ކޮވިޑުގެ ދެ ވަނަ ރާޅެއްގައި ހާލަތު ގޯސްވެފައިވާ އިންޑިއާގައި މީހުން ގެތަކުގައި އުޅޭ ވަގުތުގައި ވެސް މާސްކު އަޅައިގެން އުޅެން ސަރުކާރުން އެދިއްޖެ އެވެ.
ސަރުކާރުގެ ތިންކްޓޭންކުގެ މެމްބަރު ޑރ. ވީކީ ޕައުލް ވިދާޅުވީ ކޮވިޑަށް ޕޮޒިޓިވް މީހަކު ގޭގައި ހުރި ނަމަ ގޭ ތެރޭގައި މާސްކު އަޅައިގެން އުޅުން މަޖުބޫރު ވާނެ ކަމަށެވެ.
ބަލި މީހަކު ގޭގައި ނެތް ނަމަވެސް، ގޭ ތެރޭގައި މާސްކު އަޅައިގެން އުޅެންވީ ވަގުތު އައިސް ޖެހިއްޖެ ކަމަށާއި ބަލި ފެތުރިފައިވާ މިންވަރަށް ބަލާއިރު، ރައްކާތެރިކަން ވީ އެންމެ ބޮޑަކަށް އިސް ކުރަން ޖެހޭ ކަމަށް އޭނާ ވިދާޅުވި އެވެ.
"އަޅުގަނޑުމެން ކުރި ދެއްކީ ބޭރުގައި އުޅޭއިރު މާސްކު އަޅާ ވާހަކަ. އެކަމަކު މި ވައިރަސް ފެތުރިފައިވާ ގޮތަށް ބަލާއިރު، އެންމެ ރަނގަޅު ގޮތަކީ ގޭގައި އެހެން މީހުންނާއެކު އުޅޭ އިރު ވެސް މާސްކު އެޅުން،" ޑރ. ޕައުލް ވިދާޅުވި އެވެ.
އިންޑިއާގައި ރައްކާތެރިކަމުގެ ފިޔަވަޅުތަކަށް އިސްކަން ދިނުމަށް ބާރު އަޅަމުން ދާއިރު، އިއްޔެ ވެސް ވަނީ 320،000 އެއްހާ މީހުން މި ބައްޔަށް ޕޮޒިޓިވްވެފަ އެވެ.
