މިދިޔަ ފެބްރުއަރީ މަހު އަސްކަރީ ބަގާވާތެއް ގެނައި މިޔަންމާގައި ހިނގަމުންދާ ލޭ އޮހޮރުވުންތައް ހުއްޓާލަން ދެކުނު އިރުމަތީ އޭޝިއާގެ ގައުމުތަކުގެ ލީޑަރުން މިޔަންމާގެ އަސްކަރީ ވެރިޔާއަށް ގޮވާލައިފި އެވެ.
ދެކުނު އިރުމަތީ އޭޝިއާ ގައުމުތަކުގެ "އާސިއާން" ސަމިޓުގައި އެހެން ގައުމުތަކުގެ ލީޑަރުން އެމަނިކުފާނަށް ގޮވާލެއްވީ ލޭ އޮހޮރުވުން ހުއްޓާލުމަށާއި ހައްޔަރުކޮށްފައިވާ މީހުން މިނިވަން ކުރުމަށެވެ. މިއީ އަސްކަރީ ލީޑަރު ޖެނެރަލް މިން އޯންގް ލެއިންގް ވެރިކަމާ ހަވާލުވެ ވަޑައިގެންނެވި ފަހުން ގައުމުން ބޭރަށް ކުރެއްވި ފުރަތަމަ ރަސްމީ ދަތުރުފުޅެވެ.
ބަގާވާތަށް ފަހު ހިނގަމުންދާ ހަމަނުޖެހުންތަކާ ގުޅިގެން މިހާތަނަށް 700 އަށް ވުރެ ގިނަ މީހުން މަރުވެފައި ވާއިރު އެތައް ހާސް ބަޔަކު ހައްޔަރުކޮށްފައި ވެއެވެ.
އިންޑޮނީޝިއާގައި އޮތް އޭސިއާން ސަމިޓަކީ މިޔަންމާގެ ކާރިސާ ނިމުމަކަށް ގެންނަން ބައިނަލްއަގްވާމީ ފެންވަރެއްގައި ކުރި އެންމެ ފުރަތަމަ މަސައްކަތެވެ.
ސަމިޓަށް ފަހު ނެރުނު ބަޔާނެއްގައި ވާ ގޮތުގައި، އާސިއާންގެ 10 ގައުމުގެ ލީޑަރުންނާއި ފޮރިން މިނިސްޓަރުން ފަސް ކަމަކަށް ވަނީ އެއްބަސްވެފަ އެވެ.
އެއީ ލޭ އޮހޮރުވުންތައް ވަގުތުން ހުއްޓާލުމާއި، އަސްކަރިއްޔާ އާއި އާއްމުންގެ ލީޑަރުންނާ ދެމެދު މަޝްވަރާ ފެށުމާއި، އެ މަޝްވަރާގެ ފާރަވެރި ފަރާތެއްގެ ގޮތުގައި އޭސިއާންގެ މަންދޫބެއް ހަމަޖެއްސުމާއި، އެ މަންދޫބު ހާއްސަ ޓީމަކާ އެކު މިޔަންމާއަށް ދަތުރު ކުރުމެވެ. މީގެ އިތުރުން އޭސިއާން ގައުމުތަކުން މިޔަންމާއަށް އިންސާނީ އެހީ ފޯރުކޮށްދޭން ވެސް ނިންމި އެވެ.
މިޔަންމާގައި ބަގާވާތަށް ފަހު އުވާލި ގާނޫނު ހަދާ މަޖިލީހުގެ ބައެއް މެމްބަރުންނާއި އާއްމުން ތަމްސީލް ކުރާ ލީޑަރުން އެކުވެގެން އުފައްދާފައިވާ އެއްބައިވަންތަކަމުގެ ސަރުކާރުން ވަނީ އާސިއާންގެ ނިންމުންތަކަށް މަރުހަބާ ކިޔާފަ އެވެ.
