މިދިޔަ މާޗް މަހުން ފެށިގެން އިންޑިއާގައި ކުއްލިއަކަށް ކޮވިޑް ކޭސް އިތުރުވީ ހަށިގަނޑުގައި އެންޓިބޮޑީޒް މަދުވުން ކަމަށް ވެދާނެ ކަމަށް ދިރާސާއިން ދައްކައިފި އެވެ.
ކައުންސިލް ފޯ ސައިންޓިފިކް އެންޑް އިންޑަސްޓްރިއަލް ރިސާޗް (ސީއެސްއައިއާރް) ގެ ދިރާސާގައި ބުނީ މިދިޔަ އަހަރު ކޮވިޑް ޖެހުނު މީީހުންގެ ގައިގައި އެންޓިބޮޑީޒް މަދުވުމަކީ ކޭސް އިތުރުވި ސަބަބަކަށް ވެދާނެ ކަމަށެވެ.
އެ ދިރާސާގައި 10،427 މީހުން ބައިވެރިވި އެވެ. އޭގެ ތެރޭގައި ސީއެސްއައިއާރްގެ 40 ލެބޯޓަރީގެ މުވައްޒަފުންނާއި އެ މީހުންގެ އާއިލާތައް ހިމެނެ އެވެ. އެ މީހުންގެ ހަށިގަނޑުގެ އެވްރެޖް ސީރޯޕޮޒިޓިވިޓީ ހުރީ 10.14 ޕަސެންޓުގަ އެވެ. ސީރޯޕޮޒިޓިވިޓީއަކީ މީހެއްގެ ހަށިގަނޑުގައި ވަކި ވައިރަހަކާ ދެކޮޅަށް އެންޓިބޮޑީޒް އުފެދިފައި ހުރުމެވެ.
ދިރާސާއިން ދެއްކި ގޮތުގައި ކުރިން ކޮވިޑް ޖެހުނު މީހުންގެ ހަށިގަނޑުގައި 6-5 މަސް ފަހުން އެންޓިބޮޑީޒް މަދުވާން ފަށާ ކަމަށް ބެލެވެ އެވެ. އެހެންކަމުން އަލުން ބަލި ޖެހުމުގެ ފުރުސަތު ބޮޑުވެ އެވެ.
އިންޑިއާގައި ކޮވިޑް ކޭސްތައް މިދިޔަ އަހަރު ޕީކަށް އެރީ ސެޕްޓެމްބަރު ގައެވެ. އޭގެ ފަހުން އޮކްޓޯބަރުން ފެށިގެން ކޭސްތައް ދިޔެއީ މަދުވަމުންނެވެ. ދިރާސާގައި އިސްކޮށް އުޅުނު ޝަންތަނު ސެންގުޕްތާ ވިދާޅުވީ ކުރިން ކޮވިޑް ޖެހުނު މީހުންގެ 20 ޕަސެންޓު މީހުންނަށް 6-5 މަސް ފަހުން ކޮވިޑާ ދެކޮޅަށް ރައްކާތެރިކަމެއް ނޯންނަ ކަމަށެވެ.
"އަޅުގަނޑުމެންނަށް ބެލެވޭ ގޮތުގައި ސެޕްޓެމްބަރު 2020 ގައި އައި ޕީކަށް ފަހު މާޗް 2021 ގައި ކުއްލިއަކަށް ކޭސް އިތުރުވީ މިކަމާ ގުޅުމެއް އޮވެގެން،" އޭނާ ވިދާޅުވި އެވެ.
