އިންޑިއާގައި ކޮވިޑުގެ ހާލަތު މާ ބޮޑަށް ގޯސްވެ، ދުވާލެއްގެ މައްޗަށް 200،000 އަށް ވުރެ ގިނަ މީހުން ޕޮޒިޓިވް ވާން ފެށުމާއެކު، އެންމެ ބޮޑަށް އަސަރުކޮށްފައިވާ ވެރިރަށް ނިއު ދިއްލީ ހަފްތާ ބަންދާ ދިމާކޮށް ލޮކްޑައުންކޮށްފި އެވެ.
ދެކުނު އޭޝިއާގެ ގައުމުތަކުން މި ބަލިމަޑުކަން ކޮންޓްރޯލް ކުރާނެ ކަމަށް ކުރެވެމުން އައި އުއްމީދުތައް ނެތެމުން ދަނީ މި މަހު އެކަނިވެސް އިންޑިއާގައި ދެ މިލިއަން ކޭސް ފެނި، ޕާކިސްތާނާއި ބަންގްލަދޭޝުން ލޮކްޑައުންކޮށްފައި ވާތީ އެވެ.
އާބާދީގެ ނިސްބަތުން އިންޑިއާގައި ކޭސްތައް މަދު ނަމަވެސް، ހަލުވިކަމާއެކު ފެތުރެމުންދާ ވައިރަހުގެ ވޭރިއެންޓުގެ ސަބަބުން އިތުރަށް ހާލަތު ގޯސްވެދާނެ ކަމުގެ ބިރު އެބަ އޮތެވެ.
މިދިޔަ އަހަރު މުޅި އިންޑިއާ ލޮކްޑައުންކޮށްގެން އެތައް ސަތޭކަ ބަޔަކު މަރުވެ، އިގްތިސާދު ހުއްޓުމަކަށް އައިސް ލިބުނު ފަދަ ގެއްލުންތަކެއް އަލުން ތަހައްމަލު ކުރަން ބޭނުން ނުވާތީ ސަރުކާރުން މަސައްކަތް ކުރަނީ "ފުލް ލޮކްޑައުނަށް" ނުގޮސް ވޭތޯ އެވެ.
ނަމަވެސް ވަކިވަކި ސްޓޭޓުތަކުން އަންނަނީ ލޮކްޑައުން ކުރަމުންނެވެ. އޭގެ ތެރޭގައި ކޮވިޑު އެންމެ ހަލުވިކަމާއެކު ފެތުރެމުންދާ މަހަރާޝްތްރަ ސްޓޭޓާއި، އެކި ސިނާއަތްތަކުގެ މަސައްކަތަށް ހާއްސަ ގުޖަރާތާއި، އައިޓީ ދާއިރާގެ މަރުކަޒު ބެންގަލޫރު ހިމެނެ ކަރްނާޓަކާ އެކުލެވެ އެވެ.
ގާތްގަނޑަކަށް 240 މިލިއަން މީހުން ދިރިއުޅޭ އުއްތަަރް ޕްރަދޭޝް ސްޓޭޓުން އިއްޔެ އިއުލާނު ކުރި ގޮތުގައި ހުރިހާ އަވަށަކާއި ސިޓީތަކެއް އާދީއްތަ ދުވަހު 24 ގަޑިއިރަށް ލޮކްޑައުން ކުރާނެ އެވެ.
ކޮވިޑުގައި މަރުވި މީހެއްގެ ހަށިގަނޑު ދިއްލީގެ ގަބުރުސްތާނެއްގެ ތެރޭގައި އުފުލަނީ. މިހާރު އެންމެ ހާލަތު ގޯސް ސިޓީއަކީ ދިއްލީ.-- ފޮޓޯ: އޭއެފްޕީ
އެންމެ ހާލަތު ގޯސް ސިޓީގެ ގޮތުގައި މުމްބާއީ ވައްޓާލުމަށް ފަހު ދިއްލީން ކުރިއަށް ޖެހިފައި ވާއިރު، އެ ތަނުން ވެސް ވަނީ ހަފްތާ ބަންދާ ދިމާކޮށް ލޮކްޑައުންކޮށްފަ އެވެ.
"ކަންބޮޑުނުވޭ. ހަފްތާ ބަންދުގެ ތެރޭގައި ވެސް ހުރިހާ ޒަރޫރީ ހިދުމަތްތަކެއް ލިބޭނެ،" 25 މިލިއަން މީހުން ދިރިއުޅޭ ދިއްލީގެ ޗީފް މިނިސްޓަރު އަރްވިންދް ކެޖްރިވާލް ވިދާޅުވި އެވެ.
މިއަދުގެ ނިޔަލަށް އިންޑިއާގައި ޖުމްލަ 14.3 މިލިއަން ކޮވިޑް ކޭސް ފެނިފައި ވެއެވެ. އަދި 174،000 އަށް ވުރެ ގިނަ މީހުން މަރުވެފައިވާ ކަމަށް ޖޯން ހޮޕްކިންސް ޔުނިވާސިޓީގެ ތަފާސްހިސާބުން ދައްކަ އެވެ.
