ހިންދޫއިންގެ އެންމެ ބޮޑު ފެސްޓިވަލް "ކުމްބް މޭލާ" އަށް އިންޑިއާގެ ހަރިދްވާރް ސިޓީއަށް ޖަމާވި އެތައް ސަތޭކަ ބަޔަކު ކޮވިޑަށް ޕޮޒިޓިވްވެއްޖެ އެވެ.
ދެ މަހަށް ދެމިގެންދާ ފެސްޓިވަލުގެ އެންމެ މުހިއްމު ދުވަސް ފާހަގަކުރަން އިއްޔެ ތިން މިލިއަނަށް ވުރެ ގިނަ މީހުން ގަންގާ ކޯރުގެ ތެރެއަށް އެރި ފެން ވަރާ ހެދި އެވެ. އެތައް މިލިއަން ބަޔަކު މިއަދު ވެސް އެ އަޅުކަމުގައި ބައިވެރިވާނެ އެވެ.
އިއްޔެ އިންޑިއާއިން ވަނީ 184،372 މީހުން ކޮވިޑަށް ޕޮޒިޓިވްވެފަ އެވެ. އެއީ މިހާތަނަށް އެއް ދުވަހެއްގައި އެންމެ ގިނަ މީހުން ޕޮޒިޓިވްވި ފަހަރެވެ.
ބަލިމަޑުކަމުގެ ތެރޭގައި ވެސް ކުމްބް މޭލާ ފެސްޓިވަލް ބާއްވަން ހުއްދަ ދިނުމުން ގިނަ ބަޔަކު އަންނަނީ އިންޑިއާ ސަރުކާރަށް ފާޑުކިޔަމުންނެވެ.
މިއަދު މެންދުރުގެ ނިޔަލަށް 900،000 މީހުން ގަންގާ ކޯރަށް އެރި ފެންވެރި ކަމަށް އޮފިޝަލުން ބުނެ އެވެ. ހިންދޫން ގަބޫލުކުރާ ގޮތުގައި ގަންގާ ކޯރަކީ މާތްވެގެންވާ ތަނެކެވެ. އަދި އެ ކޯރުން ފެން ވަރައިފި ނަމަ ހުރިހާ ފާފަތަކެއް ފުހެވިގެން ދާނެ ކަމަށް އެ މީހުން ގަބޫލުކުރެ އެވެ.
ފެސްޓިވަލަށް އެތައް މިލިއަން ބަޔަކު ޖަމާވުމުން ރައްކާތެރިކަމުގެ ފިޔަވަޅުތައް ތަންފީޒު ކުރަން ވެސް ފުލުހުންނަށް ވަނީ އުނދަގޫވެފަ އެވެ.
ބީބީސީގައިވާ ގޮތުން އިއްޔެ އެ ސަރަހައްދުން ނެގި 20،000 ސާމްޕަލުގެ ތެރެއިން 110 ސާމްޕަލް ޕޮޒިޓިވް އެވެ. އޭގެ ކުރިން ހޯމަ ދުވަހު އެ ތަނުން 184 މީހުން ޕޮޒިޓިވްވި އެވެ. ބައެއް މީހުން އެކަހެރިކޮށްފައި ވާއިރު، އެހެން މީހުން ގެންގޮސްފައި ވަނީ ހަރިދްވާރު ސިޓީގެ ހޮސްޕިޓަލަށެވެ.
ފެސްޓިވަލް ބާއްވާފައިވާ ދަނޑިވަޅަކީ އިންޑިއާގައި ކޮވިޑުގެ ހާލަތު ވަރަށް ބޮޑަށް ގޯސްވެފައިވާ ދަނޑިވަޅެކެވެ. އެމެރިކާއަށް ފަހު ކޮވިޑުގެ ހާލަތު އެންމެ ގޯސްކޮށް އޮތީ އިންޑިއާގަ އެވެ.
