ފާއިތުވި 24 ގަޑިއިރުގެ ތެރޭގައި އިންޑިއާގައި 200،739 މީހުން ކޮވިޑަށް ޕޮޒިޓިވްވެއްޖެ އެވެ. މިއީ އެއް ދުވަސް ތެރޭގައި ދެ ލައްކަ މީހުން ޕޮޒިޓިވްވި ފުރަތަމަ ފަހަރެވެ.
ހެލްތު މިނިސްޓްރީގެ ތަފާސްހިސާބަށް ބަލާއިރު، ފާއިތުވި 24 ގަޑިއިރުގެ ތެރޭގައި 1،038 މީހަކު މަރުވެފައި ވެއެވެ. އެއާއެކު ޖުމްލަ މަރުވި މީހުންގެ އަދަދު ވަނީ 173،123 އަށް އަރާފަ އެވެ.
އިންޑިއާގައި މިހާތަނަށް 14.1 މިލިއަން މީހުން ކޮވިޑަށް ޕޮޒިޓިވްވެފައި ވާއިރު، އެ ގައުމަކީ އެމެރިކާ އަށް ފަހު ކޮވިޑުގެ ހާލަތު އެންމެ ގޯސްކޮށް އޮތް ގައުމެވެ.
ކޮވިޑުގެ ދެ ވަނަ ރާޅު ކޮންޓްރޯލް ކުރަން އިންޑިއާއިން މަސައްކަތް ކުރާއިރު، ފާއިތުވި އަށް ދުވަހު ވެސެ ވަނީ ދުވަހަކަށް ވުރެ ދުވަހެއް ކޭސްތައް އިތުރުވެފަ އެވެ.
އިންޑިއާގައި ކޮވިޑު އެންމެ ބޮޑަށް ފެތުރެމުން ދަނީ ހުޅަނގުގެ ސްޓޭޓުތަކުގަ އެވެ. އަދި އެންމެ ބޮޑަށް އަސަރުކޮށްފައި ވަނީ މުމްބާއީ ހިމެނޭ މަހަރާޝްތްރަ ސްޓޭޓަށެވެ.
އެހާ ގިނަ އަދަދެއްގެ ކޭސްތައް ފެންނަމުން ދާތީ އިންޑިއާގެ ސިއްހީ ދާއިރާއަށް ވަނީ ވަރަށް ބޮޑު ގޮންޖެހުމަކާ ކުރިމަތިލާންޖެހިފަ އެވެ. އެގޮތުން ހޮސްޕިޓަލްތަކުގެ އައިސީޔޫ އެނދުތައް ފުރި، އޮކްސިޖަން ހުސްވަމުންދާ ކަމަށް ރިޕޯޓުތައް ބުނެ އެވެ.
"ހާލަތު ވަރަށް ގޯސް. މިއީ 900 އެނދުގެ ހޮސްޕިޓަލެއް އެކަމަކި މިހާރު ވެސް 60 ޕޭޝެންޓުން އެބަ ތިބި އެނދެއް ނުލިބި ކިޔުގައި،" މަހަރާޝްތްރަ ސްޓޭޓުގެ ނަގްޕޫރު ހިސާބުގަނޑުގައި ހުންނަ ގަވަމަންޓް މެޑިކަލް ކޮލެޖް އެންޑް ހޮސްޕިޓަލުގެ އޮފިޝަލް އަވިނާޝް ގަވާންދޭ އަލްޖަޒީރާއަށް ވިދާޅުވި އެވެ.
ބޮޑުވަޒީރު ނަރެންދްރަ މޯދީ ނިސްބަތްވެ ވަޑައިގަންނަވާ ގުޖަރާތު ސްޓޭޓުގެ ހޮސްޕިޓަލްތައް ފުރި ބަލި މީހުންނަށް ފަރުވާދެމުން ދަނީ އެމްބިއުލާންސް ގަ އެވެ. ހޮސްޕިޓަލުން ޖާގައެއް ލިބެންދެން އެގޮތަށް ފަރުވާދެމުންދާ އެމްބިއުލާންސްތަކުގެ ދިގު ކިޔުއެއް އެ ތަނުގައި އެބަ އޮތެވެ.
"މި ހާލަތް ބަދަލު ނުވާ ނަމަ މަރުވާ މީހުންގެ އަދަދުތައް އިތުރުވާނެ،" އަހްމަދްއާބާދު ސިޓީގެ ސިއްހީ އިދާރާއެއްގެ ވެރިއަކު ގުޖަރާތުގެ ޗީފް މިނިސްޓަރަށް ފޮނުވި ސިޓީއެއްގައި ލިޔެފައި ވެއެވެ.
އިންޑިއާގެ މައި ސަރުކާރުން ބުނީ ކޮންމެ ދުވަހަކު ވެސް ކެޕޭސިޓީ ހުރި އެންމެ ގިނަ މިންވަރަށް އޮކްސިޖަން އުފައްދަމުންދާ ކަމަށެވެ. ހެލްތު މިނިސްޓްރީން ނެރުނު ބަޔާނެއްގައި ބުނީ މިހާރު ލިބެން ހުރި އޮކްސިޖަނަކީ މި ވަގުތަށް ބޭނުންވާ މިންވަރު ކަމަށާއި، ދަތިކަމެއް ނާންނާނެ ކަމަށެވެ.
މި އަހަރު ފެށުމާއެކު އިންޑިއާގައި ކޭސްތައް މަދުވި ނަމަވެސް، ވެކްސިން ޕްރޮގްރާމް ފެށުމުން ރައްކާތެރިކަމުގެ ފިޔަވަޅުތަކަށް ފަރުވާ ކުޑަ ކުރުމުގެ ސަބަބުން ކުއްލިއަކަށް ވަނީ ކޭސްތައް އިތުރުވެފަ އެވެ.
މާޗް މަހުން ފެށިގެން ހާލަތު ގޯސްވެފައި ވަނިކޮށް ހިންދޫ ދީނުގެ އެންމެ ބޮޑު ފެސްޓިވަލް "ކުމްބް މޭލާ" ފަށައިގެން އެތައް މިލިއަން ބަޔަކު ގަންގާ ކޯރު ސަރަހައްދަށް ޖަމާވެފައި ވާތީ އިތުރަށް ބަލި ދަނީ ފެތުރެމުންނެވެ.
