ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ގައުމީ މަޖިލިހުގެ އިންތިހާބުގައި ސަރުކާރު ކުންފުނިތަކުގެ ބައެއް އިސް ވެރިންނާއި ރައްޔިތުންގެ މަޖިލީހުގެ މެންބަރުން ވެސް ވާދަ ކުރައްވަން ނިންމާފައިވާތީ އިންތިހާބުގެ މުހިންމުކަން ބޮޑުވެއްޖެ އެވެ.
އެމްޑީޕީ ގައުމީ މަޖިލީހަކީ އެ ޕާޓީގެ އެންމެ ބާރުގަދަ ގުނަވަނެވެ. މިހާރު ވެސް 142 މެންބަރުން ތިބޭ ގައުމީ މަޖިލިހުގެ ޕާޓީއަށް ނިސްބަތްވާ ސަރުކާރުގެ ކެބިނެޓު މެންބަރުންގެ އިތުރުން މަޖިލިސް މެންބަރުން ވެސް ހިމެނިވަޑައިގަންނަވަ އެވެ.
އެމްޑީޕީ ގައުމީ މަޖިލިހަށް ކުރިމަތިލައްވާފައިވާ ބޭފުޅުންގެ ތެރޭގައި އިކޮނޮމިކް މިނިސްޓަރު ފައްޔާޒު އިސްމާއިލާއި އެސްޓީއޯގެ މެނޭޖިން ޑައިރެކްޓަރު ހުސެއިން އަމްރު މުހައްމަދާއި ފެނަކަ ކޯޕަރޭޝަނުގެ މެނޭޖިން ޑައިރެކްޓަރު އަހުމަދު ސައީދު މުހައްމަދު ހިމެނިވަޑައިގަންނަވަ އެވެ.
ފައްޔާޒަކީ މިހާރު ގައުމީ މަޖިލިހުގެ ގަމު ދާއިރާގެ ރައީސެވެ. އަމްރަކީ ގުރައިދޫ ދާއިރާ ރައީސެވެ.
އެމްޑީޕީ ގައުމީ މަޖިލިސް އެކުލެވިގެންވާ ގޮތުން ޕާޓީގެ ޗެއާޕާސަން އާއި އޭނާގެ ދެ ނައިބުންނާއި ޕާލަމެންޓަރީ ގްރޫޕުގެ މެންބަރުންނާއި ދާއިރާތަކުގެ ރައީސުންނާއި ޒުވާނުންގެ ގޮފީގެ ރައީސް އާއި އިސްލާމް ދީނުގެ މަޝްވަރާ މަޖިލިހުގެ ރައީސް ހިމެނިވަޑައިގަންނަވަ އެވެ.
މީގެ ކުރިން ގައުމީ މަޖިލިހުގެ ދާއިރާތަކުގެ ރައީސުންގެ ގޮތުގައި ތިއްބެވި ބޭފުޅުން 19 ވަނަ ރައްޔިތުންގެ މަޖިލީހުގެ ގިނަ ގޮނޑިތަކެއް ވަނީ ހޯދައިފަ އެވެ.
އެގޮތުން ކެލާ ދާއިރާގެ ރައްޔިތުންގެ މަޖިލީހުގެ މެންބަރު އިބްރާހިމް ޝަރީފާއި ކަނޑިތީމުގެ ދާއިރާ މެންބަރު އަބްދުﷲ ޝަހީމް އަބްދުލްހަކީމަކީ، ގައުމީ މަޖިލިހުގެ މެންބަރުންގެ ގޮތުގައި ތިއްބެވުމަށްފަހު މަޖިލިހަށް ވަޑައިގެންނެވި ބޭފުޅުންނެވެ. އުނގޫދާރު ދާއިރާގެ މެންބަރު މުހައްމަދު ވަހީދާއި ދުވާފަރު ދާއިރާގެ މެންބަރު އިސްމާއިލް އަހުމަދާއި އިނގުރައިދޫ ދާއިރާގެ ރައީސް ހަސަން އަހުމަދަކީ ވެސް ފުރަތަމަ ދާއިރާތަކުގެ ރައީސުންނެވެ.
އެމްޑީޕީގެ ގައުމީ މަޖިލީހަށް ލިބިފައިވާ ބާރުތަކުގެ ތެރޭގައި ޕާޓީގެ ލީޑަޝިޕާމެދު އިތުބާރު އޮތްތޯ ކަނޑައެޅުމާއި ސެކްރެޓްރިއޭޓާއި ކޮމެޓީތައް އައްޔަން ކުރުމާއި ޕާޓީގެ ސިޔާސަތައް އިސްލާހު ގެނައުން ހިމެނެވެ.
