އިންޑިއާގައި ކޮންމެ ދުވަހަކު ކޮވިޑަށް ޕޮޒިޓިވްވާ އަދަދު ކުއްލިއަކަށް އިތުރުވެ، 7.6 ޕަސެންޓަށް ކޭސްތައް އިތުރުވެފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފި އެވެ.
އެ މިނިސްޓްރީން ނެރުނު ބަޔާނެއްގައި ބުނީ ކޭސްތައް އިތުރުވުމާ އެކު މި ބަލީގައި މަރުވާ އަދަދު ވެސް 10.2 ޕަސެންޓު އިތުރުވެފައިވާ ކަމަށެވެ.
ބަލިން ފަސޭހަވާ ނިސްބަތަށް ވުރެ ބަލި ޖެހޭ މިންވަރު 1.3 ގުނަ އިތުރު ކަމަށް އެ ބަޔާނުގައި ވެއެވެ. ހެލްތު މިނިސްޓްރީން ވަނީ ވަކިވަކި ސްޓޭޓުތަކަށް އެހީވާނެ ކަމަށް ވެސް ބުނެފަ އެވެ.
އެގޮތުން މިނިސްޓަރު ޑރ. ހަރްޝް ވަރްދަން ވަނީ ސްޓޭޓުތަކުގައި ޗީފް މިނިސްޓަރުންނާ ބައްދަލުކުރައްވާ އެ ތަންތަނަށް ދަތިވެފައިވާ ތަކެތި ފޯރުކޮށްދޭނެ ކަމުގެ ޔަގީންކަން ދެއްވާފަ އެވެ.
އެ ޔަގީންކަމާ އެކު މަހަރާޝްތްރަ އަށް 1121 ވެންޓިލޭޓަރު، އުއްތަރު ޕްރަދޭޝަށް 1700 ވެންޓިލޭޓަރު، ޖާރްހަންދަށް 1500 ވެންޓިލޭޓަރު، ގުޖަރާތަށް 1600 ވެންޓިލޭޓަރު، މަދްޔަ ޕްރަދޭޝަށް 152 އައި ޗައްޓިސްގަރަށް 230 ވެންޓިލޭޓަރު ފޮނުވާނެ އެވެ.
އިންޑިއާގައި އެންމެ ހާލަތު ގޯސްވެފައި ވަނީ މަހަރާޝްތްރަ ސްޓޭޓުގަ އެވެ. ފާއިތުވި 24 ގަޑިއިރު ތެރޭގައި އެތަނުން 67،123 މީހުން ޕޮޒިޓިވްވިއިރު، ބަލިން ފަސޭހަވީ 56،783 މީހުންނަށެވެ. އަދި 419 މީހުން މަރުވި އެވެ. މި ވަގުތު އެ ތަނުގައި 647،933 އެކްޓިވް ކޭސް އެބަ އުޅެ އެވެ.
