ޔުނައިޓެޑް އަރަބް އެމިރޭޓްސް (ޔޫއޭއީ) އަށް 23 ބިލިއަން ޑޮލަރުގެ ހަތިޔާރު ވިއްކުމުގެ އެއްބަސްވުން ތަންފީޒު ކުރަން ނިންމިކަން އެމެރިކާ ސަރުކާރުން ކޮންގްރެސްއަށް އަންގައިފި އެވެ.
އެ އެއްބަސްވުމުގެ ދަށުން ވިއްކާ ހަތިޔާރުގެ ތެރޭގައި ހަނގުރާމަ މަތީ ޖެޓުތަކާއި، ޑްރޯން އާއި އެހެން ސާމާނު ވެސް ހިމެނެ އެވެ. މިއީ ކުރީގެ ސަރުކާރުން ޔޫއޭއީ އާއެކު އެކުލަވާލި އެއްބަސްވުމެކެވެ.
އެއްބަސްވުމަށް ހުއްދަ ދިނީ ކުރީގެ ރައީސް ޑޮނަލްޑް ޓްރަމްޕްގެ ވެރިކަން ނިމުމަކާ ގާތްވެފައި ވަނިކޮށެވެ. އެހެންކަމުން އާ ރައީސް ޖޯ ބައިޑެން ވިދާޅުވީ އެއްބަސްވުން މުރާޖައާ ކުރައްވާނެ ކަމަށެވެ.
ޓްރަމްޕްގެ ސަރުކާރުން ބުނީ ޔޫއޭއީ އަށް ހަތިޔާރު ވިއްކަން ނިންމީ "އަބްރަހަމް އެކޯޑްސް" އާ ގުޅިފައިވާ އެއްބަސްވުމެއްގެ ދަށުން ކަމަށެވެ. "އަބްރަހަމް އެކޯޑްސް" އަކީ މިދިޔަ ސެޕްޓެމްބަރު މަހު އިޒްރޭލާއެކު ޑިޕްލޮމެޓިކް ގުޅުން ގާއިމް ކުރަން ޔޫއޭއީ އާއެކު ހެދި އެއްބަސްވުމެކެވެ.
ޓްރަމްޕް ސަރުކާރުގެ އެންމެ ފަހު ދުވަސްކޮޅު ޔޫއޭއީގެ އިތުރުން ބަހްރެއިން، ސޫދާން އަދި މޮރޮކޯއިން ވަނީ އިޒްރޭލާއެކު ޑިޕްލޮމެޓިކް ގުޅުން ގާއިމްކޮށްފަ އެވެ.
