ކޮވިޑްގެ ގިނަ ކޭސްތަކެއް ރަށްތަކުން ފެނި، ރެކޯޑް އަދަދަކަށް މީހުން މިދިޔަ 24 ގަޑިއިރު ތެރޭގައި ޕޮޒިޓިވްވެފައިވާކަން އެޗްޕީއޭން ހާމަކޮށްފި އެވެ.
މިއަދު، އެކި ރަށްރަށުން ޖުމްލަ 182 މީހަކު ކޮވިޑަށް ޕޮޒިޓިވްވެފައިވާއިރު މިއީ އެއް ދުވަހެއްގައި ރަށްރަށުން މިފަހުން އެންމެ ގިނަ މީހުން ޕޮޒިޓިވްވި ދުވަހެވެ.
މާލޭން ވެސް މިއަދު ވަނީ 108 މީހަކު ޕޮޒިޓިވްވެފައިވާއިު ރިސޯޓްތަކުން 21 މީހަކު ޕޮޒިޓިވްވި އެވެ. އެއާއެކު، ޖުމްލަ އަދަދު 319 އަށް އަރާއިރު ވޭތުވެދިޔަ ދެ ހަފުތާ ތެރޭގައި ވެސް ކޮވިޑްގެ އަދަދު މިހާ މައްޗަށް އަރައިގެން ގޮސްފައިނުވެ އެވެ.
އެގޮތުން، މާލެ އާއި ރަށްރަށް ހިމެނޭ ގޮތަށް މި ނިމިދިޔަ ހަފުތާ ކޮވިޑްގެ ކޭސްތަކުގެ އަދަދު ހުރީ 100 އާއި 200 އާ ދެމެދު އެވެ.
މިވަގުތު ރާއްޖޭގައި ކޮވިޑްގެ ޖުމްލަ 3،207 މީހަކު ކޮވިޑް ބަލީގައި އެބަ ތިއްބެވެ. އޭގެ ތެރޭގައި ހޮސްޕިޓަލްގައި 98 މީހަކަށް ދަނީ ދަރުވާދެމުންނެވެ.
މިއަދު ކޭސްތަކުގެ އަދަދު ރެކޯޑް މިންވަރަކަށް ރިޕޯޓް ކުރެވިފައިވާ އެއް ސަބަބަކީ، އއ. މަތިވެރި އާއި ކ. މާފުށީގައި ބަލި ހަލުވިކަމާއެކު ފެތުރުމެވެ. އެގޮތުން މަތިވެރީގައި މިއަދު އެކަނި 65 މީހަކު ޕޮޒިޓިވެފައިވާއިރު، މާފުށީގައި ކޮވިޑްގެ ބަލީގެ 42 މީހަކު އެބަ ތިއްބެވެ. މި ދެ ރަށަކީ ވެސް ގިނަ އަދަދެއްގެ ގެސްޓްހައުސްތައް ހުންނަ ދެ ރަށަށްވާއިރު ޓޫރިސްޓުން ވެސް އެ ރަށްރަށުގައި އެބަ ތިއްބެވެ.
އެހެންވެ، އެ ދެ ރަށުގައި ބަލި ފެތުރެމުންދާތީ، ރައްޔިތުންގެ މެދުގައި ނުތަނަވަސްކަން ވަރަށް ބޮޑަށް އެބަ އޮތެވެ.
ދެ ރަށުގެ އިތުރުން، ބ. އޭފުއްޓަށް ވެސް ވަނީ ކޮވިޑް ބަލި ފެތުރިފަ އެވެ. އެގޮތުން، އެ ރަށުގައި ކޮވިޑް ބަލީގެ 25 މީހުން ތިބިއިރު، އޭގެ ތެރޭގައި އެ ރަށު ހޮސްޕިޓަލްގެ ބައެއް ފަރާތްތައް ވެސް ހިމެނެ އެވެ.
އޭދަފުއްޓާއި މާފުށި އަދި، މަތިވެރީގެ އެއްކޮށް މިވަގުތު، އަރާފޭބުން މަނާކޮށް މޮނީޓަރިން ހާލަތުގައި ޖުމްލަ 16 މީހުން ދިރިއުޅޭ ރަށާއި ސިނާއީ ދެ ރަށް ކަމަށްވާ، ތިލަފުށި އަދި މަންދޫ އެބަ އޮތެވެ. މަނަދޫގައި ޕޮޒިޓިވް 10 މީހުން ތިބިއިރު، ތިލަފުށީގައި ހުރީ އެކަކެވެ.
އެހެން ރަށްރަށުގައި ވެސް ކޮވިޑްގެ ކޭސްތައް ފެނިފައިވާއިރު ކަރަންޓީނުގައި ވެސް ގިނަ އަދަދެއްގެ މީހުން އެބަ ތިއްބެވެ.
ރަށްރަށުން ކޮވިޑްގެ ކޭސްތައް ފެންނަ މިންވަރު އިތުރުވެފައިވާއިރު، އެޗްޕީއޭއިން މާލޭން ރަށްރަށަށް ދިޔުމުގައި ކޮވިޑް ވެކްސިނާ ގުޅިގެން ބޮޑެތި ލުއިތަކެއް ވެސް ދީފަ އެވެ. އެގޮތުން ރަށްރަށަށް މާލޭން ކަރަންޓީނުވެގެން ނޫނީ ނުދެވޭ ގޮތަށް މީގެ އެއް އަހަރު ދުވަސް ކުރިން އަމަލު ކުރަން ފެށި އުސޫލަށް ވަނީ ބަދަލު ގެނެސްފަ އެވެ.
އެގޮތުން، އެޗްޕީއޭން އެންމެފަހުން ނެރެފައިވާ ގައިޑްލައިންގައިވާ ގޮތުން އާބާދީގެ 60 ޕަސެންޓް މީހުންނަށް ކޮވިޑްގެ ވެކްސިންގެ ދެ ޑޯޒް ހަމަވެފައިވާނަމަ، އެ ރަށަކަށް ކަރަންޓީނުވުމަކާ ނުލައި ދަތުރުކުރެވޭނެ އެވެ. އަދި، އާބާދީގެ 60 ޕަސެންޓް މީހުންނަށް ވެކްސިން ފުރިހަމަކޮށްފައި ނުވާ ރަށްރަށަށް، ވެކްސިންގެ ދެ ޑޯޒް ޖެހުމަށްފަހު ދެ ހަފުތާވެފައިވާ ފަރާތްތަކަށް ކަރަންޓީނުވުމަކާ ނުލައި މިހާރު ދަތުރު ކުރެވޭނެ އެވެ.
ނަމަވެސް، މިހާތަނަށް އެއްވެސް ރަށެއްގައި އާބާދީގެ 60 ޕަސެންޓް، ކޮވިޑް ވެކްސިން ފުރިހަމަކޮށްފައެއް ނުވެ އެވެ.
