ސަރުކާރު ހިންގާ އެމްޑީޕީގެ ގައުމީ މަޖިލިސް އިންތިހާބު އަންނަ މަހުގެ 29 ވަނަ ދުވަހު ބާއްވަން އެ ޕާޓީން މިއަދު ނިންމައިފި އެވެ.
އެމްޑީޕީން މިއަދު ކުރި އިއުލާނެއްގައި ބުނެފައި ވަނީ އެ ޕާޓީގެ ދާއިރާތަކުގެ ހިންގާ ކޮމިޓީތަކާއި ޕްރޮވިންސްތަކުގެ އިންތިހާބުގައި ވޯޓުލުމަށް ހަމަޖެހިފައި ވަނީ ދާއިރާތަކުގައި ހިމެނޭ އެ ޕާޓީގެ އާންމު މެންބަރުން ކަމަށެވެ.
އެ އިންތިހާބުގައި ވޯޓުލެވޭނީ މިއަދާ ހަމައަށް އެ ޕާޓީގެ މެންބަރުންގެ ގޮތުގައި ތިބި މީހުންނަށް ކަމަށް ވެސް އެމްޑީޕީން ބުންޏެވެ. އެހެންކަމުން މިއަދުން ފެށިގެން އަންނަ މަހުގެ 29 އާ ހަމައަށް އެ ޕާޓީން މެމްބާޝިޕް ފޯމު ބަލައިގަތުން ވަނީ ވަގުތީ ގޮތުން ހުއްޓާލައިފަ އެވެ.
ލޯކަލް ކައުންސިލްތަކުގެ އިންތިހާބު ނިމުމާއެކު އެމްޑީޕީ ގައުމީ މަޖިލީހުގެ ކެމްޕެއިން ވަނީ ފަށައިފަ އެވެ. ސަރުކާރުގެ އިސް މަގާމުތަކުގައި ތިބި މީހުން ވެސް ވާދަ ކުރާ އެ އިންތިހާބުގެ ކެމްޕެއިންގެ ފޯރި ގަދަ ކަމަށް ސޯޝަލް މީޑިއާއިން ފެނެ އެވެ.
އެމްޑީޕީގެ ގައުމީ މަޖިލީހަކީ އެ ޕާޓީގެ ނިންމުންތައް ނިންމާ އެންމެ މުހިންމު އެއް މަޖިލިހެވެ. އެ މަޖިލިހުގައި ދާއިރާތަކުގެ ރައީސުންގެ ގޮތުގައި ތިއްބެވި ވަރަށް ގިނަ ބޭފުޅުންނަކީ މިއަދު ރައްޔިތުންގެ މަޖިލީހުގެ މެންބަރުންނެވެ.
