ތ. އަތޮޅުގެ ކްލަސްޓާ އިތުރަށް ބޮޑުވެ، އެ އަތޮޅު ތިމަރަފުށިން ވެސް މޮނީޓަރިންގެ ހާލަތަށް ގެނެސްފި އެވެ.
ތިމަރަފުއްޓަށް އެރުމާއި ފޭބުން މަނާކޮށް މޮނީޓަރިންގެ ހާލަތަށް ގެނައީ، އެ ރަށުން ތިން މީހަކު ކޮވިޑަށް މިއަދު ޕޮޒިޓިވްވުމާ ގުޅިގެންނެވެ.
ތ. އަތޮޅުން އެންމެ ފުރަތަމަ ކޮވިޑްގެ ކޭސްއެއް ފެނި މޮނީޓަރިންގެ ހާލަތަށް ގެނައި ވިލުފުއްޓެވެ. އޭގެފަހުން، ވޭމަންޑޫ، ކިނބިދޫ، އޮމަދޫ، ގާދިއްފުށި އަދި މަޑިފުށިން ކޭސްތައް ފެނުނެވެ.
މިއިން ކޮންމެ ރަށެއްގައި ވެސް ކޮވިޑަށް ޕޮޒިޓިވް މީހުން ތިބިއިރު ވަރަށް ގިނަ ބަޔަކު ވެސް ތިބީ ކަރަންޓީނުގަ އެވެ. އެތައް ގައެއް ވެސް ކަރަންޓީނުކޮށްފައިވާއިރު، ސްކޫލްތައް ވެސް ވަނީ ބަންދުކޮށްފަ އެވެ.
ނަމަވެސް، އެ ރަށްރަށުގެ އާންމު ހާލަތު ރަނގަޅެވެ.
ޕޮޒިޓިވް މީހުންގެ ތެރެއިން ކިނބިދޫން ޕޮޒިޓިވްވި ތެލެސީމިއާ ކުއްޖަކާއި އިތުރު ދެ އަންހެނަކު ވަނީ ހާލު ދެރަވެ، ލ. އަތޮޅުގައި ގާއިމްކޮށްފައިވާ ކޮވިޑް ފެސިލިޓީއަށް ބަދަލުކޮށްފައިވެ އެވެ.
ތ. ތިމަރަފުށީގެ އިތުރުން މިއަދު ވަނީ އއ. ބޮޑުފުޅަދޫ، ބ. އޭދަފުށި އަދި ކ. ހިންމަފުށި ވެސް މޮނީޓަރިންގެ ހާލަތަށް ގެނެސްފަ އެވެ. އެޗްޕީއޭގެ ހިސާބުތައް ދައްކާ ގޮތުން މިއަދު އަތޮޅު ތެރެއިން 72 މީހަކު ކޮވިޑަށް ޕޮޒިޓިވްވެފައިވެ އެވެ.
އަތޮޅު ތެރެއިން ކޮވިޑް ފެންނަ މިންވަރު އިތުރުވެފައިވާއިރު މި ވަގުތު ޖުމްލަ 17 ރަށެއް އޮތީ މޮނީޓަރިންގެ އެވެ. މީގެތެރެއިން މޮނީޓަރިންގެ ހާލަތުގައި އޮންނަތާ އެންމެ ގިނަ ދުވަސްވެފައިވަނީ ކ. ހުރާ ދިއްފުއްޓާއި ޅ. ނައިފަރު އަދި ފެލިވަރެެވެ.
