ދިވެހި އެމްޕްލޯއިމަންޓް އެޖެންސީތަކަށް ފުރުސަތު ނުދީ އިންޑިއާގެ އެޖެންސީއެއް މެދުވެރިކޮށް ހެލްތު މިނިސްޓްރީން 520 މަގާމަކަށް މީހުން ހޯދާތީ، ޔޫނިއަން ފޯ އެމްޕްލޯއިމަންޓް އެޖެންސީ އޮފް ދަ މޯލްޑިވްސްއިން މިއަދު ކަންބޮޑުވުން ފާޅުކޮށްފި އެވެ.
ހެލްތު މިނިސްޓްރީގައި ރަޖިސްޓްރީކޮށްގެން، އެ މިނިސްޓްރީއަށް ބިދޭސީ ޑޮކްޓަރުންނާއި އެހެނިހެން ހެލްތް ޕްރޮފެޝަނަލުން ގެންނަމުން އަންނަނީ ރާއްޖޭގައި ރަޖިސްޓްރީކޮށްގެން ހިންގަމުން އަންނަ އެޖެންސީތައް މެދުވެރިކޮށެވެ.
ހެލްތު މިނިސްޓްރީން މިދިޔަ މަހު ވަނީ ހޮސްޕިޓަލް އަދި ސިއްހީ މަރުކަޒުތަކަށް ބޭނުންވާ ފަންނީ މަގާމުތަކުގެ ތެރެއިން ދިވެހިން ނުލިބޭ މަގާމުތަކަށް ބިދޭސީން ރެކްރޫޓްކުރަމުން ގެންދާ ގޮތަށް ބަދަލުތަކެއް ގެނެސްފަ އެވެ.
އެގޮތުން ބިދޭސީން ރެކްރޫޓް ކުރުމުގެ މަސައްކަތްތައް މިނިސްޓްރީގެ ފޮރިން ރެކްރޫޓްމަންޓް ސެކްޝަނުން ކުރިއަށް ގެންދާގޮތަށް ނިންމައި، އެޕްލިކޭޝަންތައް އެ ދުވަހުން ފެށިގެން ބަލައިގަންނަމުންދާނީ، އެކެނޑިޑޭޓެއްގެ ޕާސަނަލް އީމެއިލުން ކަމަށް ހެލްތުން ނިންމި އެވެ.
އެޖެންސީތަކުގެ ޔޫނިއަނުން މިއަދު ނެރުނު ބަޔާނެއްގައި ބުނީ މިދިޔަ ހޮނިހިރު ދުވަހު އިންޑިއާގެ ނޫސްތަކުގައި އިންޑިއާގެ އެމްޕްލޯއިމަންޓް އެޖެންސީއެއް ކަމުގައިވާ "ނޮރަކަ ރޫޓްސް" މެދުވެރިކޮށް 520 މަގާމަށް މީހުން ހޯދަން އިއުލާން ކޮށްފައިވާ ކަމަށެވެ. އެއީ ދިވެހި އެޖެންސީތަކުން ކަންބޮޑުވާ ކަމެއް ކަމަށް ވެސް ބަޔާނުގައިވެ އެވެ.
"ރާއްޖޭގައި ރަޖިސްޓްރީކޮށްގެން ހިންގާ ވަޒީފާ ހަމަޖައްސައިދޭ އެޖެންސީތައް އެއްފަރާތްކޮށް، މިނިސްޓްރީ އޮފް ހެލްތުން ކުރަމުން މިގެންދާ މަސައްކަތަކީ، ގާނޫނު ނަންބަރު 6/2013 ހިލާފަށް، ދިވެހިރާއްޖޭގެ ކުދި އަދި މެދު ފަންތީގެ ވިޔަފާރިތަކުގެ ވިޔާފަރިތައް ސީދާ ފުނޑުފުނޑު ކޮށްލުން،" ބަޔާނުގައިވެ އެވެ.
ބަޔާނުގައި ބުނެފައިވަނީ ރާއްޖޭގެ އެޖެންސީތައް ބާކީ ކޮށް، ސީދާ އިންޑިއާގެ އެޖެންސީތައް މެދުވެރިކޮށް، ހެލްތު މިނިސްޓްރީން ފަންނީ މުވައްޒަފުން ހޯދަން ކުރާ މަސައްކަތް، އެ އެސޯސިއޭޝަން އިން ކުށްވެރިކުރާ ކަމަށެވެ.
އަދި އެކަން ހުއްޓުވައިދިނުމަށް ސަރުކާރުގެ ކަމާބެހޭ ހުރިހާ މުއައްސަސާތަކަށް ވަނީ ގޮވައިލައިފަ އެވެ.
އެޖެންސީތަކުގެ އެސޯސިއޭޝަންގެ އެކަންބޮޑުވުމާ ގުޅޭގޮތުން ހެލްތު މިނިސްޓްރީގެ ކަމާބެހޭ ބޭފުޅާއާ ގުޅުމުން ފޯނަށް ޖަވާބު ނުދެއްވާތީ މިނިސްޓްރީގެ ބަހެއް އަދި ވަނީ ލިބޭގޮތް ނުވެފަ އެވެ.
