ކުރީގެ ރައީސް އަބްދުﷲ ޔާމީން އަބްދުލްގައްޔޫމް، މިރޭ ކޮވިޑް ވެކްސިންގެ ފުރަތަމަ ޑޯޒް ޖައްސަވައިފި އެވެ.
ކަރެކްޝަނަލް ސާވިސްގެ އޮފިޝަލަކު މިރޭ "އަދަދު"އަށް ވިދާޅުވި ގޮތުގައި އޭޑީކޭ ހޮސްޕިޓަލަށް ޔާމީން މިރޭ ގެންގޮސް، ކޮވިޑްގެ ފުރަތަމަ ޑޯޒް ފުރިހަމަ ކުރައްވާފައިވާ ކަމަށެވެ. ވެކްސިން ޖެއްސެވުމަށްފަހު މިހާރު ޔާމީން ވަނީ އަނބުރާ މާފުށީ ޖަލަށް ގެންގޮސްފަ އެވެ.
އެމަނިކުފާނު ޖެއްސެވީ، ކޮން ވެކްސިނެއް ކަމެއް ސާފެއް ނޫނެވެ.
ރާއްޖޭގައި މިވަގުތު ކޮވިޑްގެ ވެކްސިންގެ ފުރަތަމަ ޑޯޒް ދެމުން ދަނީ ޗައިނާއިން ފޯރުކޮށްދިން ސިނޯފާމް ވެކްސިނާއި ފައިޒާ ވެކްސިންގެ އެވެ. އިންޑިއާއިން ފޯރުކޮށްދިން ކޮވިޝީލްޑްގެ ޖަހަމުން ދަނީ ދެވަނަ ޑޯޒެވެ.
މީގެކުރިން ވެސް ވެކްސިން ޖެހުމަށް ޔާމީން މާލެ ގެނެސްފައިވާއިރު، އެ ރޭ އެމަނިކުފާނު ވެކްސިން ޖެއްސެވުމަށް ދެކޮޅު ހެއްދެވި ކަމަށް ކަރެކްޝަނަލް ސާވިސްއިން ބުންޏެވެ. ނަމަވެސް، އެ ވާހަކަތައް ދޮގުކޮށް އެމަނިކުފާނުގެ ވަކީލުން ވިދާޅުވީ ވެކްސިން ޖެއްސެވުމަށް އެ ރޭ ޔާމީން މާލެ ނުވެސް އަރުވާ ކަމަށެވެ.
ޔާމީން މާފުށީ ޖަލުގައި ހުންނެވީ އެމްއެމްޕީއާރްސީގެ ފައިސާ އެމަނިކުފާނުގެ އެކައުންޓަކަށް ޖަމާކޮށްފައިވާ މައްސަލައެއްގައި މަނީ ލޯންޑަރިންގެ ކުށް ސާބިތުވެ ނޮވެމްބަރު 8، 2019 ގައި، ފަސް އަހަރަށް ޖަލަށްލުމަށް ކްރިމިނަލް ކޯޓުން ހުކުމް ތަންފީޒު ކުރެއްވުމަށެވެ.
ޔާމީންގެ މައްޗަށް އިތުރު މައްސަލައެއްގައި ވެސް ވަނީ މަނީ ލޯންޑްރިންގެ ދައުވާ އުފުލައި ކުރިމިނަލް ކޯޓުގައި ޝަރީއަތް ފަށާފަ އެވެ. އެއީ، ރިސޯޓް ހެދުމަށް ދޫކުރި މުއާމަލާތުން މަގާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯދެއްވި ކަމުގެ ތުހުމަތު ކުރާ މައްސަލައެކެވެ.
އޭގެއިތުރުން، އެމްއެމްޕީއާރްސީއާ ގުޅޭ މައްސަލައެއްގެ ތަހުގީގަށް އިއްޔެ ވެސް ޔާމީން ވަނީ ފުލުހުންގެ އިދާރާއަށް ހާޒިރުކޮށްފަ އެވެ.
ޔާމީން ގެކޮޅަށް ބަދަލު ކުރެއްވުމަށް މަޝްވަރާތަކެއް މިހާރު ކުރަމުންދާއިރު، ރައީސް އިބްރާހިމް މުހައްމަދު ސޯލިހު ވެސް ވަނީ ޔާމީނަށް ދެރަ ގޮތެއް ނުވާނެ ކަމާއި ގެކޮޅަށް ބަދަލު ކުރުމަށް މަޝްވަރާ ކުރައްވާނެ ކަމަށް ވިދާޅުވެފަ އެވެ.
