އޮކްސިޖަން ސަޕްލައި ހުސްވުމުގެ ސަބަބުން ކޮވިޑް ބަލި މީހުންނަށް ފަރުވާ ކުރެވޭނެ ގޮތެއް ނެތިފައިވާ އިންޑިއާގެ ހޮސްޕިޓަލްތަކުން އެހީއަށް އެދިއްޖެ އެވެ.
އިންޑިއާއިން ވަނީ ޖެހިޖެހިގެން ތިން ވަނަ ދުވަހަކު ރިކޯޑް އަދަދަކަށް އެއް ދުވަހެއްގެ ތެރޭގައި މީހުން ކޮވިޑަށް ޕޮޒިޓިވްވެފަ އެވެ. އިއްޔެ އެކަނިވެސް 346،786 މީހުން ޕޮޒިޓިވްވި އެވެ. އެހެންކަމުން ތިން ދުވަހުގެ ތެރޭގައި ގާތްގަނޑަކަށް މިލިއަނެއްހާ މީހުން ޕޮޒިޓިވްވެފައި ވެއެވެ.
ވެރިރަށް ނިއު ދިއްލީގައި ހުންނަ ޖައިޕޫރު ގޯލްޑަން ހޮސްޕިޓަލުގައި ރޭ ވެސް އޮކްސިޖަން ނުލިބި 20 މީހުން މަރުވި ކަމަށް އެ ތަނުގެ އޮފިޝަލުން ބުނެ އެވެ.
ދިއްލީގެ ހޯލީ ފެމިލީ ހޮސްޕިޓަލުން ބުނީ އައިސީޔޫ އެނދުތައް ފުރިފައިވާ ކަމަށާއި އިތުރު ބަލި މީހަކު އެޑްމިޓު ކުރެވޭނެ ޖާގަ ނެތް ކަމަށެވެ.
އިންޑިއާގެ މައި ސަރުކާރުން ބުނީ އޮކްސިޖަނާއި އެހެން ތަކެތި ސަޕްލައި ކުރަން ރޭލުތަކާއި އަސްކަރީ ވައިގެ އުޅަނދުތައް އެންމެ ބޮޑަށް އަސަރުކޮށްފައިވާ ހިސާބުތަކަށް ފޮނުވާނެ ކަމަށެވެ.
ޖައިޕޫރު ގޯލްޑަން ހޮސްޕިޓަލުން ބުނީ އެ ތަނަށް 3.6 ޓަނުގެ އޮކްސިޖަން ހުކުރު ދުވަހު ފޮނުވާނެ ކަމަށް ސަރުކާރުން ބުނި ނަމަވެސް ލިބިފައި ވަނީ ވަރަށް ކުޑަ މިންވަރެއް ކަމަށެވެ.
ޓީވީ މެދުވެރިކޮށް ދެއްވި އިންޓަވިއުއެއްގައި ދިއްލީގެ ޗީފް މިނިސްޓަރު އަރްވިންދް ކެޖްރިވާލް ވަނީ ވީ އެންމެ އަވަހަކަށް އެ ސިޓީއަށް އޮޮކްސިޖަން ފޯރުކޮށްދިނުމަށް އާދޭސް ދަންނަވާފަ އެވެ.
އޭނާ ގޮވާލެއްވީ އިންޑިއާގެ ހުރިހާ އޮކްސިޖަން އުފައްދާ ޕްލާންޓުތަކެއް ސަރުކާރުގެ ދަށަށް ގެނެސް، އަސްކަރިއްޔާއިން ޕްރޮޑަކްޝަނާއި ސަޕްލައި ބެލެހެއްޓުމަށެވެ.
މިދިޔަ ހުކުރު ދުވަހު 2،263 މީހުން މަރުވި އެވެ. އިއްޔެ މި އަދަދު ވަނީ 2،624 އަށް އިތުރުވެފަ އެވެ. ގިނަ ބަޔަކު މަރުވަމުން ދަނީ އެއްވެސް ފަރުވާއެއް ނުލިބި އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ އިންޑިއާގެ ހާލަތަކީ މި ކޮރޯނާވައިރަހުން ކުރާ ނޭދެވޭ އަސަރު އެންމެންނަށް ހަނދާންކޮށްދޭ ހާލަތެއް ކަމަށެވެ.
މި އަހަރު ފެށިއިރު އިންޑިއާ ސަރުކާރުން ގަބޫލުކުރީ އެ ގައުމަށް މި ވައިރަސް ބަލި ކުރެވިފައިވާ ކަމަށެވެ. ފެބްރުއަރީ މަހު އެ ގައުމުން ޕޮޒިޓިވްވީ ދުވާލަކު 11،000 އެއްހާ މީހުންނެވެ. އެއާއެކު ވެކްސިން ޕްރޮގްރާމް ފަށާ، އެހެން ގައުމުތަކަށް ވެކްސިން އެކްސްޕޯޓް ކުރަން ފެށި އެވެ. އެކަމަކު މާޗް މަސް ފެށިއިރު، އިންޑިއާ އަނެއްކާވެސް އޮތީ ނުރައްކާތެރި ފައްތަރެއްގަ އެވެ.
އޭގެ ފަހުން ހިފެހެއްޓުމެއް ނެތި އަދަދުތައް އިތުރުވާން ފަށާފައި ވާއިރު، އިންޑިއާއިން ވަނީ މި ވައިރަހުގެ އާ ވޭރިއަންޓެއް ވެސް ފެނިފަ އެވެ. އަދަދުތައް މަތިވި ނަމަވެސް ހިންދޫ ދީނުގެ މީހުން ވަނީ އެ ދީނުގެ އެންމެ ބޮޑު ފެސްޓިވަލަށް މިލިއަން މީހުން ޖަމާކޮށްފަ އެވެ.
