އިންޑިއާއަށް މިހާރު ކުރިމަތިވެފައިވާ ކޮވިޑުގެ ދެ ވަނަ ރާޅަކީ ބޮޑެތި އެއްވުންތައް ބޭއްވުމާއި، ނުރައްކާތެރި ވޭރިއެންޓުތައް އެކުވުމާއި، ވެކްސިން ޖެހުން ލަސްވުމުގެ "ފުރިހަމަ ތޫފާނެއްގެ" ނަތީޖާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
އިއްޔެ އިންޑިއާގައި ޕޮޒިޓިވް ކޭސްތަކުގެ އަދަދު ހުރީ ޖެހިޖެހިގެން ހަ ވަނަ ދުވަހަކަށް ތިން ލައްކައިން މަތީގަ އެވެ. ހޮސްޕިޓަލްތަކާއި ސިއްހީ މަސައްކަތްތެރިން ވަރުބަލިވެ، ހަށިތައް އަންދާނެ ޖާގަ ނެތުން ފަދަ މައްސަލަތައް ދިމާވުމާއެކު ސިފައިން އިއްޔެ ވަނީ އެހީވާން ނުކުމެފަ އެވެ.
ޑަބްލިއުއެޗްއޯގެ ތަރުޖަމާނު ތާރިކް ޖަސަރެވިޗް ވިދާޅުވީ އެ ޖަމިއްޔާއިން އިންޑިއާއަށް ބޭނުންވާ ކުއްލި އެހީގެ ސާމާނާއި އިތުރު ސަޕްލައި ފޮނުވަމުންދާ ކަމަށެވެ. އޭގެ ތެރޭގައި އެންމެ ބޮޑަށް ލިބުން ދަތިވެފައިވާ އަދި ފުރާނަ ސަލާމަތް ކުރަން މުހިއްމު 4،000 އޮކްސިޖަން ކޮންސެންޓްރޭޓަރު ހިމެނެ އެވެ.
މި ބަލީގައި އިންޑިއާއިން ދެ ލައްކަ މީހުން މަރުވެފައި ވާއިރު، ހާލު ބޮޑުވާ މީހުންނަށް ފަރުވާ ދޭނެ އޮކްސިޖަނާއި އިތުރު ސާމާނު ނެތުމުން ގިނަ ހޮސްޕިޓަލްތަކުން ވަނީ މީހުން އެޑްމިޓު ކުރުން ހުއްޓާލާފަ އެވެ.
"މި ވަގުތު މައްސަލަ ޖެހޭ އެއް ސަބަބަކީ ރަނގަޅު މައުލޫމާތު ނެތުމުގެ ސަބަބުން މީހުން ހޮސްޕިޓަލަށް ދާތީ. ވިސްނަން ޖެހޭ ކަމަކީ ގޭގައި ވެސް ރައްކާތެރި ކަމާއެކު ފަރުވާދެވިދާނެކަން،" ޖަސަރެވިޗް ވިދާޅުވި އެވެ.
އޭނާ ވިދާޅުވީ ކޮވިޑު ބަލި ޖެހޭ މީހުންގެ ތެރެއިން ހޮސްޕިޓަލުގައި ފަރުވާ ދޭން ޖެހެނީ އެންމެ 15 ޕަސެންޓް މީހުންނަށެވެ. އޭގެ ތެރެއިން އޮކްސިޖަން ބޭނުން ވަނީ އެއަށް ވުރެ މަދު ބަޔަކަށެވެ.
ޖަސަރެވިޗް ވިދާޅުވީ ކޮމިއުނިޓީ ސެންޓަރުތައް ހަދާ، އެ ތަންތަނުން ބަލި މީހުންނަށް ގޭގައި ފަރުވާ ކުރެވޭނެ ގޮތުގެ މައުލޫމާތު ދޭން ޖެހޭ ކަމަށާއި ބަލި މީހުންނަށް ހާއްސަ ހޮޓްލައިންތައް ވެސް ގާއިމްކުރަން ޖެހޭ ކަމަށެވެ.
އިންޑިއާގެ ހާލަތު އޮތް ގޮތުގެ ސަބަބުން ގިނަ ގައުމުތަކަކުން ވަނީ އެ ގައުމަށް ކުރާ ދަތުރުތައް ހުއްޓާލާފަ އެވެ. ގިނަ ގައުމުތަކުން އެހީ ފޮނުވަން ފަށާފައިވީ ނަމަވެސް، ހާލަތު ރަނގަޅުވުމުގެ ނިޝާނެއް އަދި ނުފެނެ އެވެ.
