ކޮވިޑާ ގުޅިގެން އުފެދިފައިވާ އޮޅުންބޮޅުންތަކާއި އިހުމާލުގެ ސަބަބުން މި ބަލިމަޑުކަން ނިމެން އަދި ގާތް ވެސް ނުވާ ކަމަށާއި ނަމަވެސް އާއްމު ސިއްހަތުގެ ރައްކާތެރިކަމަށް އަޅާ ފިޔަވަޅުތަކާއެކު މަސްތަކެއްގެ ތެރޭގައި ކޮންޓްރޯލް ކުރެވިދާނެ ކަމަށް ދުނިޔޭގެ ސިއްހަތު ޖަމިއްޔާގެ ވެރިޔާ ވިދާޅުވެއްޖެ އެވެ.
"އަޅުގަނޑުމެން ވެސް ބޭނުން ވަނީ މުޖުތަމައުތަކާއި އިގްތިސާދުތައް އަލުން ހުޅުވި، ދަތުރުފަތުރު ފަށާ މަންޒަރު ދެކެން،" ޑަބްލިއުއެޗްއޯގެ ޑިރެކްޓަރު ޖެނެރަލް ޓެޑްރޯސް އަދަނޮމް ނޫސްވެރިންގެ ބައްދަލުވުމެއްގައި ވިދާޅުވި އެވެ.
"އެކަމަކު މި ވަގުތު ގައުމުތަކުގެ އައިސީޔޫތައް ދަނީ ފުރި ބަރާވަމުން އަދި މީހުން ދަނީ މަރުވަމުން. މިއީ ދިމާވުން ހުއްޓުވިދާނެ ކަންކަން،"
ބަލިމަޑުކަން ނިމެން ގާތް ނުވާ ކަމަށް ޑަބްލިއުއެޗްއޯއިން ބުނެފައި ވާއިރު، މި ވަގުތު ކޮވިޑުގެ ހާލަތު އެންމެ ގޯސްކޮށް އޮތީ އެމެރިކާގަ އެވެ. ތިން ވަނައަށް އެންމެ ހާލަތު ގޯސްކޮށް އިންޑިއާއިން މިއަދު ވަނީ ބްރެޒިލް ފަހަތަށް ވައްޓާލުމަށް ފަހު ދެ ވަނައަށް އަރާފަ އެވެ.
ނަމަވެސް މިއަދު ވެސް އިންޑިއާގައި ވަނީ ހިންދޫ ދީނުގެ އެންމެ ބޮޑު ފެސްޓިވަލް ކުރިއަށް ގެންގޮސް، ގިނަ އަދަދެއްގެ މީހުން ގައިދުރުކަމެއް އަދި މާސްކު އެޅުމެއް ނެތި އެއް ތަނަކަށް ޖަމާވެ އުޅެފަ އެވެ.
ޓެޑްރޯސް ވިދާޅުވީ އަދަދުތައް ކިތައްމެ ގޯސްކޮށް އުޅުނު ނަމަވެސް ބައެއް ގައުމުތަކުގެ ރެސްޓޯރެންޓުތަކާއި ނައިޓުކުލަބުތަކާއި މާރުކޭޓުތައް ފެންނަނީ ފުރިފައި ވަނިކޮށް ކަމަށެވެ.
"ބައެއް މީހުން ދެކޭ ގޮތުގައި އެ މީހުން އަދި ޒުވާންވުމުން ކޮވިޑް ޖެހުނަސް މައްސަލައެއް ނެތް،" އޭނާ ވިދާޅުވި އެވެ.
ޑަބްލިއުއެޗްއޯއިން މިއަދު އާއްމުކުރި ތަފާސްހިސާބަށް ބަލާއިރު ފާއިތުވި ހަފްތާގައި ކޮވިޑުގެ ކޭސްތައް ވަނީ ނުވައެއް އިންސައްތަ އިތުރުވެފަ އެވެ. އަދި މި ބަލީގައި މީހުން މަރުވި އަދަދު ވަނީ ފަހެއް އިންސައްތައިން އިތުރުވެފަ އެވެ.
