ކޮވިޑް ބަލިމަޑުކަމުގެ ތެރޭގައި އޮކްސިޖަން ނުލިބި ބޮޑު ކާރިސާއެއް ކުރިމަތިވެފައި ވާތީ އިންޑިއާގެ ވެރިރަށް ނިއު ދިއްލީގެ ހައި ކޯޓުން ބޮޑު ވަޒީރު ނަރެންދްރަ މޯދީގެ ސަރުކާރަށް ފާޑުކިޔައިފި އެވެ.
އިއްޔެ އިންޑިއާގައި ވަނީ ކޮވިޑް ޖެހިގެން 2،023 މީހުން މަރުވެފަ އެވެ. މަރުވި މީހުންގެ ތެރެއިން 200 އަށް ވުރެ ގިނަ މީހުން ނިސްބަތްވަނީ ދިއްލީ އަށެވެ.
އިންޑިއާގައި ކޮވިޑުގެ ހާލަތު އެންމެ ގޯސްކޮށް އޮތް ދިއްލީގައި ހޮސްޕިޓަލްތައް ފުރި، ބަލި މީހުންނަށް ފަރުވާ ދޭނެ އޮކްސިޖަން ވެސް ނުލިބެ އެވެ. އެހެންވެ ގިނަ ބަޔަކު މަރުވަނީ ފަރުވާއަށް އާދޭސް ކުރަނިކޮށެވެ.
އިއްޔެ ދިއްލީ ހައި ކޯޓުން ވަނީ އަމިއްލަ ފަރާތްތަކުން ހިންގާ ހަ ހޮސްޕިޓަލަކުން ހުށަހެޅި މައްސަލައެއްގެ ބަލާފަ އެވެ. އެގޮތުން ކޯޓުން ސަރުކާރަށް އަމުރު ކުރީ ފެކްޓަރީތަކުން އިންޑިއާގެ ހުރިހާ ހޮސްޕިޓަލަކަށް ފަސޭހަކަމާއެެކު އޮކްސިޖަން ފޯރުކޮށްދެވޭނެ އިންތިޒާމް ރޭވުމަށެވެ.
"މިއީ ގަބޫލުކުރަން ދަތި ހާލަތެއް. އަޅުގަނޑުމެން ބަލަން ބޭނުންވާ މައި ސަރުކާރުން އޮކްސިޖަން ސަޕްލައިއަށް ހަދަމުންދާ ގޮތެއް،" ހުކުމް އިއްވަވަމުން ފަނޑިޔާރަކު ވިދާޅުވި އެވެ.
އޭގެ އިތުރުން ރައްޔިތުންނަށް އޮކްސިޖަން ސަޕްލައި ޔަގީން ކުރުމަށް "ސަލާން ޖަހައިގެން، ދަރަންޏަށް ނަގައިގެން ނުވަތަ ވަގަށް ނަގައިގެން" މަސައްކަތް ކުރުމަކީ މައި ސަރުކާރުގެ ޒިންމާއެއް ކަމަށް ވިދާޅުވި އެވެ.
މިހާތަނަށް އޮކްސިޖަން ނުލިބިގެން މަރުވީ ކިހާ އަދަދެއްގެ މީހުން ކަމެއް ސާފެއް ނޫނެވެ. އެކަމަކު އިންޑިއާގެ ސޯޝަލް މީޑިއާއަށް ބަލާލި ނަމަވެސް މި ވަގުތުން ފެނިގެން ދަނީ އޮކްސިޖަނަށް އެދި އާދޭސް ކުރާ މީހުންގެ ޕޯސްޓުތަކެވެ.
އިންޑިއާގެ ހުރިހާ ބޮޑެތި ސިޓީއެއްގެ ހޮސްޕިޓަލްތައް ފުރިބަރާވެފައި ވާއިރު، ފަރުވާ ބޭނުންވާ އާއްމުން ދަނީ ހޮސްޕިޓަލްތަކުގެ ބޭރަށް ޖަމާވަމުންނެވެ. އެކަމަކު ކޭސްތައް އިތުރުވެފައި ވަނީ ސިއްހީ ފަރާތްތަކަށް ނުކަތާ ވަރަށެވެ.
