ކޮވިޑުގެ ދެ ވަނަ ރާޅަކާ ހަނގުރާމަ ކުރަމުންދާ އިންޑިއާގެ ހާލަތު ވަރަށް ގޯހެވެ. ވެރިރަށް ނިއު ދިއްލީ އާއި އެހެން ބޮޑެތި ސިޓީތަކުގެ ހޮސްޕިޓަލްތައް ހުރީ ފުރިފަ އެވެ. އޮކްސިޖަން ސަޕްލައި ހުސްވުމުގެ ސަބަބުން ބަލި މީހުންނަށް ފަރުވާ ކުރެވޭނެ ގޮތެއް ނެތި އެތައް ބަޔަކު ދަނީ މަރުވަމުންނެވެ. އެހެންކަމުން ބައެއް މީހުން މިހާރު ހިޔާރު ކުރަމުން ދަނީ އާއިލާގައި ކޮވިޑް ޖެހިފައި ތިބި މީހުންނަށް އަމިއްލައަށް ގޭގައި ފަރުވާ ދިނުމަށެވެ.
ގޭގައި އާއިލާގެ މެމްބަރުންނަށް ފަރުވާ ކުރަން ބޭނުންވާ ތަކެތި ވެސް ގަންނަން ޖެހެނީ ކަޅު ބާޒާރުގައި އަގު ބޮޑުކޮށެވެ. އޮކްސިޖަން ސިލިންޑަރާއި، އޮކްސިޖަން ކޮންސެންޓްރޭޓަރާއި، ޒަރޫރީ ބޭސް ފަދަ ތަކެތީގެ އަގުތައް ވަނީ ހިފެހެއްޓުމެއް ނެތި މައްޗަށް އަރާފަ އެވެ. ބޭސް ފިހާރަތަކުން މި ތަކެތި ހުސްވެފައި ވާތީ ގަންނަން ޖެހެނީ ކަޅު ބާޒާރުންނެވެ. އޮކްސިޖަން ސިލިންޑަރެއްގެ އަގު ހުރީ 670 ޑޮލަރަށެވެ. މީގެ ކުރިން ސިލިންޑަރެއް ލިބެނީ 80 ޑޮލަރަށެވެ.
އިންޑިއާގެ އާއްމުންގެ ފަރާތުން ލިބުނު މައުލޫމާތަށް ބިނާކޮށް ބީބީސީން އޮކްސިޖަން ސަޕްލައި ކުރާ ފަރާތްތަކަށް ގުޅުމުން ވެސް އަގުގެ ގޮތުގައި ބުނެފައި ވަނީ ކުރިން ވިއްކާ ވަރަށް ވުރެ 10 ގުނަ އިތުރު އަދަދެކެވެ.
ފުދުންތެރިކަން ހުރި އާއިލަތަކުން ދަނީ ޕްރައިވެޓް ނަރުހުންނާއި ޑޮކްޓަރުންނަށް ފައިސާ ދީގެން ގޭގައި ތިބި ބަލި މީހުންގެ ފުރާނަ ސަލާމަތް ކުރެވޭ ތޯ ބަލަމުންނެވެ.
އޮކްސިޖަން ހުސްވެފައިވާ ހޮސްޕިޓަލެއްގައި ފަރުވާ ދެވެން ނެތް ކަމަށް އަންގާފައިވާ ނޯޓިސް.-- ފޮޓޯ: ގެޓީ އިމޭޖަޒް
ފާއިތުވި ހަތަރު ދުވަހު ވެސް އިންޑިއާގައި ކޮންމެ ދުވަހަކު ތިން ލައްކައަށް ވުރެ ގިނަ މީހުން ކޮވިޑަށް ޕޮޒިޓިވްވެފައި ވެއެވެ. މި ކުއްލި އިތުރުވުމާ ގުޅިގެން ގިނަ ސިޓީތަކުގެ ސިއްހީ ނިޒާމަށް ވަނީ ލޮޅުން އަރާފަ އެވެ. އެހެންވެ ގޭގައި އާއިލާ މެމްބަރުންނަށް ފަރުވާ ދޭން ހިޔާރު ކުރާ މީހުން ދަނީ އިތުރުވަމުންނެވެ. އެކަމަކު އެމީހުންނަށް ވެސް ލޭގެ ޓެސްޓުތައް ހެދުމާއި ސީޓީ ސްކޭން ހެދުން ފަދަ ކަންކަން ކުރުމަށް ދައްޗެވެ.
އިންޑިއާގެ ލެބޯޓަރީތަކުގައި ޓެސްޓެއްގެ ނަތީޖާ ނިމުމަށް ދަނީ ތިން ދުވަސް ނަގަމުންނެވެ. މިހާ ވަގުތު ނެގުމަކީ ބަލި މީހާއަށް އަންނަމުންދާ ބަދަލު ދެނެގަނެ، އަވަސް ފަރުވާއަށް ހުރަސް އެޅޭނެ ކަމެކެވެ. ޑޮކްޓަރުން ބުނާ ގޮތުގައި ޓެސްޓުގެ ނަތީޖާ ލަސްވުމަކީ ވެސް ގިނަ ބަޔަކު މަރުވާން ދިމާވާ ސަބަބެކެވެ. ހާލަތު މިހެން ހުރިއިރު، ހޮސްޕިޓަލްތަކުން ވަނީ ސަޕްލައި ހުސްވެ، މީހުން މަރުވާތީ އެހީއަށް އެދިފަ އެވެ.
