rރޯދަ މަސް ފެށެން އެންމެ ދުވަހަކަށް ވެފައި ވަނިކޮށް ފްރާންސްގެ މިސްކިތެއްގެ ފާރުގައި އިސްލާމްދީނަށް ފުރައްސާރަކޮށް މެސެޖުތަކެއް ލިޔުނު މައްސަލައެއް ފެންމަތިވެ، މިސްކިތްތަކުގެ ސެކިއުރިޓީ ވަރުގަދަ ކުރަން އަންގައިފި އެވެ.
ފްރާންސްގެ ހުޅަނގުގައި ހުންނަ މިސްކިތެއްގެ ފާރުގައި އިސްލާމްދީނާއި ކީރިތި ރަސޫލާއަށް ފުރައްސާރަކޮށް މެސެޖު ލިޔެފައި ހުއްޓާ ފެނުނީ އިއްޔެ އެ މިސްކިތް ބަލަހައްޓާ މީހުންނަށެވެ.
އިސްލާމްދީނާއި ކީރިތި ރަސޫލާއަށް ފުރައްސާރަ ކުރުމުގެ އިތުރުން ސޮލީބީ ހަނގުރާމަ އަލުން ފެށުމަށް ގޮވާލާ، ނަސާރާ ދީނަކީ ފްރާންސްގެ ރަސްމީ ދީނުގެ ގޮތުގައި ކަނޑައެޅުމަށް މެސެޖުތަކުގައި ގޮވާލާފައި ވެއެވެ.
ކަމާ ބެހޭ ފަރާތްތަކުން މިހާރު ދަނީ އެ މައްސަލަ ތަހުގީގު ކުރަމުންނެވެ. އެ މިސްކިތަށް ޒިޔާރަތް ކުރެއްވުމަށް ފަހު އިންޓީރިއާ މިނިސްޓަރު ޖެރަލްޑް ޑާމަނިން މިއަދު ވަނީ ފްރާންސްގެ 5.7 މިލިއަން މުސްލިމުންނާއެކު އޭނާ ހުންނެވި ކަމަށް ވިދާޅުވެފަ އެވެ.
އެ މައްސަލަ ބެލުމުގެ އިތުރުން ރޯދަ މަހާ ދިމާކޮށް މިސްކިތްތަކުގެ ސެކިއުރިޓީ ވަރުގަދަ ކުރަން ފުލުހުންގެ ކިބައިން އެދިފައި ވާނެ ކަމަށް ޑާމަނިން ވިދާޅުވި އެވެ. ދީނީ މިނިވަންކަމަކީ ފްރާންސްގައި ލިބިދޭ އަސާސީ ހައްގެއް ކަމަށް ވެސް އޭނާ ފާހަގަކުރެއްވި އެވެ.
މި އަހަރުގެ ރޯދަ މަސް މާދަމާ ފަށާއިރު، ފްރާންސްގައި އުޅޭ މުސްލިމުންނަށް މިނިވަންކަމާއެކު އަޅުކަން ކުރުމުގައި ހުރަސްތަކެއް އެބަ ހުއްޓެވެ. އެއީ އެ ގައުމުގެ މިސްކިތްތަކަށް އަމާޒުކޮށް ދޭތެރެ ދޭތެރެއިން ހަމަލާދެމުން ދާތީ އެވެ.
އެގޮތުން މިދިޔަ ބުރާސްފަތި ދުވަހުގެ ރޭ މިސްކިތެއްގެ ދޮރުގައި ހުޅު ޖެހި އެވެ. އޭގެ ފަހުން ހުކުރު ދުވަހު މިސްކިތަކަށް ހަމަލާ ދޭނެ ކަމަށް ބުނެ އިންޒާރު ދިން މައްސަލައެއްގެ އުމުރުން 24 އަހަރުގެ މީހަކު ހައްޔަރުކޮށްފައި ވެއެވެ.
