އިންޑިއާއަށް ކުރިމަތިވެފައިވާ ކޮވިޑުގެ ދެ ވަނަ ރާޅުގައި ބަލި މީހުންނަށް ފަރުވާ ދޭ ތަކެތި ހުސްވެފައި ވާތީ އިނގިރޭސި ވިލާތުން ވެންޓިލޭޓަރާއި އޮކްސިޖަން އުފައްދާ ކޮންސެންޓްރޭޓަރު ފޮނުވަން ނިންމައިފި އެވެ.
އިންޑިއާގައި ހުންނަ އިނގިރޭސި ހައި ކޮމިޝަނުން ބުނީ ކޮވިޑް ބަލި މީހުންނަށް ފަރުވާ ދޭން ބޭނުންވާ މުހިއްމު 600 އަށް ވުރެ ގިނަ ތަކެތި ހަދިޔާ ކުރަން ނިންމާފައިވާ ކަމަށެވެ.
ވެންޓިލޭޓަރާއި އޮކްސިޖަން ކޮންސެންޓްރޭޓަރުގެ ފުރަތަމަ ޝިޕްމަންޓް އިންޑިއާއަށް ފޯރާނީ އަންގާރަ ދުވަހު އެވެ. އިތުރު ސާމާނު މި ހަފުތާގެ ފަހުކޮޅު ފޮނުވަން ވަނީ ރާވަފަ އެވެ.
އިނގިރޭސި ހައި ކޮމިޝަނުން ބުނީ އެހީ ފޯރުކޮށްދެނީ އިންޑިއާ ސަރުކާރުގެ އެދުމުގެ މަތިން ކަމަށެވެ. އިނގިރޭސި ބޮޑު ވަޒީރު ބޮރިސް ޖޯންސަން ވިދާޅުވީ ފޯރުކޮށްދެވެން އޮތް ހުރިހާ އެހީއަށް ފޯރުކޮށްދެމުން ދާނެ ކަމަށެވެ.
މިހާރު ފޮނުވަން ލިސްޓުކޮށްފައި ވަނީ 495 އޮކްސިޖަން ކޮންސެންޓްރޭޓަރާއި، 120 ނަން އިންވޭސިވް ވެންޓިލޭޓަރާއި، 20 މެނިއަލް ވެންޓިލޭޓަރެވެ.
އިންޑިއާގައި ކޮވިޑުގެ ހާލަތު ގޯސްވެފައި ވަނީ މާޗް މަހުން ފެށިގެންނެވެ. މިހާރު ދުވާލަކު 300،000 އަށް ވުރެ ގިނަ މީހުން ޕޮޒިޓިވްވެ، 2000 އަށް ވުރެ ގިނަ މީހުން މަރުވެ އެވެ.
