މެންޗެސްޓާ (އޭޕްރީލް 19) - އިނގިރޭސި ޕްރިމިއާ ލީގުގެ ރޭހުގައި މި ވަގުތު މެންޗެސްޓާ ސިޓީ އަށް ޕޮއިންޓު ކުރީގައި އޮތް ނަމަވެސް މެންޗެސްޓާ ޔުނައިޓެޑުން ލީގު ހޯދުމުގެ އުއްމީދު އެއްކޮށް ދޫކޮށްނުލާ ކަމަށް އެ ޓީމުގެ ކޯޗު އޮލެ ގުނަ ސޯލްޝެއާ ބުނެފި އެވެ.
ލީގުގައި މިރޭ އަމިއްލަ ދަނޑުގައި ޔުނައިޓެޑުން ވަނީ 3-1 އިން ބާންލީ ބަލިކޮށްފަ އެވެ. މި ނަތީޖާއާ އެކު ޔުނައިޓެޑުން ވަނީ ލީގުގައި އެ ޓީމުގެ ފަހު ހަ މެޗަށް ދިއުމުގެ ކުރިން ސިޓީއާ އަށް ޕޮއިންޓަށް ގާތަށް ޖެހިލައިފަ އެވެ. ސިޓީ އާއި ޔުނައިޓެޑުން ވެސް 32 މެޗު ކުޅެފައިވާއިރު، ސިޓީ އެއް ވަަނައިގައި އޮތީ 74 ޕޮއިންޓް ހޯދައިގެންނެވެ. ޔުނައިޓެޑް ދެ ވަނައިގައި އޮތީ 66 ޕޮއިންޓާ އެކު އެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި ސޯލްޝެއާ ބުނީ ލީގުތަކުގައި ބޮޑެތި ލީޑުތަކެއް ވެސް ޓީމުތައް އަތުން ގެއްލިފައި އެބަހުރި ކަމަށާއި އެހެން ކަމުން އެންމެ ފަހު ވަގުތާ ޖެހެންދެން ވެސް ޔުނައިޓެޑުން ރޭހުގައި އޮންނަން ބޭނުންވާ ކަމަށެވެ.
"އަހަަރެމެންނަށް ސިޓީ އަތުކުރެވޭނެތަ؟ މިއީ އެންމެން ވެސް ޝައުގުވެރިވާ ސުވާލެއް. އަހަރެން ބުނާނީ ފުޓްބޯޅައިގައި އެބަހުރި ވަރަށް ހީނުކުރާ ކަންތައްތައް ވެސް ވެފައި. ބޮޑެތި ލީޑުތަކެއް ވެސް އެބަހުރި ފުރޮޅާލާފައި،" ސޯލްޝެއާ ބުންޏެވެ.
ސޯލްޝެއާ އެންމެ ފުރަަތަމަ ޔުނައިޓެޑަށް ކުޅުނުއިރު 1996 ވަނަ އަހަރު އެ ޓީމުން ލީގު ތަށި އުފުލާލީ ނިއުކާސަލް ޔުނައިޓެޑް 12 ޕޮއިންޓުގެ ލީޑެއްގައި އޮއްވައި ފަހަތުން އަރަ އެވެ.
ބާންލީ ކޮޅަށް ޔުނައިޓެޑްގެ މޭސަން ގްރީންވުޑް ގޯލެއް ޖަހާފައިވަނިކޮށް ބާންލީގެ ޖޭމްސް ޓާކޯސްކީ ވަނީ ނަތީޖާ ހަމަހަމަކޮށްފަ އެވެ. އަލުން ޔުނައިޓެޑަށް ލީޑުނަގައިދިނީ ވެސް ގްރީންވުޑް އެވެ. ޔުނައިޓެޑްގެ ފަހު ގޯލު ޖެހީ ބަދަލުކުޅުންތެރިއެއްގެ ގޮތުގައި ކުޅެން އެރި އެޑިންސަން ކަވާނީ އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ޑޯނީ ވެން ޑަ ބީކް އެވެ.
ރެލިގޭޝަނުގައި އޮތް ފުލަމް އަތުން އާސެނަލް ބަލިނުވެ ސަލާމަތްވީ ކިރިޔާ އެވެ. ފުރަތަމަ ހާފުގައި އާސެނަލްގެ ޑެނި ސެބާޔޯސް ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ އޮފްސައިޑް ކަމަށެވެ. ދެ ވަނަ ހާފްގެ ކުރީކޮޅުގައި ފުލަމް އިން ވަނީ ޖޯޝް މާޖާގެ ގޯލުން ލީޑުނަގައިފަ އެެވެ. އާސެނަލުން އެއްވަރުކުރީ އިތުރު ވަގުތުގެ ހަތް ވަނަ މިނިޓްގައި އެޑީ އެންކެޓިއޭ ޖެހި ގޯލުންނެވެ.
މި ނަތީޖާއާ އެކު ފުލަމް ލީގުގެ 18 ވަނައިގައި އޮތީ 33 މެޗުން 27 ޕޮއިންޓާ އެކު އެވެ. އާސެނަލް ލީގުގެ ނުވަ ވަނައިގައި އޮތީ 32 މެޗުން 46 ޕޮއިންޓް ހޯދައިގެންނެވެ.
