މިޔަންމާގެ ބަގާވާތަށް ފަހު އުވާލި ގާނޫނު ހަދާ މަޖިލިސް ތަމްސީލް ކުރާ ކޮމިޓީން އެއްބައިވަންތަކަމުގެ ސަރުކާރެއް އިއުލާނުކޮށްފި އެވެ.
އެ ސަރުކާރުގައި ހިމެނެނީ މަޖިލީހުން ވަކިކުރި ބައެއް މެމްބަރުންނާއި ބަގާވާތާ ދެކޮޅަށް އިސްކޮށް އުޅޭ ލީޑަރުންނެވެ. އެ ސަރުކާރުގެ ލަނޑުދަނޑިއަކީ އަސްކަރީ ވެރިކަން ނިމުމަކަށް ގެނައުމެވެ.
އެއްބައިވަންތަ ސަރުކާރު އުފެއްދިކަން އިއުލާނު ކުރެއްވީ އުވާލާފައިވާ މަޖިލީހުގެ ފަރާތުން އދ. އަށް ކަނޑައަޅާފައި ހުންނަ މަންދޫބު ޑރ. ސާސާ އެވެ.
"މިޔަންމާގެ ތާރީހުގައި ފުރަތަމަ ފަހަރަށް އެއްބައިވަންތަކަމުގެ ސަރުކާރެއް އެކުލަވާލައިފިން،" ސޯޝަލް މީޑިއާގައި ކުރެއްވި ޕޯސްޓުގައި ސާސާ ވިދާޅުވި އެވެ.
އެ ސަރުކާރުގެ ރައީސްގެ ގޮތުގައި ކަނޑައަޅާފައި ހުންނެވީ ވިން މިންޓް އެވެ. އަދި މި ވަގުތު ހައްޔަރުކޮށްފައި ހުންނެވީ ލީޑަރު އަންގް ސަންގް ސޫ ކީ ކަނޑައަޅާފައި ވަނީ ދައުލަތަށް ލަފާދޭ ކައުންސިލަރެއްގެ މަގާމަށެވެ.
މިޔަންމާގެ ނައިބު ރައީސް މަން ވިން ހައިން ތަން ކަނޑައަޅާފައި ވަނީ ވަގުތީ ބޮޑުވަޒީރު ކަމަށެވެ. އަދި ސާސާ ކަނޑައަޅާފައި ވަނީ ބައިނަލްއަގްވާމީ ގުޅުންތަކާ ބެހޭ މިނިސްޓަރުގެ މަގާމަށެވެ.
ފެބްރުއަރީ އެއް ވަނަ ދުވަހުގެ އަސްކަރީ ބަގާވާތަށް ފަހު މިޔަންމާގެ އެކި ހިސާބުތަކުގައި ދަނީ މެދުކެނޑުމެއް ނެތި އެއްވުންތައް ބާއްވަމުންނެވެ. އެއްވުންތަކުގައި ލޭއޮހޮރުވުން ބޮޑުވެ މިހާތަނަށް 700 އަށް ވުރެ ގިނަ މީހުން މަރުވެފައި ވެއެވެ.
