މެޑްރިޑް (އޭޕްރީލް 25) - ސްޕެނިޝް ލީގުގައި ރޭ ކުޅުނު މެޗުން ރެއާލް ބެޓިސްއާ 0-0 އިން އެއްވަރުވެ ލީގުގެ އެއް ވަަނަ އަށް އަރަން ލިބުނު ފުރުސަތު އެންމެ ފަހުގެ ޗެމްޕިއަން ރެއާލް މެޑްރިޑުން ނަގާލައިފި އެވެ.
ރޭގެ ނަތީޖާއާ އެކު ރެއާލް ދެ ވަނައިގައި އޮތީ 33 މެޗުން 71 ޕޮއިންޓާ އެކު އެވެ. އެއް ވަނައިގައި އޮތް އެތުލެޓިކޯ މެޑްރިޑަށް 32 މެޗުން 73 ޕޮއިންޓް ލިބިފައިވާއިރު، މިރޭ އެތުލެޓިކް ބިލްބާއޯ ބަލިކޮށްގެން އެތުލެޓިކޯ އަށް އެއް ވަނައިގައި ލީޑުފުޅާކުރެވޭނެ އެވެ. ތިން ވަނައިގައި އޮތް ބާސެލޯނާ އަށް 31 މެޗުން ލިބިފައިވަނީ 68 ޕޮއިންޓެވެ.
ރެއާލްގެ ކޯޗު ޒިނެދިން ޒިދާން ބުނީ ލީގުގެ ރޭހުގައި ރެއާލަށް މި ދެ ޕޮއިންޓާ އެކު ގެއްލިގެންދިޔައީ ބޮޑު ފުރުސަތެއް ކަމަށެވެ.
"އަހަރެމެން ވަރަށް ޑިފެންސިވްލީ މި މެޗުގައި ރަނގަޅު. އެކަމަކު އެޓޭކް ފެނުނީ ވަރަށް ދަށްކޮށް. އެކަމަކު މިއީ ނިމުމެއް ނޫން. އަހަރެމެން އެންމެ ފަހު ވަގުތާ ހަމައަށް މި ރޭހުގައި އޮންނަން ބޭނުން. އަދި މެޗުތަކެއް އެބަހުރި އަހަރެމެންނަށް ވެސް ފައިދާނެގޭނެ،" ޒިދާން ބުންޏެވެ.
ރޭގެ މެޗުގައި ރެއާލަށް ގޯލެއް ޖަހައިދިނުމާ އެންމެ ގާތަށް ޖެހިލީ ބްރެޒިލްގެ ވިންގް ރޮޑްރީގޯ އެވެ. އޭނާ ފޮނުވާލި ބޯޅައެއް ވަނީ ގޯލުގެ ހުރަސްދަނޑިއަށް އަމާޒުވެފަ އެވެ. މި މެޗުގައި ރެއާލް ހުއްޓުވަން ބެޓިސްގެ ތަޖުރިބާކާރު ގޯލްކީޕަރު ކްލައުޑިއޯ ބްރާވޯ ވަނީ މޮޅު ކުޅުމެއް ދައްކައިފަ އެވެ. އޭނާ ވަނީ ރެއާލުން ފޮނުވި ފަސް ހަމަލާއެއް މަތަކޮށްފަ އެވެ. ރޭގެ ނަތީޖާއާ އެކު ބެޓިސް ވެފައިވަނީ ރެއާލް ދަނޑުގައި ޖެހިޖެހިގެން ހަތަރު މެޗުގައި ލަނޑެއް ނުވައްދައި މެޗު ނިންމާލި ފުރަތަމަ ޓީމަށެވެ.
ބެޓިސް އަށް ވެސް މި މެޗުން މޮޅުވާން ފުރުސަތު ލިބުނެވެ. އެ ޓީމުގެ ގީޑޯ ރޮޑްރިގޭޒް ފޮނުވާލި ބޯޅަ ރެއާލްގެ ކީޕަރު ތިބައު ކޯޓުއާ ވަނީ މަތަކޮށްފަ އެވެ.
ރޭގެ މެޗުގައި ރެއާލްގެ ބެލްޖިއަމް ތަރި އެޑެން ހަޒާޑް ވަނީ 77 ވަނަ މިނިޓްގައި ކުޅެން ނިކުމެފަ އެވެ. މިއީ މިދިިޔަ މަހު 13 ވަނަ ދުވަހަށް ފަހު ހަޒާޑް އަނިޔާއިން ރަނގަޅުވެގެން ކުޅުނު ފުރަތަމަ މެޗެވެ. ރެއާލް ދެން އެންމެ އަވަހަށް ކުޅޭ މެޗުގައި ޗެމްޕިއަންސް ލީގުގެ ސެމީ ފައިނަލުގައި ކުޅޭނީ ހަޒާޑްގެ ކުުރީގެ ކްލަބް ޗެލްސީއާ ދެކޮޅަށެވެ.
