމްޕިއަންސް ލީގުގެ ސެމީ ފައިނަލުގައި މިރޭ ރަށުންބޭރުގައި ފަހަތުން އަރައި 2-1 އިން ޕީއެސްޖީ ބަލިކޮށް މެންޗެސްޓާ ސިޓީ މުބާރާުތުގެ ފައިނަލާ ގާތަށް ޖެހިލައިފި އެވެ.
އަންނަ ހަފްތާގައި ސިޓީ ދަނޑުގައި ކުޅޭ މެޗު އެއްވަރުކޮށްލައިގެން ނޫނީ 1-0 އިން ޕީއެސްޖީ މޮޅުވިޔަސް ފައިނަލުގެ ޖާގަ ލިބޭނީ ސިޓީ އަށެވެ. މެޗު އިތުރު ވަގުތު ކުޅެން ޖެހޭނީ 2-1 އިން ޕީއެސްޖީ މޮޅުވެގެންނެވެ. އެ އަށް ވުރެ ބޮޑު ސްކޯ އަކުން ޕީއެސްޖީ މޮޅުވެއްޖެނަަމަ އެ ޓީމަށް ޖެހިޖެހިގެން ދެ ވަނަ ސީޒަނުގައި ފައިނަލުގެ ފުރުސަތު ލިބޭނެ އެވެ. ޕީއެސްޖީ މިދިޔަ އަހަރުގެ ފައިނަލުން ބަލިވީ ބަޔާން މިއުނިކް އަތުންނެވެ.
މިއީ ސިޓީން އެ ކްލަބްގެ ތާރީހުގައި ސެމީ ފައިނަލްގައި ކުޅޭ ދެ ވަނަ ފަހަރެވެ. ސިޓީގެ ކޯޗުކަމާ 2016 ވަނަ އަހަރު ޕެޕް ގާޑިއޯލާ ހަވާލުވިފަހުން އެ ޓީމުން ސެމީ ފައިނަލަށް ދަތުރުކުރީ މި ފަހަރު އެވެ.
މިރޭގެ މެޗު ފަށައިގެން 15 ވަނަ މިނިޓްގައި އެންހެލް ޑި މާރިއާ ތަނަވަސްކޮށްދިން ފުރުސަތަކުން ޕީއެސްޖީ އަށް ލީޑުނަގައިިދިނީ އެ ޓީމުގެ ކެޕްޓަން މާކުއީނިއޯސް އެވެ. ޑި މާރިއާ ނެގި ކޯނަރަކުން ސިޓީ ޑިފެންޑަރުންގެ ތެރެއިން އަރައި މާކުއީނިއޯސް މި ގޯލު ޖެހީ ބޮލުންނެވެ. މިދިޔަ އަހަރުގެ ޗެމްޕިއަންސް ލީގުގެ ކުއާޓާ އާއި ސެމީގައި ވެސް މާކުއިނީއޯސް ގޯލު ޖެހި ގޮތަށް މި ފަހަރު ވެސް އޭނާ އެކަން ތަކުރާރުކުރީ އެވެ.
ނަތީޖާ ހަމަހަމަކުރަން ސިޓީން ކުރަމުންދިޔަ މަސައްކަތް ކާމިޔާބުވީ މެޗުގެ 64 ވަނަ މިނިޓްގަ އެވެ. އޭރިއާބޭރުން ސިޓީގެ ކެޕްޓަން ކެވިން ޑިބްރޭނާ ހުރަސްކުރަން އޭރިއާތެރެއަށް ފޮނުވާލި ބޯޅަ އެއްވެސް ކުޅުންތެރިއަކު ގައިގައި ނުޖެހި އަމާޒުވީ ގޯލުގެ ދުރު ކަނަށެވެ. ޕީއެސްޖީގެ ކީޕަރު ކޭލޯ ނަވާސް ވިސްނައިގެން ހުރީ އެ ބޯޅަ ގޯލަށް ފޮނުވާލަން ކުޅުންތެރިއަކު އަރާނެ ކަމަށެވެ. އެކަމަކު ގޯލަށް ބޯޅަ ވަނީ އެ ހުއްޓުވަން އެރި ޕީއެސްޖީ ޑިފެންޑަރަކަށް ވެސް ނުލިބި އެވެ.
ސިޓީން އެއްވަރުކުރިތާ ހަތް މިނިޓް ފަހުން ވަނީ ދެ ވަނަ ގޯލެއް ޖަހައިފަ އެވެ. މިއީ މެޗުގެ 71 ވަނަ މިިނިޓްގައި ހިލޭ ޖެހުމަކުން ރިޔާދު މާރޭޒް ވައްދާލި ގޯލެކެވެ. މާރޭޒް ފޮނުވާލި ހިލޭ ޖެހުން ގޯލަށް ވަނީ ޕީއެސްޖީގެ ދިފާއީ ފާރުގެ ތެރެއިންނެވެ. އެ ބޯޅަ ގޯލަށް ވަން ގޮތުން ޕީއެސްޖީގެ ކީޕަރު ނަވާސް ވަރަށް ބޮޑަށް ހިތްހަމަނުޖެހުނެވެ.
ޕީއެސްޖީ މެޗު ނިންމާލަން ޖެހުނީ އެއް ކުޅުންތެރިއަކު މަދުކޮށެވެ. މެޗުގެ 77 ވަަނަ މިނިޓްގައި ޕީއެސްޖީގެ އިދްރީސާ ގާނާ ގޭ އަށް ވަނީ ސީދާ ރަތް ކާޑެއް ދައްކައިފަ އެވެ. ކުރިން އެވަޓަން އަށް ކުޅުނު ގޭ އަށް ރަތް ކާޑެއް ދެއްކީ ސިޓީގެ އިލްކާއި ގުންޑޮގާން އަށް ކުރި ނުރައްކާތެރި ފައުލަކަށެވެ.
މިދިޔަ ޖެނުއަރީ މަހު ޕީއެސްޖީގެ ކޯޗުކަމާ ހަވާލުވި މައުރީސިއޯ ޕޮޗެޓީނޯގެ ކޯޗުކަމުގައި އެ ޓީމުން ވަނީ ނޮކައުޓް ފުރަތަމަ ބުރުގައި ބާސެލޯނާ ކަޓުވާލައިފަ އެެވެ. އަދި ކުއާޓާ ފައިނަލުގައި އެންމެ ފަހުގެ ޗެމްޕިއަން ބަޔާން މިއުނިކްގެ މައްޗަށް ކުރިހޯދި އެވެ.
