ލިވަޕޫލް (އޭޕްރީލް 25) - ލިވަޕޫލްގެ ހިންގަމުން އަންނަ އެމެރިކާގެ ފެންވޭ ސްޕޯޓްސް ގްރޫޕް (އެފްއެސްޖީ)ގެ ވެރިޔާ ޖޯން ހެންރީ އެ ކްލަބް ތިން ބިލިއަން ޕައުންޑް (4.1 ބިލިއަން ޑޮލަރު) އަށް ވިއްކާލަން ދެކޮޅު ހަދައިފި އެވެ.
މައްސަލަ ބޮޑުވެފައިވާ ޔޫރަޕިއަން ސުޕަ ލީގުގައި ލިވަޕޫލުން ބައިވެރިވާން އެންމެ ފުރަތަމަ ނިންމުމާ ގުޅިގެން ސަޕޯޓަރުންގެ ނުރުހުން ވަނީ އެފްއެސްޖީ އާއި ހެންރީ އަށް އަމާޒުވެފަ އެވެ. ސުޕަ ލީގުން ރަސްމީކޮށް ވަކިވިކަން ލިވަޕޫލުން އިއުލާނުކުރީ އެ ޓީމުގެ ކޯޗު ޔާގެން ކްލޮޕާއި ޓީމުގެ ކުޅުންތެރިން ސީނިއާ މެނޭޖްމަންޓްގެ އެ ނިންމުމާ މެދު ހިތްހަމަނުޖެހިފައި ހުއްޓަ އެވެ. އޭގެ ފަހުން ހެންރީ ވަނީ ލިވަޕޫލްގެ ރަސްމީ ސޯޝަލް މީޑިއާ ޕްލެޓްފޯމްތަކަށް ދޫކޮށްލި ވީޑިއޯ އެއް މެދުވެރިކޮށް ސަޕޯޓަރުން ކިބައިން ސުޕަ ލީގު މައްސަލައިގައި މައާފަށް އެދިފަ އެވެ.
ރިޕޯޓްތައް ބުނާގޮތުން ލިވަޕޫލް ގަންނަން ތިން ބިލިއަން ޕައުންޑް ހުށަހެޅީ އަރަބި ގައުމެއްގެ ސަރުކާރަކާ ގުޅުން އޮންނަ ކުންފުންޏަކުންނެވެ. އޮފާ ލިބުނުތަނުން އެފްއެސްޖީން ވަނީ އެ ހުށަހެޅުން އަނބުރާ ފޮނުވާލައިފަ އެވެ. އެފްއެސްޖީން ދާދި ފަހުން ވެސް ވަނީ ލިވަޕޫލަކީ އެ ކުންފުނީގެ ދުރު ރާސްތާ ޕްރޮޖެކްޓެއް ކަމަށް ބުނެފަ އެވެ.
ދާދި ފަހުން އެފްއެސްޖީން ވަނީ އެ މީހުންގެ ހިއްސާގެ ތެރެއިން 10 ޕަސެންޓް އެމެރިކާގެ ބާސްކެޓްބޯޅަ ކުޅުންތެރިޔާ ލެބްރަން ޖޭމްސްގެ ރެޑްބާޑް ކެޕިޓަލް އަށް 543 މިލިއަން ޕައުންޑަށް ވިއްކާލައިފަ އެވެ.
ޓޮމް ހިކްސް އާއި ޖޯޖް ޖިލެޓް އަތުން އެފްއެސްޖީން ލިވަޕޫލް ގަތީ 2010 ވަަނަ އަހަރު 300 މިިލިއަން ޕައުންޑް އަށެވެ. އެފްއެސްޖީން އެކި ޕްލޭންތައް ހަދައި ލިވަޕޫލް ވަރުގަދަ ކުރުމުގެ ނަތީޖާ އަކަށްވީ އެ ޓީމުން އިނގިރޭސި ޕްރިމިއާ ލީގާއި ޗެމްޕިއަންސް ލީގު އަދި ކްލަބް ވޯލްޑް ކަޕް ހޯދުމެވެ. އޭގެ އިތުރުން ޔުއެފާ ސުޕަ ކަޕް ތަށި ވެސް އުފުލާލި އެވެ.
އެފްއެސްޖީގެ ދައުރުގައި ލިވަޕޫލުން ވަނީ އެ ކްލަބްގެ ރަސްމީ ސްޓޭޑިއަމްގެ މެއިން ސްޓޭންޑް ތަރައްގީކޮށް ދަނޑަށް ވަދެވޭ ސަޕޯޓަރުންގެ ޖާގަ އިތުރުކޮށްފަ އެވެ. އަދި ލިވަޕޫލުން ޒަމާނުއްސުރެ ބޭނުންކުރަމުން އައި މެލްވުޑް ޓްރެއިނިން ފެސިލިޓީގެ ބަދަލުގައި ކާކްބީގެ ނަމުގައި ޒަމާނީ ފެންވަރުގެ ޓްރެއިނިން ފެލިސިޓީއެއް ގާއިމްކޮށް ދާދި ފަހުން ވަނީ ރަސްމީކޮށް ހުޅުވައިފަ އެވެ.
