އިންޑިއާ އާއި ޕާކިސްތާނުގެ ގުޅުން ރަނގަޅު ކުރަން ޔުނައިޓެޑް އަރަބް އެމިރޭޓްސް (ޔޫއޭއީ) އިން ކުރާ މަސައްކަތަށް މަރުހަބާ ކިޔާ ކަމަށާއި އެކަމަކު އިންޑިއާގެ ފޮރިން މިނިސްޓަރާ ބައްދަކުރުމުގެ ވިސްނުމެއް ނެތް ކަމަށް ޕާކިސްތާނުގެ ފޮރިން މިނިސްޓަރު ވިދާޅުވެއްޖެ އެވެ.
އިންޑިއާގެ ފޮރިން މިނިސްޓަރު ސުބްރަމާނިޔަމް ޖޭޝަންކަރާއި ޕާކިސްތާނުގެ ފޮރިން މިނިސްޓަރު ޝާހް މެހްމޫދު ގުރެއިޝީ މި ވަގުތު ތިއްބެވީ ޔޫއޭއީގަ އެވެ.
"އަޅުގަނޑު މި ތަނަށް އައިސް މި އުޅެނީ ބައިލެޓެރަލް ދަތުރެއްގައި. މިއީ އިންޑިއާއާ ގުޅޭ ކަމެއް މަޝްވަރާ ކުރަން ހަމަޖެހުނު ދަތުރެއް ނޫން،" ޔޫއޭއީގެ ހަލީޖް ޓައިމްސް ނޫހަށް ގުރެއިޝީ ވިދާޅުވި އެވެ.
"އެކަމަކު ތިން ވަނަ ފަރާތަކުން މެދުވެރިއެއްގެ ގޮތުގައި މަސައްކަތް ކުރުމަށް އަޅުގަނޑުމެން މަރުހަބާ ކިޔަން."
މިދިޔަ ހަފްތާގައި ޔޫއޭއީގެ އިސް ޑިޕްލޮމެޓަކު ބުނެފައި ވަނީ ކަޝްމީރު މައްސަލާގައި ގޯސްވެފައިވާ އިންޑިއާ އާއި ޕާކިސްތާނުގެ ގުޅުން ރަނގަޅު ކުރުމުގެ މަސައްކަތުގައި އެ ގައުމުން މެދުވެރިއެއްގެ ދައުރު އަދާ ކުރަމުންދާ ކަމަށެވެ.
އިންޑިއާގެ ފޮރިން މިނިސްޓަރު ސުބްރަމާނިޔަމް ޖޭޝަންކަރް.-- ފޮޓޯ: ކަނެކްޓް ގުޖަރާތު
އިންޑިއާގެ ފޮރިން މިނިސްޓްރީން ކުރި ޓްވީޓެއްގައި ބުނީ މި ދަތުރުގައި މަޝްވަރާ ކުރާނީ ޔޫއޭއީ އާއި އިންޑިއާގެ އިގްތިސާދީ ގުޅުމާ ބެހޭ ގޮތުން ކަމަށެވެ.
އިންޑިއާ އާއި ޕާކިސްތާނުގެ ހަމަނުޖެހުން ބޮޑުވީ 2019 ވަނަ އަހަރު ކަޝްމީރުގައި އަމިއްލައަށް މަރުވެގެން އިންޑިއާގެ އަސްކަރީ އުޅަނދުތަކެއް ގޮއްވާލުމުގެ ފަހަތުގައި ވަނީ ޕާކިސްތާނުގެ ހަނގުރާމަވެރިން ކަން ހާމަވުމުންނެވެ.
އެކަމާ ހިތްހަމަނުޖެހިގެން އިންޑިއާއިން ވަނީ އެ ގައުމުން ކޮންޓްރޯލް ކުރާ މުސްލިމުން ގިނަ އަދަދަކަށް ދިރިއުޅޭ ކަޝްމީރުގެ ސަރަހައްދަށް އަމިއްލައަށް ވެރިކަން ހިންގުމަށް ދީފައިވާ ހުއްދަ އަތުލާފަ އެވެ. އެއާއެކު އިންޑިއާ އާއި ޕާކިސްތާނުގެ ގުޅުމަށް އަސަރުކޮށް، ވިޔަފާރި އަށް ވެސް ބުރޫއެރި އެވެ.
އިންޑިއާ އާއި ޕާކިސްތާނުން ޑުބާއީގައި ސިއްރުން މަޝްވަރާ ކުރި
ކަޝްމީރު މައްސަލާގައި ހައްލެއް ލިބޭތޯ އިންޑިއާ އާއި ޕާކިސްތާނުގެ ޖާސޫސީ އޮފިޝަލުން މިދިޔަ ޖެނުއަރީ މަހު ޑުބާއީގައި ސިއްރުން މަޝްވަރާ ކުރި ކަމަށް ރޮއިޓާޒްއިން މިދިޔަ ހަފްތާގައި ރިޕޯޓުކޮށްފައި ވެ އެވެ. އެ ނޫހުން ބުނީ ދެ ގައުމުން ފާޅުގައި އެއްވެސް ކަމެއް ހާމަ ނުކުރި ނަމަވެސް، މިހާރު މަސައްކަތް ކުރަނީ ގުޅުން ރަނގަޅު ކުރަން ކަމަށެވެ.
އިންޑިއާ އާއި ޕާކިސްތާނުން ވެސް ދެކެނީ މުޅި ކަޝްމީރަކީ އެ ގައުމެއްގެ ބަޔެއްގެ ގޮތުގަ އެވެ. އަދި ދެ ގައުމުން އަންނަނީ ކަޝްމީރު ދެ ފަޅިކޮށް، އެ ގައުމެއްގެ ފަޅި އެ ގައުމަކުން ކޮންޓްރޯލް ކުރަމުންނެވެ.
ކަޝްމީރު ދެ ފަޅިކޮށްފައިވާ ގޮތް ދައްކުވައިދޭ ޗާޓެއް. ރަތް ކުލައިގައި ލައިން އޮފް ކޮންޓްރޯލް.-- ފޮޓޯ: ވީއޯއޭ
ރޮއިޓާޒް އިން ބުނި ގޮތުގައި އިންޑިއާގެ ޖާސޫސީ އިދާރާއެއް ކަމަށްވާ ރިސާޗް އެނެލިސިސް ވިންގް އަދި ޕާކިސްތާނުގެ އިންޓަ ސާވިސަސް އިންޓެލިޖެންސުގެ އޮފިޝަލުން ޖެނުއަރީ މަހު ޑުބާއީއަށް ދަތުރުކޮށް ބޭއްވި މަޝްވަރާތަކުގެ މެދުވެރިއަކަށް އުޅުނީ ޔުނައިޓެޑް އަރަބް އެމިރޭޓްސް (ޔޫއޭއީ) ސަރުކާރުންނެވެ.
އެކަމާ ގުޅޭ ގޮތުން އިންޑިއާ އަދި ޕާކިސްތާނުން ވެސް މިހާތަނަށް ރަސްމީކޮށް އެއްޗެއް ބުނެފައެއް ނުވެ އެވެ.
އިންޑިއާ އާއި ޕާކިސްތާނުން މީގެ ކުރިން ވެސް މިފަދަ މަޝްވަރާތައް ކޮށްފައިވެ އެވެ. ނަމަވެސް މަޝްވަރާއަށް ފަހު ރަސްމީކޮށް ދުވަހަކު ވެސް އެކަން ހާމައެއް ނުކުރެ އެވެ.
މި ފަހަރުގެ މަޝްވަރާތައް ޖެނުއަރީގައި ބޭއްވުމަށް ފަހު ދެ ގައުމުން ވެސް ނިންމީ ކަޝްމީރު ދެ ފަޅިކޮށްލާ "ލައިން އޮފް ކޮންޓްރޯލް" ސަރަހައްދުގައި ހަމަލާ ބަދަލު ކުރުން މެދުކަނޑާލުމަށެވެ. އަދި އެ ގައުމަކުން ކޮންޓްރޯލް ކުރާ ސަރަހައްދުގައި މި އަހަރު އިންތިހާބު ބާއްވަން ވެސް ނިންމާފައިވެ އެވެ.
އޭގެ އިތުރުން އިންޑިއާއިން ކޮންޓްރޯލް ކުރާ ސަރަހައްދުގައި ކަޝްމީރު ރައްޔިތުންނަށް ވެރިކަން ހިންގުމަށް އޮތް ހުއްދަ އަތުލުމުން ފާޑުކިޔުން ހުއްޓާލާނެ ކަމަށް ޕާކިސްތާނުން އެއްބަސްވެފައިވެ އެވެ.
ބަދަލުގައި އިންޑިއާއިން އެއްބަސްވީ އެ ގައުމުން ކޮންޓްރޯލް ކުރާ ސަރަހައްދުގައި އުޅޭ އިންޑިއާ ސިފައިންނަށް އަމާޒުވާ ހަމަލާތަކުގެ ތުހުމަތު ޕާކިސްތާނަށް ނުކުރުމަށެވެ.
