އިންޑިއާގައި ކޮވިޑު ޖެހިގެން ފާއިތުވި 24 ގަޑިއިރު ތެރޭގައި ދެ ހާހަށް ވުރެ ގިނަ މީހުން މަރުވެއްޖެ އެވެ. މިއީ އެއް ދުވަހެއްގެ ތެރޭގައި މަރުވި މީހުންގެ ރިކޯޑު އަދަދެކެވެ.
މި އަހަރުގެ މާޗް މަހުން ފެށިގެން ކުއްލިއަކަށް އަދަދުތައް މަތި ވާން ފެށި އިންޑިއާގެ ހާލަތު ވަރަށް ގޯހެވެ. ފަރުވާ ދޭން ބޭނުން ކުރާ އޮކްސިޖަނާއި ބޭސް ހުސްވުމުން ގިނަ ބަޔަކު މަރުވަނީ ފަރުވާ ނުލިބި އެވެ.
އޭގެ އިތުރުން ވެކްސިން ދޭ މަރުކަޒުތަކުން ވެކްސިން ހުސްވެފައި ވާތީ ވެކްސިން ދެވޭނެ ގޮތެއް ވެސް ވަރަށް ގިނަ ހިސާބުތަކުގައި ނެތެވެ.
އެ ގައުމުގެ ހެލްތު މިނިސްޓްރީގެ ތަފާސްހިސާބު ދައްކާ ގޮތުން ފާއިތުވި 24 ގަޑިއިރުގެ ތެރޭގައި ދެ ހާސް މީހުން މަރުވެ، މުޅި ޖުމްލަ މަރުވި މީހުންގެ އަދަދު ވަނީ 182،553 އަށް އަރާފަ އެވެ.
އެއް ދުވަސް ތެރޭ ރިކޯޑް އަދަދަކަށް ވަނީ ޕޮޒިޓިވް ކޭސް ވެސް ފެނިފަ އެވެ. މިދިޔަ ހަފްތާގައި ދުވާލެއްގެ މައްޗަށް ދެ ލައްކަ ކޭސް ފެންނަމުން ގޮސް، ފާއިތުވި 24 ގަޑިއިރު ތެރޭގައި އަދަދު ވަނީ ތިން ލައްކައާ ގާތްކޮށްފަ އެވެ.
އެ ގައުމުގައި މިހާރު ޖުމްލަ ޕޮޒިޓިވް ކޭސްގެ އަދަދަކީ 15.6 މިލިއަނެވެ. އަދިވެސް މިއީ އެންމެ އަދަދުތައް މަތިކޮށް އުޅޭ އެމެރިކާގެ 31 މިލިއަން ކޭސްއަށް ވުރެ ދަށް އަދަދެކެވެ. ނަމަވެސް ހިފެހެއްޓުމެއް ނެތި އިންޑިއާގެ އަދަދުތައް މަތިވާ ނަމަ. ހާލަތު އިތުރަށް ގޯސްވުމުގެ ބިރު ބޮޑެވެ.
