ޓޫރިސްޓުންގެ ގޮތުގައި އަންނަ މީހުން ފިޔަވައި، އިންޑިއާއިން ރާއްޖެ އަންނަ އެހެން މީހުން ގޭގައި ކަރަންޓީނުވުމަށް އަންގައިފި އެވެ.
އިންޑިއާއިން ދަތުރު ކުރާ މީހުން ކަރަންޓީނުވާން ޖެހޭ ގޮތަށް ހަދާފައިމިވަނީ އިންޑިއާގައި ކޮވިޑްގެ ހާލަތު ގޯހުން ގޯހަށް ގޮސްފައިވާތީ އެވެ. އެ ގައުމުން އާ ވައްތަރެއްގެ ކޮވިޑް ވޭރިއެންޓެއް ފެނިފައިވާއިރު އެތައް ލައްކަ މީހުންނަކަށް ކޮންމެ ދުވަހަކު ދަނީ ކޮވިޑް ޖެހެމުންނެވެ. ހޮސްޕިޓަލްތައް ފުރި، އެ ގައުމު ވަނީ އޮކްސިޖަންއަށް ވެސް ޖެހިފަ އެވެ.
އިމިގްރޭޝަނުން ނެރެފައިވާ އިއުލާނެއްގައި ބުނެފައިވަނީ ޓޫރިސްޓު ވިސާގައި ރާއްޖެ އަންނަ މީހުން ނޫން އެހެން މީހުން 10 ދުވަހުގެ ކަރަންޓީނު މުއްދަތެއްގައި ގޭގައި މަޑުކުރުން މަޖުބޫރުވާނެ ކަމާއި، މީގެ ތެރޭގައި ވެކްސިން ފުރިހަމަ ކޮށްފައިވާ މީހުން އިސްތިސްނާނުވާނެ ކަމަށް ވެސްވެ އެވެ.
އިންޑިއާއިން އަންނަ މީހުންނަށް ފިޔަވަޅު އެޅީ، ދަތުރު ކުރުމުގައި ބޮޑެތި ލުއިތަކެއް އެޗްޕީއޭއިން ދިންތާ ދުވަސްކޮޅެއް ފަހުންނެވެ. އެގޮތުން، އެންމެ ފަހުން އެޗްޕީއޭއިން ނެރުނު ގައިޑްލައިންގައިވާ ގޮތުން، ޓޫރިސްޓުން ހިމެނޭ ގޮތަށް، ވެކްސިންގެ ދެ ޑޯޒު ފުރިހަމަކޮށް ދެ ހަފުތާ ވެފައިވާނަމަ، ރާއްޖެއަށް ދަތުރުކުރާއިރު ނެގެޓިވް ޕީސީއާރު ޓެސްޓް އޮންނަން ނުޖެހުމާއި، ކަރަންޓީނުވާން ނުޖެހޭނެ އެވެ.
އިންޑިއާގެ ހާލަތު ގޯސްވެފައިވާއިރު، ގިނަ ގައުމުތަކަކުން ވަނީ އިންޑިއާއިން ދަތުރު އެ ގައުމުތަކަށް ދަތުރު ކުރުން މަނާ ކުރުން ފަދަ ހަރުކަށި ފިޔަވަޅުތައް އަޅާފަ އެވެ. އޭގެ އެންމެ ބޮޑު ސަބަބަކީ، ބާރަށް ފެތެރެމުންދާ އާ ވެރިއެންޓުން ސަލާމަތްވުމެވެ.
ރާއްޖެއިން އިންޑިއާއިން އަންނަ މީހުން ކަރަންޓީނުވާން އެންގި ނަމަވެސް، އިންޑިއާއިން މިވަގުތު ރާއްޖެއަށް އެންމެ ގިނައިން އަންނަނީ ޓޫރިސްޓުން ކަމުން އެ ފަރާތްތަކާމެދު ފިޔަވަޅެއް ނެތުމުން ބައެއް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.
ކޮވިޑާ ގުޅޭ ގޮތުން ބޯޑަރު ބަންދު ކުރުމަށްފަހު، އަލުން ހުޅުވާލިފަހުން އެންމެ ގިނައިން ރާއްޖެއަށް އަންނަމުން ދަނީ އިންޑިއާ ޓޫރިސްޓުންނެވެ.
