ކުރީގެ ރައީސް އަބްދުﷲ ޔާމީން އަބްދުލްގައްޔޫމް ގެކޮޅަށް ބަދަލު ކުރުމަށް ކުރަން ޖެހޭ މަޝްވަރާތައް ކުރައްވަމުން ގެންދަވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރޯދަ މަހަށް ރައީސް ޔާމީނަށް ލުއި ދިނުމުގެ ގޮތުން އެމަނިކުފާނު ގެކޮޅަށް ބަދަލުކޮށް ދިނުމަށް އާއިލާއިންނާއި ޕީޕީއެމްއިން ވަނީ އެދިފަ އެވެ.
ރައީސް ސޯލިހު މިއަދު ބޭއްވެވި ނޫސްވެރިންގެ ބައްދަލުވުމުގައި ވިދާޅުވި ގޮތުގައި ރައީސް ޔާމީންގެ އަނބިކަނބަލުން ފާތިމަތު އިބްރާހިމްގެ ސިޓީފުޅެއް އެމަނިކުފާނަށް ލިބިފައިވާ ކަމަށެވެ.
އެ ސިޓީފުޅުގައި ރައީސް ޔާމީން ގެކޮޅަށް ބަދަލުކޮށް ދިނުމަށް ފާތިމަތު އެދިވަޑައިގެންފައިވަނީ ރައީސް ޔާމީންގެ ސިއްހީ ހާލުކޮޅަށް ރިއާޔަތްކުރައްވާ ކަމަށެވެ.
ރައީސް ސޯލިހު ވިދާޅުވި ގޮތުގައި، ރައީސް ޔާމީނަށް ދެރަ ގޮތެއް ނުވާނެ ކަމަށާއި، އެމަނިކުފާނު ގެކޮޅަށް ބަދަލުކުރުމަށް، މަޝްވަރާ ކުރަން ޖެހޭ ފަރާތްތަކާއެކު މަޝްވަރާ ކުރަމުންދާ ކަމަށެވެ.
މީގެކުރިން ވެސް ރައީސް ޔާމީން ބޭސްފަރުވާއާ ގުޅިގެން އެމަނިކުފާނަށް ރާއްޖެއިން ބޭރަށް ވަޑައިގެންނެވުމުގެ ފުރުސަތު ސަރުކާރުން ފަހިކޮށް ދިން ކަމަށާއި ނަމަވެސް އެމަނިކުފާނު ރާއްޖެއިން ބޭރަށް ވަޑައިގަންނަވަން ބޭނުންފުޅު ނުވީކަން ރައީސް ފާހަގަ ކުރެއްވި އެވެ.
ރައީސް ޔާމީންގެ މައްޗަށް މަނީ ލޯންޑްރިންގެ ކުށް ސާބިތުވެ، ޖަލުގައި ހުންނެވިއިރު އިތުރު ޝަރީއަތެއް ވެސް މިހާރު ހިންގަ އެވެ. އެ ޝަރީއަތުގެ މަޖިލީހުގައި ވެސް ރައީސް ޔާމީން ވަނީ އެމަނިކުފާނުގެ ސިއްހީ ހާލުކޮޅާ ގުޅޭ ގޮތުން ވާހަކަފުޅު ދައްކަވާފަ އެވެ.
ރައީސް ޔާމީންގެ ސަރުކާރުގައި ބައެއް ސިޔާސީ ބޭފުޅުންނަށް ރޯދަ މަހު ލުއި ދެއްވާފައިވެ އެވެ. އެގޮތުން ޓެރަރިޒަމްގެ ކުށުގައި ޖަލުގައި ހުންނެވި މިހާރުގެ ހޯމް މިނިސްޓަރު އިމްރާން އަބްދުﷲއަށް އެ ފުރުސަތު ދެއްވި އެވެ.
