މަސްތުވާތަކެތީގެ މައްސަލާގައި ސިންބޮލިކް ރެކޯޑްސްގެ ރެޕް އާޓިސްޓު، އިސްމާއީލް އިފްހާމް މުހައްމަދު (ޕެސްޓު)ގެ މައްޗަށް ބޮޑު ފަސް ދައުވާއެއް ޕްރޮސިކިއުޓާ ޖެނަރަލްގެ ފަރާތުން އުފުލައި ކުރިމިނަލް ކޯޓަށް ފޮނުވައިފި އެވެ.
ޖަލު ބަންދުގައި ހުރި ޕެސްޓްގެ މައްޗަށް އުފުލާފައިވަނީ، ކެނެބިސް ޓްރެފިކްކުރުމުގެ ކުށުގެ ދައުވާ އާއި ޑައިމޯފިން ޓްރެފިކްކުރުމުގެ ކުށުގެ ދައުވާ އާއި މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާ އާއި ކެނެބިސް ބޭނުންކުރުމުގެ ކުށުގެ ދައުވާގެ އިތުރުން، ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާ އެވެ.
މާލޭގައި ފުލުހުން ހިންގި އޮޕަރޭޝަނެއްގައި ޕެސްޓާއި އޭނާގެ އެކުވެރިންތަކެއް ހައްޔަރުކުރީ، މަސްތުވާތަކެއްޗާއެކު ކަމަށް ފުލުހުން ބުނެފައިވާއިރު، މާލޭގެ ހަތަރު ގެއަކާއި ސައިކަލަކާއި ނޯތު ހާބަރުގައި އޮތް ބޯޓެއް ބަލައިފާސްކޮށް ދެ ކިލޯއަށްވުރެ ގިނަ މަސްތުވާތަކެތި ހޯދުނު ކަމަށް ބުނެފައިވެ އެވެ.
ޕެސްޓްގެ އިތުރުން ދެން ހައްޔަރުކުރި މީހުންގެ މައްޗަށް ވެސް ވަނީ ދައުވާތައް ކޮށްފަ އެވެ.
އެގޮތުން، ލ. ގަން-ތުނޑި، އަބަދަށްއުފާ، މުހައްމަދު ސުއައިދުގެ މައްޗަށް ކޮށްފައިވާ ހަތަރު ދައުވާއަކީ، ކެނެބިސް ޓްރެފިކްކުރުމުގެ ކުށުގެ ދައުވާ އާއި ޑައިމޯފިން ޓްރެފިކްކުރުމުގެ ކުށުގެ ދައުވާ އާއި މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާގެ އިތުރުން، ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާ އެވެ.
ލ. ގަން-ތުނޑި، ރޯޝަންހިޔާ، އަހުމަދު ހުސާމްގެ މައްޗަށް އުފުލާފައިވަނީ، ކެނެބިސް ޓްރެފިކްކުރުމުގައި ބައިވެރިވުމުގެ ކުށުގެ ދައުވާ އާއި ކެނެބިސް ބޭނުންކުރުމުގެ ކުށުގެ ދައުވާ އެވެ. ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާ ލ. ގަން-ތުނޑި، ހަނދުވަރީހިޔާ، އަހުމަދު ޝަމްއޫންގެ މައްޗަށް ވެސް އުފުލި އެވެ.
މައްސަލާގައި ދެން ހިމެނޭ، މ. އަސަރީހަދާން، އާއިޝަތު ހަސްނާ ނާހިދުގެ މައްޗަށް، ކެނެބިހުން މުއާމަލާތުކުރުމުގެ ކުށުގެ ދައުވާ ވަނީ އުފުލާފަ އެވެ.
މަސްތުވާތަކެތީގެ މައްސަލައެއްގައި ޕެސްޓާއި އޭނާގެ އެކުވެރިންތަކެއްގެ މައްޗަށް ބޮޑެތި ދައުވާތަކެއް އައިސްފައިވާއިރު، ރާއްޖޭގެ ރެޕް ދާއިރާއަކީ ޕެސްޓަކީ އެންމެ ފާހަގަކޮށްލެވޭ އާޓިސްޓެވެ. އޭނާގެ ގިނަ ރެޕް ލަވަތަކާއި އަލްބަމްތައް ނެރެފައިވާއިރު، އެއީ މަގުބޫލުކަން ވަރަށް ބޮޑަށް ހޯދި އުފެދުންތަކެކެވެ.
ފެބުރުއަރީ މަހުގެ 13 ވަނަ ދުވަހު ޕެސްޓު ހައްޔަރުކުރި ފަހުން އޭނާގެ ބަންދު އެކި ފަހަރު މަތިން އިތުރު ކުރަމުން ގޮސްފައިވެ އެވެ. ފުލުހުން މައްސަލާގެ ތަހުގީގު ނިންމައި ޕްރޮސިކިއުޓާ ޖެނަރަލްގެ އޮފީހަށް ފޮނުވުމުން ދައުވާކޮށް ކޯޓަށް ފޮނުވާފައިވަނީ، މިދިޔަ ބުރާސްފަތި ދުވަހު އެވެ. ޝަރީއަތް އަވަހަށް ފެށިގެންދާނެ ކަމަށް ބެލެވެ އެވެ.
