މިދިޔަ ހޮނިހިރު ދުވަހުގެ ލޯކަލް ކައުންސިލް އިންތިހާބުގައި ބެހެއްޓި 18 ފޮއްޓެއް އަލުން ގުނަން ނިންމީ، އެއްވެސް ފަރާތެއް ޝަކުވާއަކާ ގުޅިގެން ނޫން ކަމަށް އިލެކްޝަންސް ކޮމިޝަން (އީސީ)އިން މިއަދު ބުނެފި އެވެ.
މިއަދު މެންދުރު އެ ފޮށިތައް ގުނަން އުޅުމުން، އިދިކޮޅާއި އެމްޑީޕީގެ ސަޕޯޓަރުންނާ ދެމެދު ބޮޑެތި ހަމަނުޖެހުންތައް ހިނގާފައިވަނިކޮށް، އީސީން ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ރައީސް އަހުމަދު ޝަރީފް ވިދާޅުވީ، އެ ފޮށިތައް ގުނަން މިއަދު އުޅުނީ، އެ ފޮށިތަކުގެ ނަތީޖާ ޝީޓުތަކުގައި ލިޔެފައިވާ ބައެއް އަދަދުތައް ދިމާނުވާތީ ކަމަށެވެ.
"މިއަދު ބޭއްވި އެކްސައިޒަކީ ބައެއް ނަތީޖާ ޝީޓު ފުރިފައިހުރި ގޮތުން، ސާފު ނުވާ ނަތީޖާތަކެއް ހުރީމަ. ނަތީޖާތައް ސާފުކުރުމަށްޓަކައި ސެކިޔުރިޓީ އުރަ ކަނޑަން އުޅުނީ އެ ފޮއްޓެއްގެ މަސްލަހަތު ހިމެނޭ މީހުންނަށް ދައުވަތުދީގެން،" ޝަރީފް ވިދާޅުވި އެވެ.
މިއަދު އީސީގައި ހިނގި ހަމަނުޖެހުންތައް ކޮންޓްރޯލް ކުރަން ފުލުހުން ހަރަކާތްތެރިވަނީ. -- ފޮޓޯ: ހުސެއިން ޝަޔާހު/އަދަދު
ނަމަވެސް، އިންތިހާބީ މަރުކަޒުގެ ތެރެއަށް އާއްމުންނާއި، ކަމާނުބެހޭ ސިޔާސީ ފަރާތްތައް ވަދެ ހަމަނުޖެހުން ހިންގުމުގެ ސަބަބުން، މިއަދު އެ ފޮށިތައް ގުނުން ކެންސަލް ކޮށްފައިވާކަމަށް ވިދާޅުވި އެވެ.
ޝަރީފް ވިދާޅުވި ގޮތުގައި، އެ ފޮށިތައް އަލުން ގުނަން އީސީން ނިންމީ އެ ފޮއްޓެއްގައި ހިމެނޭ ވަކިވަކި ކެންޑިޑޭޓުންނަށް ލިބުނު ވޯޓުގެ އަދަދު ބަލަން ނޫން ކަމަށެވެ.
"މިއުޅެނީ އަދަދުތައް ދިމާނުވާތީ. އުރަ ކަނޑައިގެން އަޅުގަނޑުމެން ބަލާނީ ކައުންޓާ ފޮއިލް ދިމާވޭތޯ. އެ ދިމާނުވެއްޖެނަމަ، ދެވަނަ ސްޓޭޖަކީ ބާތިލު ވޯޓު ގުނުން. އެންމެ ފަހު ސްޓޭޖުގައި ކެންޑިޑޭޓުންނަށް ލިބުނު ވޯޓު ގުނާނީ،" ޝަރީފް ތަފްސީލުކޮށް ދެއްވި އެވެ.
އަދި އުރައެއް ކެނޑުމުގެ ކުރިން އެ ހުޅުވާ ބޭނުން، އެތަނުގައި ތިބި އެންމެންނަށް ސާފުކޮށްދޭނެކަމަށް އިތުރަށް ވިދާޅުވި އެވެ.
ޝަރީފް ތަކުރާރުކޮށް ވިދާޅުވީ، އެ ފޮށިތައް ކަނޑަން އުޅުނީ އެއްވެސް މީހަކު، ނުވަތަ ޕާޓީއެއް، ނުވަތަ ކެންޑިޑޭޓަކު ހުށަހެޅި ޝަކުވާއަކާ ގުޅިގެން ނޫން ކަމަށާއި، ވަގުތީ ނަތީޖާ ސާފު ކުރުމުގެ ތެރޭގައި ޝައްކުވާ ކަންތައްތަކެއް ހުރެގެން ސީދާ އީސީން ނިންމައިގެން ކަމަށެވެ.
އިންތިހާބީ ގިނަ ޝަކުވާތަކެއް
ޝަރީފް ވިދާޅުވި ގޮތުގައި، މިއަދާ ހަމައަށް ކައުންސިލް އިންތިހާބާ ގުޅިގެން 89 ޝަކުވާ ލިބިފައިވާ ކަމަށެވެ.
އޭގެ ތެރޭގައި އާދަޔާ ހިލާފަށް ބާތިލު ވޯޓު ގިނަވުމާއި، ކައުންޓާ ފޮއިލް ދިމާނުވުމާއި، ވާދަކުރާ ކެންޑިޑޭޓުންގެ ފަރަގު ކުޑަވުންފަދަ ޝަކުވާތައް ހިމެނޭކަމަށް ވިދާޅުވި އެވެ.
އަދި އޭގެ އިތުރުން، ސިޔާސީ ޕާޓީތަކުން މިހާތަނަށް 21 ޝަކުވާއެއް ލިބިފައިވާކަމަށް ޝަރީފް ހާމަކުރެއްވި އެވެ.
ނަމަވެސް، މި މަރުހަލާގައި އޭގެ ތެރެއިން އެއްވެސް ޝަކުވާއެއް ނުބަލާނެ ކަމަށާއި، އަދި ދާއިމީ ނަތީޖާ އިއުލާނުކުރުމުގެ ކުރިން، އެ ޝަކުވާތަކަށް ރިއާއަތްކޮށް، އެއްވެސް ފޮއްޓެއް އަލުން ގުނާނީ ސީދާ ނަތީޖާއަށް ބަދަލު އަންނަ ފަދަ ކަމެއް ފާހަގަވެއްޖެ ނަމަ އެވެ.
